I Paulus ri ngayo ni Feliks
24
1 Naliupa alima eo, Tobalia Bete i Ananias pade topangkeni-topangkeni to Yahudi nalou ri Kaiserea noroa ante sadua topotarete kara-kara to nisanga i Tertulus. Isira ei mampotomuka gubernur Feliks pade manguli pangadua-ra nancambelai i Paulus. 2 Nipokiopa i Paulus ri ngayo-ra, nopamulamo i Tertulus norei-ya, ewa ei:“Tuama Gubernur to nibila! Ri rara poparentaa-mu propinsi ei na'ama oa. Pade lako ri kapandea-mu Tuama nadeamo pobalia nu propinsi-ka ei. 3 Sumaweena ee nitarima oa-ka ante nosukuru pade nibila mpuu-mpuu-ka riumba-umba-ka malou. 4 Bona nemo masae gaga-ko mampeagika ei Tuama, ku-perapi si-ko ante doli rara-mu, ande mamala ronge ulu pangadua-ka saodi ei. 5 Nirata-ka tou ei nowia oa kagesoaa. Riumba-umba-ya nampoposisala pasa sumawee to Yahudi, pade ia ei najadi topangkeni kolompo to Nazaret. 6 Tado kawule ee, ia mbii nampesimbukui nampakarumu Sou nu Allatala, agiana nisokoka-yamo. [Patuju-ka ei mosuku-ya mantutu parenta nu agama dodo-ka. 7 Agiana tadulako Lisias narata noago-ya lako si kami, 8 pade noparenta bona sumawee topopangaduka-ya mampotomuka-ko Tuama.] Ande mu-pekutana tou ei Tuama, kana mu-ronge dodomo lako siya kakono nu sumawee nuanu nireika-ka ya.” 9 Tou-tou to Yahudi to naria isee mbii nantutu namparei i Paulus pade noparikonoi sumawe nuanu niuli ni Tertulus.
10 Pade noraemo gubernur ee si Paulus bona mamala-yamo mololita. Pade nololitamo i Paulus: “Nincani-kuda Tuama nompaekamo-ko najadi topobotusi kara-kara ri propinsi ei. Etumo sabana yaku ei nasana rara-ku manguli potunduka koro-ku ri ngayo-mu Tuama. 11 Tado nelabi lako ri sampulu roeo naliu nalou-kumo nenomba ri Yerusalem. Mamala-da mu-pekutana ri tou nancambelai nuanu ee. 12 Pade tado naria-ku nirata nu to Yahudi etu namposisalaka saduaa tou ba nopasintobu tou bona mowia sisala, ba- ri karawaa Sou nu Allatala ba ri sou-sou penombaa nu to Yahudi ba riumba-umba mpuumo ri rara ngata. 13 Isira ei mbii tado namala nopadupa nuanu to nireika-ra ku ei siko Tuama. 14 Ku-pangaku amida siko Tuama, yaku nenomba ri Allatala nu totua-ka nantutu pepatuduki ni Yesus, to niuli-ra tado nakono ee. Agiana niparisaya-kudapa sumawee to natetulisi ri rara Buku ni Musa pade ri Buku nu Nabi-nabi. 15 Nasimbei ante isira, yaku mbii nancarumaka ri Allatala sumawee tou namate kana matuwu mpanculi, baa tou-tou nanoa, ba tou-tou nadaa! 16 Etumo sabana nipesimbukui oa-ku, bona rara-ku marawa dodo ri Allatala pade marawa dodo ri singkapada manusia.
17 Naliu basangkia mpae, nanculi-kumo ri Yerusalem nangkeni doi pengawa ri sarara-ku to Yahudi, pade bona mangkeni binata penomba si Pue Allatala. 18 Sintou-ku nowia nuanu ee, nirata-raku ri karawaa Sou nu Allatala, naopu-ku nowia ada mampakagasa koro. Tado naria tou dea namporoa-ku, pade tado mbii naria posisala isee tempo ee. 19 To naria isee kawule basangkia dua to Yahudi lako ri propinsi Asia. Kakono-konona isira-da to kana maria isei manguli pangadua-ra si-ko Tuama, ande maria nuanu to rareika-ra ku. 20 Ba palambakamo tou-tou ei dodomo manguli nuanu nadaa to nirata-ra si yaku sintou-ku ri ngayo nu Topotangara Agama. 21 Sangaya ngkola-da nuanu nirata-ra si yaku, panguli-ku ri ngayo-ra, ewa ei: Yaku namparisaya bakote tou-tou namatemo kana matuwu mpanculi. Eemo sabana pade nitangara-ku eo ei.”
22 Pade i Feliks to nadeamo nanguncani nancambelai pepatuduki ni Yesus, nipakaopu-namo ulu polibui kara-kara ee. Niuli-na: “Yaku kana mobotusi kara-kara ei ande marata-damo sepu nu tadulako to nisanga i Lisias.” 23 Pade niparenta-namo tadulako nu surodado to nojagai i Paulus bona motahangi oa-ya, agiana nambeikaka mbii-ya kalogaa saodi pade mampaliu dodo roa-roa-na mambeikaka-ya kaparaloua-na.
24 Pade naliu-pa basangkia eo naratamo i Feliks noroa ante bangkele-na to nisanga i Drusila, ia ei to Yahudi. Nitudumo ni Feliks tou mampokio i Paulus, bona naronge i Paulus mampololita nancambelai kaparisaya si Yesus Kristus. 25 Agiana nipapolapa ni Paulus pololita-na nancambelai katuwu nanoa ri ngayo nu Allatala, potahangi rara pade nancambelai potangara nu Allatala ri Eo Kaopua nu Dunia ngoni, negoli naekamo i Feliks pade nanguli: “Maganamo, koumo-ko ulu. Kupokiokidamo-ko ande maria kalogaa.” 26 Tempo ee i Feliks nancarumaka kana mamparata doi lako si Paulus. Etumo sabana pade nitudu oa namo tou mangala i Paulus bona mololita ante ia. 27 Naliupa rompae, i Perkius Festus nosambei i Feliks najadi gubernur. Pade bona mangala rara nu to Yahudi, nipalambaka dodo-namo i Paulus ri rara nu tarungku.