I Paulus ri ngayo ni Festus
Nerapi timba ri Mbagou Bete
25
1 Naliu tolu eo lako ri karata ni Festus ri ngamba ee, neongko-yamo lako ri ngata Kaisarea nalou ri ngata Yerusalem. 2 Radou tobalia-tobalia ri matana pade panakoulu-panakoulu nu to Yahudi noparata pangadua-ra nancambelai i Paulus. 3 Niperapi oa-ra si Festus bona ante kabelo nu rara-na si sira, madota-ya mantudu tou mangkeni i Paulus ri Yerusalem. Apaa nopasaongu wotu-ramo mopatesi i Paulus ri tongo dala. 4 Agiana nisono ni Festus: “I Paulus ei nitahangi ri Kaisarea-yadapa pade yaku dodo ei mbii tadomo masae-ku manculiki radou. 5 Etumo, tudumo pangka-pangka bete lako riolo-mi mamporoasi-ku malou ri Kaisarea, pade manguli pangadua-ra radou, ande naria mpuu kasala to nipowia-na.” 6 Neari-pa i Festus ri Yerusalem rapa-rapana uwalu ba sampulu eo mbii-pa, nanculi-yamo ri Kaisarea. Kaneilena nipowia-namo libu potangara pade noparentai bona rakeni i Paulus mampotomuka-ya. 7 Naratapa i Paulus, tou-tou to Yahudi to naratamo lako ri Yerusalem nokongkore nantikusi-ya, pade nopamula-ramo nanguli perei-perei-ra to nantomo si Paulus. Agiana tado namala-ra nopadupa nuanu to nireika-ra ya ee. 8 Ri rara potunduka-na koro-na, i Paulus nanguli: “Yaku tado nowia nuapa-pa to nasala ri parenta Taurat to nitulisi ni Musa ba ri Sou nu Allatala ba ri Mbagou Bete Roma mpuumo.” 9 Agiana i Festus madota mangala rara nu to Yahudi. Pade nipekutana-namo i Paulus: “Madota-ko malou ri Yerusalem bona ratangara radou ri ngayo-ku nancambelai nuanu nireika-ra ko etu?”10 Nesono i Paulus: “Jaa ei ku nokongkore ri ngayo nu topotangara Mbagou Bete Roma, pade isei-kumo kana ratangara. Nincani dodo-muda Tuama, tado naria kasalaa-ku ri to Yahudi. 11 Ande nowia nuanu nadaa-ku pade nowia nuanu to masipato rasukuka-ku ante suku mate, madota-ku mamate. Agiana ande nuanu nireika-ra ku ee tado nakono, tado namo saduaa mamala mambei-ku si sira. Ku-perapi bona ratangara ri potangaraa nu Mbagou Bete!”
12 Naopu-pa nolibu ante to pande-topande-na, nangulimo i Festus: “Apaa iko dodo-da nerapi bona ratangara ri potangaraa Mbagou Bete, jadi kana malou dodo-ko mampotomuka Mbagou Bete.”
I Paulus ri ngayo ni Agripa pade i Bernike
13 Basangkia eopa naliu, naratamo Mbagou Agripa pade i Bernike ri Kaisarea mantabe i Festus. 14 Neari-rapa basangkia eo isee, niulimo ni Festus kara-kara ni Paulus si Mbagou Agripa. Nanguli-ya: “Naria isei sadua to nitarungku to nipawia ni Feliks. 15 Tempo-ku ri Yerusalem, tobalia-tobalia ri matana pade panakoulu-panakoulu nu to Yahudi nanguli pangadua-ra nancambelai tou ee, pade nerapi bona yaku mosuku-ya. 16 Agiana nisonoi-ku ande mantutu atura nu to Roma, tado mamala mambei dodowee to nirei bona rasuku, ande to nirei ee tadopa rapopotomu ante tonamparei-ya pade rawei kalogaa motunduka koro-na. 17 Etumo, tempo-ra narata isei noroa ante yaku, tadomo nopea-ku nasae-sae. Kaneilena nipowia-kumo libu potangara pade noparentai bona tou ee rakeni mampotomuka-ku. 18 Nokongkore-pa toporei-ya nanguli pangadua-ra, nipekiri-ku nariamo nuanu nadaa nipowia-na, ntanono tado naria niuli-ra. 19 Isira ei kawule sore nontani pamparata-ra ante i Paulus nancambelai agama-ra pade nancambelai sadua to nisanga i Yesus. Tou ee namate-Yamo, agiana i Paulus nanguli tou ee natuwu mpanculi. 20 Apaa naingu-ku beiwa kamala-ku moparesa kara-kara ewa ee, nipekutana-kumo i Paulus ba madota-yada malou ri Yerusalem bona radou-yadamo ratangara. 21 Agiana i Paulus nerapi bona kara-kara-na rapapola ri Mbagou Bete, pade nerapi bona meari dodo ri tarungku-yamo ulu duuna nabotusi nu Mbagou Bete kara-kara-na. Etumo sabana yaku noparentai bona ratahangi oa-yamo ulu, duuna ku-rata kalogaa mopakatu-ya ri Mbagou Bete.” 22 Pade nangulimo i Agripa si Festus, “Yaku dodo mbii madota mamparonge tou etu mololita.” Nesono i Festus: “Neile mamalamo-ko mamparonge-ya mololita.”
23 Kaneilena naratamo i Agripa pade i Bernike nisombo ante ada kamaradika. Nesua-ramo ri lonta nu sou potangaraa noroa-roa ante sepu tadulako nu surodado pade pangka-pangka bete ri ngata ee. Niparentaimo ni Festus bona rakeni mpesuamo i Paulus ri lonta nu sou potangaraa ee. 24 Pade nangulimo i Festus: “Mbagou Agripa pade ikita sumawee to naria isei! Tou ei nipangaduka-yamo si yaku nu sumawee to Yahudi to natida ri Yerusalem pade to natida isei. Narata-ramo si-yaku pade nituntu-ra ante nongare-ngare lako pade nanguli tado masipato-ya rapalambaka matuwu. 25 Agiana tado naria nirata-ku namo sangayaa nuanu nipowia-na to masipato rasukuka-ya ante suku mate. Sabana ia dodomo nerapi kara-kara-na natangara nu Mbagou Bete, nibotusi-kumo mopakatu-ya ri Mbagou Bete. 26 Agiana tadopa naria nirata-ku namo sangayaa noa to nakono nancambelai-ya bona kutulisi ri rara nu sura-ku ri Mbagou Bete. Eemo sabana yaku mampopotomu-ya ante ikomi sumawee Tuama-tuama, pade paralou ntotona si-ko Mbagou Agripa! Patuju-ku bona maopupa pampekutana-ya ei, mariamo nuanu to ku-tulisi. 27 Apaa ande pamparata-ku, tado masipato mopakatu sadua to nitarungku ande tado ratulisi nuanu to nireika-ya.”