Polibu ri Yerusalem
15
1 Basangkia dua tou lako ri Yudea namei ri ngata Antiokhia pade nopatuduki tou-tou to neparisaya ri ngata ee, ande tado ratindi mantutu parenta ni Musa, tado mamala-ra rapakasalama. 2 Agiana i Paulus pade i Barnabas nampabili mpuu pamparata nu tou-tou ee. Kaopuana nibotusimo bona i Paulus pade i Barnabas ante basangkia dua tou ntani lako ri ngata Antiokhia malou ri Yerusalem, bona mampololita pombebili parenta ni Musa nancambelai tou to rapakasalama kana ratindi pade suro-suro ante topangkeni-topangkeni todea nu Allatala ri Yerusalem.3 Todea nu Allatala ri Antiokhia nambawa-ra duuna ri sawaliku nu ngata ee, naopu ee nalou-ramo nodala ri Fenisia pade Samaria. Isee-ra nopatuntu beiwa tou-tou to tado to Yahudi nancoromo lako ri jeko pade neparisaya si Yesus. Kareba ee nampakadonu mpuu tou-tou to neparisaya isee. 4 Karata-ra ri Yerusalem, nisombo belo-belo ra-mo nu todea nu Allatala, pade suro-suro bo topangkeni-topangkeni todea nu Allatala. Pade nipatuntumo ni Paulus bo i Barnabas ri tou-tou ee nancambelai sumawee to nipowia-ra sabana kakuasaa nu Allatala. 5 Agiana basangkia dua tou lako ri to Farisi to neparisayamo, nokongkore pade nanguli: “Tou-tou to tado to Yahudi to neparisayamo etu kana ratindi pade kana mantutu parenta Taurat to nitulisi ni Musa.”
6 Pade notobumo suro-suro bo topangkeni-topangkeni todea nu Allatala nampololita nuanu ee. 7 Nasae mpuu-ra nampombebilii nuanu ee. Kaopuana nokongkoremo i Petrus pade nanguli: “Sarara-sarara, nincani dodo-mida bakote basangkia ntempo naliu nipelisi-kumo nu Allatala lako riolo-mi bona mampopowole Kareba Belo ee ri tou-tou to tado to Yahudi, bona isira mbii mamparonge pade mamparisaya. 8 Pade Allatala to nanguncani rara nu manusia nipanotosi-Namo bakote Ia kana mantarima-ra. Ia nopanotosi nuanu ee ante nambeika-ra Inosa Gasa ewa to niwei-Na si kita mbii. 9 Allatala tado nampopontani-ta ante isira. Ia nopagasa rara-ra, apaa isira neparisaya. 10 Ande ewa ee, nuapa pade madota komi mampesori Allatala tempo ei ante mambei parenta to nantomo ri topetutu-topetutu ei, bo ee lako ri totua-ta impia bo ikita dodo ei mbii tado nampakule nampowia? 11 Pegoliana, ikita namparisaya bakote ikita nipakasalama sabana towe rara ni Pue Yesus, iwee mbii-da isira.”
12 Pade nalinomo sumawee tou to notobu isee pade namparonge i Barnabas bo i Paulus nopatuntu mpanculi sumawee pampetonondi pade kadupaa to nipowia-ra ante kakuasaa nu Allatala riolo nu tou-tou ntani to tado to Yahudi. 13 Naopu-rapa nololita, nangulimo i Yakobus: “Sarara-sarara, ronge-ku. 14 Lako naopu-dapa nipanotosi ni Simon Petrus beiwa Allatala paramulana nambei towe-Na ri tou-tou to tado to Yahudi, ante nampelisi lako si sira tou-tou to kana majadi todea-Na. 15 Nuanu ee nasimbei ante lolita nu nabi-nabi ngkoulu to nitulisi ewa ei:
16 Maopu ee Yaku kana marata mpanculi
pade mopatinda mpanculi poparentaa ni Daud to narobomo
pade nuanu to narobo kana Ku-patinda mpanculi
pade kana Ku-pakaroso,
17 bona sumawee tou ntani mangonco i Pue,
moroa ante sumawee tou-tou to tado to Yahudi to nipokio-Kumo majadi todea-Ku.
Iweemo panguli ni Pue,
18 to nepopanguncanika patuju ee lako ngkoulu.
19 Jadi ande pamparata-ku, tado mamala ta-pakasusa tou-tou to tado to Yahudi to nancoromo lako ri jeko pade namei ri Allatala. 20 Agiana ikita kana motulisi sura si sira pade mopatuduki-ra bona nemo rakondi-ra kondia narumu to nipopenombamo ri karampua, ba mangkondi isi nu binata to namate nibaga, ba mangkondi raa. Pade mbii bona mampakakawao koro-ra lako ri parabuata-parabuata mobualo. 21 Sabana parenta Taurat to nitulisi ni Musa lako ngkoulumo ni basa ri butu Eo Peuntua nu to Yahudi, pade ri sou-sou penombaa, pade nipopowole ri sumawee ngata.”
Pampasonoi Antiokhia
22 Suro-suro pade topangkeni-topangkeni todea nu Allatala, noroa-roa ante sumawee todea ee nobotusi bona mampelisi basangkia dua lako riolo-ra to kana ratudu malou ri Anthiokia moroa-roa ante i Paulus bo i Barnabas. Pade nipelisi-ramo i Silas pade i Yudas to nisanga mbii i Barsabas. Tou rodua eimo panakouluna riolo nu tou-tou to neparisaya ri Yerusalem. 23 Noroa ante tou-tou nitudu ee nipakatu mbii-ra sampeka sura to nitulisi ewa ei: “Nadea tabe lako si kami sarara-sarara-mi suro-suro bo topangkeni-topangkeni todea nu Allatala, si komi sarara-sarara to tado to Yahudi to neari ri ngata Anthiokia, ri propinsi Siria pade Kilikia. 24 Nironge-ka naria basangkia dua tou lako ri olo-ka to naloumo si komi pade nampakaingu bo nampoposesaa rara-mi ante pepatuduki-pepatuduki-ra. Bo ee tado nituduka-ra mowia nuanu ee. 25 Eemo sabana pade notobu-kamo bo nosaongu wotu nampelisi basangkia dua tou pade nantudu-ra malou si komi noroa-roa ante i Barnabas pade i Paulus to nipotowe-ka. 26 Tou rodua ei nambeimo inosa-ra apaa nantutu i Pue-ta i Yesus Kristus. 27 Jadi, nitudu-kamo i Yudas pade i Silas malou si komi sarara-sarara. Isira dodo damo to kana moparata si komi kareba to nitulisi ri rara nu sura ei. 28 Sabana Inosa Gasa noparikonoimo pade ikami mbii niparikonoi-kamo, bona ikomi nemo rapopangkolo atura-atura to neliu kantomona. Kawule atura-atura ei ngkola-da to niparalou: 29 Nemo mangkondi kondia to nipopenombamo ri karampua, nemo mangkondi raa, nemo mangkondi isi nu binata to namate nibaga, pade kawaosi parabuata-parabuata mobualo. Ande ikomi mampakakawao koro-mi lako nuanu-nuanu ee, batuana ikomi nowiamo nuanu to nabelo. Sudu iseimo ulu, masalama dodo!”
30 Naopu nopalakana, neongkomo i Yudas pade i Silas nalou ri Anthiokia. Radou-ra nampokio sumawee todea nu Allatala nosintobu pade noparata sura ee si sira. 31 Pobasa nu todea-todea ee isi nu sura ee, nadonu mpuu-ramo apaa isi nu sura ee nampakawoe rara-ra. 32 I Yudas pade i Silas ei, nabi mbii-rada, nasae-ra nololita ante sarara-sarara to neparisaya ri Anthiokia ee, nodederi-ra pade nampakaroso rara-ra. 33 Natidapa i Yudas pade i Silas basangkia kasaena isee, tou-tou to neparisayamo ri Anthiokia ee nampopeongko-ra ante woe rara manculi ri tou-tou to nantudu-ra. 34 [Agiana i Silas nobotusi matida dodo ri Anthiokia-yamo.]
Pobungka ni Paulus ante i Barnabas
35 I Paulus ante i Barnabas natida basangkia kasaena ri Antiokhia. Isee-ra nepatuduki pade nampopowole lolita ni Pue noroa-roa ante nadea tou ntanina. 36 Agiana tadomo nasae naopu ee nangulimo i Paulus si Barnabas : “Nabelopa ande manculi-ta ri sarara-sarara-ta to neparisaya si Yesus ri butu ngata-ngata, to nikaloui-tamo nampopowole lolita ni Pue, bona ta-kalio beiwamo katuwu-ra.” 37 I Barnabas madota mangkeni i Yohanes to niuli mbii i Markus, 38 agiana nanguli i Paulus tado nabelo mangkeni tou to nampaleisi-ra ri propinsi Pamfilia pade tado nadota nobago noroa-roa ante isira. 39 Pade nobungka ntomomo i Paulus pade i Barnabas nangkajadika nogaa-ramo. I Barnabas nangkeni i Markus pade newote-ramo nalou ri Siprus. 40 I Paulus nampelisi i Silas na-poroa, naopu ee nisambayani-ramo nu tou-tou to neparisaya ri Anthiokia ee. 41 Pade neongko-ramo nantoleliki propinsi Siria pade Kilikia, isee-ra nampakaroso rara nu todea nu Allatala.