Potunduka ni Paulus koro-na ri ngayo ni Mbagou Agripa
26
1 Nanguli i Agripa si Paulus: “Iko niwei kalogaa mololita mantunduka koro-mu.” Pade niongkomo ni Paulus pale-na nanguli potunduka-na koro-na ewa ei:2 “To nibila Mbagou Agripa! Eo ei nasana mpuu rara-ku namala-dapa manguli potunduka-ku koro-ku ri ngayo-mu Mbagou nancambelai sumawee pangadua to niuli nu to Yahudi namparei-ku, 3 apaa nincani-ku iko Mbagou, nanguncani mpuu ada pade nuapa kara-kara nu to Yahudi. Etumo sabana, kuperapi ante rara mpuu-ku si-ko Mbagou Bete mancabara-ko mamparonge noa-ku. 4 Sumawee to Yahudi nanguncani beiwa katuwu-ku lako ri kanguraa-ku. Sabana lako ri kanguraa-ku, yaku natuwu riolo nu sarara-sarara-ku to Yahudi ri Yerusalem. 5 Nasae-ramo nanguncani-ku. Pade ande madota-ra, mamala-rada manguli posabiti bakote to Farisi-kuda to nantutu sumawee parenta to nantomo mpuu ri rara nu agama-ka. 6 Pade eo ei-ku nokongkore isei bona ratangara sabana yaku namparisaya potipa to nipowia nu Allatala ri totua-ta. 7 Potipa ee mbiimo to nisarumaka mpuu-ta to Israel to nipomulika nu sampulurodua ana ni Yakub, ranca-ra nenomba mpuu-mpuu-ramo ri Allatala eo bengina. Mbagou to nibila, apaa namparisaya mpuu ri potipa ee, nipomasala-kumo nu to Yahudi. 8 Nuapa pade sarara-sarara to Yahudi tado namala namparisaya bakote Allatala mamala mopatuwu mpanculi tomate?
9 Impia yaku dodo mbii nampekiri kana mowia ngila ngayana bona mangewa i Yesus lako ri Nazaret ee. 10 Pade ewa ee mpuumo nipowia-ku ri Yerusalem. Ante sura kuasa lako ri tobalia-tobalia ri matana, nadea todea nu Allatala nipasua-ku ri rara ntarungku. Yaku mbii noparikonoi bona rasuku mate-ra. 11 Nadea ngkani-ku noduasi-ra ri sou-sou penombaa nu to Yahudi, bona mopasa-ra mosapuaka nuapa to niparisaya-ra. Narende mpuu rara-ku si sira, nangkajadika nalou-kumo nodapa-ra duuna narata ri ngata-ngata ntanina to nakawao.”
I Paulus nampololita pancoro-na pade pampokio-ya
12 “Ante patuju ee mbiimo nikeni-kumo sura kuasa lako ri tobalia-tobalia ri matana to nantudu-ku malou ri Damsyik. 13 Pade bula-ku ri tongo dala, tempo nu eo ngkara Mbagou Agripa, nikalio-ku nuanu newanta lako ri langi neliupa kabaana lako ri pewanta nu eo. Nuanu newanta ee nantikusi-ku pade nantikusi tou-tou to nolumako namporoasi-ku. 14 Ikami sumawee nanawu ri tana. Pade nironge-kumo wotu nangulikaka-ku ante nobasa Ibrani: ‘Saulus, Saulus! Nuapa pade niduasi-mu Ku? Ande mupapola oa dapa mangewa dota-Ku, iko dodo to kana mantodosaka kapepaa.’ 15 Pade nanguli-kumo, ‘Yema-Ko, Tuama?’ Pade nesono i Pue: ‘Yakumo i Yesus to niduasi-mu ee. 16 Pemata-ko pade pokongkore! Yaku nampopekalio koro-Ku si-ko ante patuju bona mo'ongko-ko majadi topolayani-Ku pade sabi-Ku. Iko kana mampololita ri tou ntani nuapa to nikalio-mu eo ei nancambelai-Ku, pade nancambelai nuapa to kana Ku tudoka-ko ngoni ri eo ngkapurina. 17 Yaku kana mampakabebasi-ko lako ri to Yahudi pade lako ri tou-tou to tado to Yahudi. Yaku kana mantudu-ko malou si sira, 18 bona mampakanoto rara-ra, bona tadomo matuwu ri rara nu kadediana agiana matuwu ri rara nu kabaasana, bona isira mabebasi lako ri kuasa nu Mbagou Seta, pade nakuasai nu Allatala. Ante kaparisayaa si Yaku, jeko-jeko-ra kana ra'ampungi pade isira kana majadi todea nu Allatala to nipatani bona rapakagasa.’ 19 Etumo Mbagou Agripa, yaku nampesimbukui oa matundu ri pekalio to nitarima-ku lako ri Allatala ee. 20 Pade nipamula-kumo noparata ri tou-tou, isira kana mancoromo lako ri jeko-jeko-ra pade manculi ri Allatala, pade mampopekalioka ri rara ngkatuwu-ra bakote isira nancoro-ramo lako ri jeko-jeko-ra. Yaku moparata sumawee ee, paramula ntotona ri tou-tou to Yahudi ri Damsyik, naopu ee ri Yerusalem pade ri sumawee propinsi Yudea, pade riolo nu tou-tou to tado to Yahudi. 21 Etumo sabana tou-tou to Yahudi nosoko-ku ri karawaa Sou nu Allatala pade nampesimbukui mopatesi-ku. 22 Agiana duuna eo ei Allatala nantalendusi oa-ku nangkajadika namala-ku nokongkore isei pade nosabiti ri sumawee tou ei, ba ri pangka bete pade tou to tado nipangka. Pade nuapa to nipololita-ku kawule nantutu nuanu to niuli nu nabi-nabi pade i Musa, 23 bakote Mbagou Topepakasalama to nitipaka nu Allatala ee kana mantodosaka kapepaa, pade majadi tou to paramula ntotona matuwu mpanculi lako ri kamatea. Naopu ee, Ia nampopowole kareba kasalamaa to najadi ewa pewanta to nampakabaa tou-tou to Yahudi bo tou-tou to tado to Yahudi.”
24 Bula ni Paulus nanguli pantunduka-na koro-na, nongaremo i Festus: “Nagilamo-ko Paulus! Kapandea-mu to nadea etu nampakagila-ko.” 25 Agiana nesono i Paulus: “Tado nagila-ku Tuama to nibila. Lolita-lolita to niuli-ku ei nakono mpuu-da pade nesuwu lako ri pekiri-ku to nanoto. 26 Nincani dododa nu Mbagou Agripa nuapa to niuli-ku ei. Etumo sabana nabia-ku nololita ante kakonoana ri ngayo nu mbagou. Niparisaya mpuu-ku tado-namo sangayaa nuanu etu to tadopa nincani-na, sabana sumaweena ee tado najadi ri pearia-pearia to nakawunisa. 27 To nibila Mbagou Agripa, niparisaya-muda nuanu niuli nu nabi-nabi? Nincani-ku niparisaya-muda Mbagou.” 28 Pade nangulimo i Agripa si Paulus: “Nipekiri-mu mamala-ko mopajadi-ku to Karasitee bulawee ei?” 29 Nesono i Paulus: “Baa masae, ba tado masae, yaku mosambaya ri Allatala bona iko Mbagou pade sumawee tou to namparonge-ku eo ei mamala majadi ewa yaku, agiana tado rasilu ante rante ase ewa ei.” 30 Pade nokongkoremo mbagou, gubernur, pade i Bernike ante sumawee tou ntanina, nesuwu ri sawalikuna. 31 Ranca-ra nesuwu ri sawalikuna, nombeulikaka-ramo: “Tou ei tado nowia nuapa-pa to masipato rasuku mateka-ya ba ratarungkuka-ya.” 32 Pade nangulimo i Agripa si Festus: “Kakono-konona tou ei mamala-yamo rapakabebasi ande tado nerapi timba-ya ri potangaraa Mbagou Bete.”