14
1 I Paulus pade i Barnabas namparasai nuanu nasimbei ri Ikonium. Isira nalou mbii ri sou penombaa nu to Yahudi pade nepatuduki nancambelai i Yesus isee nangkajadika nadea to Yahudi pade tou-tou to tado to Yahudi najadi namparisaya i Yesus. 2 Agiana tou-tou to Yahudi to tado nadota neparisaya si Yesus noasui tou-tou to tado to Yahudi bona rapodaa-ramo tou-tou to namparisaya i Yesus. 3 Eemo sabana i Paulus pade i Barnabas neari nasae isee. Pade nabia-ra nampololita nancambelai i Pue. Pade i Pue nopadupa kareba niparata-ra nancambelai towe-Na ee nakono mpuu-da. Niweika-ra ni Pue kuasa nampowia pampetonondi-pampetonondi pade kadupaa-kadupaa. 4 Agiana todea ri ngata ee tado saongu rara, naria namposambira tou-tou to Yahudi to tado neparisaya pade naria mbii to namposambira ri suro-suro ee. 5 Pade tou-tou to Yahudi to tado neparisaya ante topangkeni-topangkeni-ra bo tou-tou to tado to Yahudi nopasaongu wotu bona moduasi suro-suro ee pade mowunu-ra ante watu. 6 Agiana panguncani nu suro-suro ee liwo mampaduasi-ra, nopatani-ramo nalou-ramo ri propinsi Likaonia ri ngata Listra bo ri ngata Derbe pade ngamba ri siawena. 7 Radou-ramo nampololita kareba belo ee.8 Ri Listra naria sadua baleilo napungku paa-na lako pampoanaka-ya, pade tadopa naria nolumako apaa nalede paa-na. 9 Tou ee noncunda namparonge i Paulus nololita. Niololemo ni Paulus tou ee pade nikalio-na tou ee neparisaya-da, eemo sabana mamala-ya rapakabelo. 10 Ante wotu narimboso i Paulus nanguli: "Pokongkore-ko." Tou ee nekalitende nokongkore pade nolumako-yamo. 11 Pangkalio nu tou dea ee nuapa to nipowia ni Paulus, nongare-ramo ri rara basa Likaonia: “Nesompomo karampua-karampua ri dunia namposimbei koro nu manusia.” 12 Pade nisanga-ramo i Barnabas i Zeus pade i Paulus nisanga-ra i Hermes apaa ia-mo topololita.a 13 Tobalia karampua ni Zeus to sou penombaa-na ri sawaliku nu ngata ee narata nangkeni japi tuama pade bunga-bunga ri wombo nu ngata ee. Pade tou dea ri ngata ee nantutu-ya, madota mojuju tinuwu ri suro-suro ee. 14 Pamparonge ni Barnabas pade i Paulus nuapa dota nu tou-tou ee, nibite-bite-ramo powaru-ra pade nokumbeno ri tongo-tongo nu tou dea ee pade nongare: 15 “He, nuapa komi pade nipowia-mimo ei? Ikami ei manusia mbii-kada ewa ikomi. Ikami naria isei bona mampololita Kareba Belo si komi, bona mi-pawia nuanu to tado nolotu ei pade mamei ri Allatala to natuwu, topopajadi langi bo dunia pade tasi bo sumawee isina. 16 Ri tempo ngkoulu Allatala nopalambaka manusia natuwu nantutu sore-sore dota dodo-ra. 17 Agiana tado nikalingani-Na nambei pampetonondi nancambelai koro-Na ante nowia nuanu to nabelo. Niwei-Na komi uda lako ri langi pade ulia ntana ri tempona. Niweika-Na komi kondia pade nampakasana rara-mi.” 18 Noudamo iwee lolita nu suro-suro ee nakaja-dapa motolawani tou-tou ee mojuju tinuwu si sira.
19 Tou-tou to Yahudi narata lako ri ngata Antiokhia ri ngamba Pisidia pade lako ri ngata Ikonium, noasui tou dea ri ngata Listra nangkajadika tou dea ee nopasambira ante isira. Niwunu-ra i Paulus ante watu, naopu ee nidisi-ra ri sawaliku nu ngata ee. Nipekiri-ra i Paulus ei namate-yamo. 20 Agiana bula nu tou-tou neparisaya isee nokongkore nantikusi-ya, nembangu-yamo pade nesua nculi ri ngata ee. Kaneilena neongko-yamo ri Derbe noroa-roa ante i Barnabas.
Nanculi ri ngata Antiokhia ri propinsi Siria
21 Ri ngata Derbe, i Paulus pade i Barnabas nampololita Kareba Belo ee pade nadea tou najadi neparisaya si Yesus. Naopu ee nanculi-ramo ri ngata Listra, ri ngata Ikonium, pade ri ngata Antiokhia ri ngamba Pisidia. 22 Ri ngata-ngata ee nipakaroso-ramo rara nu topantutu i Yesus pade nodederi topantutu ee bona matatapu pamparisaya-ra i Yesus. Nangulimo suro-suro si sira: “Ikita kana mangkolo madea kapepaa, maopu eeda pade mesua-tada ri Poparentaa nu Allatala.” 23 Pade ri butu dua todea ee i Paulus pade i Barnabas no'ongko topangkeni-topangkeni ri todea nu Allatala ee. Pade ante nosambaya bo napuasa, niwei-ramo topangkeni-topangkeni ee si Pue to niparisaya-ra ee. 24 Naopu ee i Paulus pade i Barnabas nopapola polumakoa-ra nampaliu ngamba Pisidia pade narata ri propinsi Pamfilia. 25 Pade kaopu-ra nampololita lolita nu Allatala ri ngata Perga, nalou-ramo ri ngata Atalia. 26 Lako isee nokapala ntasi mpanculi-ramo nalou ri ngata Antiokhia. Iseemo impia i Paulus bo i Barnabas nisambayani nu todea nu Allatala bona najagai dodo-ra nu Allatala mantutu towe rara-Na, ri rara pobagoa-ra to nipakaopu-ramo. 27 Karata-ra ri ngata Antiokhia, nipasintobu-ramo tou-tou lako ri todea nu Allatala ee, pade nampololita sumawee to nipowiamo nu Allatala to nipobago-ra. Nilolita mbii-ramo beiwa Allatala nantudoka-ra dala bona tou-tou to tado to Yahudi mamparisaya i Yesus. 28 Ri ngata ee i Paulus pade i Barnabas nasae neari ante tou-tou neparisaya.