23
1 Niololemo ni Paulus Topotangara-topotangara Agama Yahudi isee pade niuli-namo: “Sarara-sarara-ku! Duuna eo ei yaku natuwu ante rara nagasa ri ngayo nu Allatala.” 2 Ranca ni Paulus nanguli ewa elouria, Tobalia Bete i Ananias nantudu tou nosopo ngudu ni Paulus. 3 Pade niulimo ni Paulus ri Tobalia Bete ee: “Allatala kana mosapa-ko to nabelo wongko etu! Iko noncunda iseetu nobotusi kara-kara-ku nantutu parenta Taurat to nitulisi ni Musa, bo ee iko dodo tado natundu ri parenta ee, apaa nantudu tou nosopoku!” 4 Tou-tou to naria isee nanguli si Paulus: “Nabia mpuu-ko nangkanene Tobalia Bete nu Allatala!” 5 Nesono i Paulus: “Ooh, tado nincani-ku, sarara-sarara, bakote Tobalia Bete-ya. Ri rara Buku Nagasa naria ami-da nitulisi: ‘Nemo mangkanene woo nu ngata-mi.’ ”
6 Nikalio ni Paulus saganta lako ri topotangara-topotangara ee to Saduki pade saganta mbii to Farisi. Eemo sabana pade nongare-yamo ri topotangara ee: “Sarara-sarara! Yaku ei to Farisi, muli nu to Farisi. Yaku nitangaraka kara-kara-ku isei sabana yaku namparisaya ande tou-tou namatemo kana matuwu mpanculi.” 7 Panguli-napa ewa ee, nopamulamo to Farisi pade to Saduki ee nosisala pasa, nangkajadika libu ee see nogampotaa apaa nopasambiramo to Farisi pade iwee mbii to Saduki . 8 Apaa to Saduki nanguli, ande mamate-damo tou, tadomo mamala matuwu mpanculi, tado naria malaeka, pade wao-wao mbii tado naria. Agiana to Farisi namparisaya naria mpuu-da sumaweena ee. 9 Pade najadimo sisala ntomo. Basangkia dua topande ri Buku Taurat lako ri kolompo to Farisi nokongkore pade ne'ewa ante rara mpuu-ra. Nanguli-ra, “Pamparataka ikami, tou ei tado naria kasalaa-na namo saodia! Beiwa ba naria mpuu-da inosa gasa ba malaeka to nololita siya!”
10 Nantomo mpuu posisala ee, nangkajadika sepu nu tadulako ee naeka nemo-nemo i Paulus radulu-ra. Pade nitudu-namo surodado-na nalou nangala i Paulus lako ri tongo-tongo nu tou ee pade nangkeni-ya ri sou pearia nu surodado.
11 Bengi kaneilena-pa nokongkoremo i Pue Yesus ri siawe ni Paulus pade nanguli: “Pakaroso rara-mu! Beiwa posabiti-mu Ku ri Yerusalem, iwee mbii ngoni posabiti-mu Ku ri Roma.”
Kasintuwu nu to Yahudi mopatesi i Paulus
12 Sangkaba-baa kaneilena, tou-tou to Yahudi nopamula-ramo nosintobu bongo-bongo nowia liwo. Nosumpa-ramo tadopa mangkondi ba manginu ande tadopa rapatesi-ra i Paulus. 13 Nelabi lako ri aopo mpulu kadea-ra. 14 Nalou-ramo ri tobalia-tobalia ri matana pade topangkeni-topangkeni to Yahudi pade nanguli: “Nosumpa sangkani-kamo, bakote tadopa mangkondi ba manginu-ka ande tadopa ka-patesi i Paulus. 15 Etumo, bulawee ee ikomi sarara-sarara ante Topotangara Agama Yahudi kana merapi ri sepu nu tadulako Roma etu bona mangkeni mpanculi i Paulus ri ngayo-mi, bona rauli ikomi madota mampekutanaki-ya mbii ante mpuu-mpuu. Bona sintou tadopa marata-ya isei, masadia-kamo mopatesi-ya ri tongo dala.”
16 Agiana pinoana ni Paulus, ana nu sarara-na bangkele namparonge liwo nu tou-tou ee. Pade nalou-yamo ri sou pearia nu surodado nanguli liwo ee si Paulus. 17 Nipokiomo ni Paulus sadua tadulako pade nanguli si-ya: “Kenimo kabilasa ei ri sepu-mu, sabana naria nuanu to na-uli si-ya.” 18 Nikenimo nu tadulako kabilasa ee ri sepu-na pade nanguli: “I Paulus to nitarungku, nampokio-ku pade namperapi-ku mangkeni kabilasa ei siko Tuama, apaa naria nuanu to madota na-uli si-ko.”
19 Pade nikakamumo sepu nu tadulako pale nu kabilasa ee, nangkeni-ya nopatani ri tosambirana pade nampekutana-ya: “Nuapa-da madota mu'uli si ya-ku?”
20 Nesono kabilasa ee: “Tou-tou to Yahudi nasintundu-ramo merapi siko Tuama bona mangkeni i Paulus mampotomuka Topotangara Agama neile, bona rauli isira madota mampekutanaki mpuu-mpuu kara-kara ni Paulus. 21 Agiana nemo mututu perapia-ra ee, sabana naria nelabi aopo mpulu tou to nentabongo bona mampalawa-ya ri dala. Isira sumawee nosumpa-ramo tadopa mangkondi pade manginu ande tadopa rapatesi-ra i Paulus. Bulawee ei nasadia-ramo, kawule mopea sono-mudamo tuama.” 22 Nangulimo sepu nu tadulako ee: “Nemo mu'uli ba si yema- yema bakote niuli-mumo nuanu ei si yaku.” Pade nitudu-namo kabilasa ee manculi.
I Paulus niencu ri Kaisarea
23 Naopu ee nipokiomo nu sepu nu tadulako ee rodua tadulako, nanguli-ya si sira: “Pakasadia roatu surodado ante papitu mpulu surodado mpojara pade roatu surodado mpotawala meongko tinti sasio bengi ei mbii malou ri Kaisarea. 24 Pakasadia mbii jara nasawi ni Paulus pade keni-yamo, nemo ngoni rakia-kia-ya duuna marata si gubernur Feliks.” 25 Pade nitulisimo nu sepu nu tadulako ee sura nanguli ewa ei:
26 “To nibila Gubernur Feliks. Tabe lako si Klaudius Lisias!
27 Tou ei nisoko-yamo nu tou-tou to Yahudi pade kerapateisi-ra, ande tado narata-ku ante surodado-ku nopatuwu-ya, apaa nironge-ku ia ei todea nu kambagoua Roma. 28 Apaa yaku madota manguncani nuapa ntotoda sala nireika-ra ya, etumo pade nikeni-ku yamo ri Topotangara Agama-ra. 29 Ntanono tado namo sangayaa nuanu nipowia-na to masipato rasukuka-ya ante suku mate ba ratarungku. Nuanu nireikara-ya kawule nuanu natetokai ante parenta-parenta nu agama-ra to Yahudi. 30 Pade nampopanguncanika-ku naria liwo nadaa lako ri tou-tou to Yahudi madota mopatesi-ya. Etumo pade nagasi-gasi nipakatu-ku ya si-ko Tuama Gubernur. Pade nitudu-kumo sumawee toporei-ya mangkeni pangadua-ra si-ko Tuama.”
31 Pade nipowiamo nu surodado-surodado nuapa to niparentaka-na ra. Niala-ramo i Paulus pade nibawa-ra kawengina ee mbii narata ri ngata Antipatris. 32 Kaneilena nipalambaka-ramo surodado mpojara nopapola polumako-ra ante i Paulus, pade surodadu-surodado to ntanina, nanculi-ramo ri sou pearia nu surodado. 33 Naratapa surodado mpojara ee narata ri Kaisarea, niparata-ramo sura ee ri gubernur, pade nambei i Paulus si-ya. 34 Nibasapa nu gubernur sura nikeni-ra ee, nipekutana-namo i Paulus tou lako riumba-ya. Nincanina-pa i Paulus lako ri Kilikia, 35 niuli-namo: “Ande iweetu wea, yaku-damo mourusi kara-kara-mu, ande maratapa tou-tou to nampangaduka-ko ee isei.” Pade niparenta-namo bona i Paulus ratahangi ri rara nu sou bete ni Herodes.