I Yakobus namate - i Petrus nipakabebasi lako ri tarungku
12
1 Ri tempo ee mbii nopamulamo Mbagou Herodesa noduasi basangkia dua todea nu Allatala. 2 Nitudu-namo tou mopatesi i Yakobus, sarara ni Yohanes ante taono. 3 Pangkalio ni Herodes nuanu nipowia-na ee nampakasana rara nu tou-tou to Yahudi, nipowia mbii-namo nuanu to nasimbei ewa ee, nitudu-namo tou mosoko i Petrus. Nuanu ee najadi ri tempo nu susa Eo Bete Roti To Tado Noragi. 4 Nisokopa i Petrus, nipasua-yamo ri rara nu tarungku. Aopo ntaguna surodado nitudu mojaga i Petrus isee. Butu ntagunana aopo surodado. Maopu-pa posusa Eo Bete Paskahb, pade mopamula-da i Herodes motangara i Petrus ri ngayo nu tou dea. 5 Pade nitahangimo i Petrus ri rara ntarungku, agiana todea nu Allatala nosambayani oa i Petrus ante rara mpuu-mpuu-ra si Pue. 6 Kawengina, sintou tadopa nitangara ni Herodes i Petrus ri ngayo nu tou dea, i Petrus naleta riolo nu rodua surodado pade nitaka ante rongkou rante nikanta ante rodua surodado ee. Ri wombo nu tarungku, surodado-surodado ntani mbii-na nojaga tarungku. 7 Ncamole-mole malaeka ni Pue nokongkore isee pade naria pewanta newanta ri rara ngkamara nu tarungku ee. Malaeka ee notaroi i Petrus, pade nelikemo i Petrus. Nanguli malaeka ee: “He, magasi-ko membangu!” Bulawee ee mbii naloncumo rante ase lako ri pale ni Petrus. 8 Naopu ee nangulimo malaeka ee: “Pasuamo powaru-mu pade ondomo potaka sapatu-mu!” Pade nipasua-namo powaru-na pade nipou-namo sapatu-na. Pade nanguli mbiimo malaeka ee: “Pasuamo powaru ndoe-mu pade tutu-kumo!” 9 Pade nitutumo ni Petrus malaeka ee nesuwu lako ri rara ntarungku. Agiana i Petrus tado nanoto rarana bakote nuanu nipowia nu malaeka ee mpuu-mpuu najadi. Nipekiri ni Petrus nuanu ee kawule pekalio ngkolana-da. 10 Tempo-ra nampaliu pojagaa paramulana pade karongkouna, narata-ramo ri wombo ase, to mantotorou ri ngata. Wombo ee nateungke dodo, nesuwu-ramo pade nolumako nantutu dala kodi. Ncamole-mole malaeka ee nampaleisi i Petrus. 11 Naopu ee-da pade nanotomo rara ni Petrus nuapa najadi ri koro-na, pade nanguli-yamo: “Bulawee ei nincani-kumo nakono mpuu-da i Pue nantudu malaeka-Na nampakabebasi-ku lako ri kakuasa ni Herodes pade lako ri sumawee ngila-ngaya to kana napowia nu to Yahudi si yaku.” 12 Nanotopa rara-na, naloumo i Petrus ri sou ni Maria, tina ni Yohanes to nikasangai mbii i Markus. Isee nadea tou nosintobu pade nosambaya. 13 Nikadomo ni Petrus wombo, pade sadua batua bangkele to nisanga i Rode nalou nangkalio bayema to nokado wombo. 14 Kalolou nincani-namo wotu ni Petrus. Apa nikeni nu donu rara-na, tadomo niungke-na wombo ee, agiana nagasi-gasi-yamo nesua mpanculi, pade niulikaka-namo tou-tou isee bakote i Petrus naria ri sawalikuna. 15 Niuli-ra ri bangkele ee: “Nagilako.” Agiana i Rode nanguli oa mpuu-mpuu i Petrus-da edouri. Pade nanguli-ramo: “Malaeka nu Allatala to nojagai i Petrus ngkola-da etu”. 16 Bula-ra nombebili, i Petrus nokado oa wombo. Poungke-ra wombo, nikalio-ra i Petrus mpuu-da, namoleara-ramo. 17 Agiana i Petrus norae ante pale-na bona marodo-ra, naopu ee nipatuntu-namo beiwa i Pue nangkeni mpesuwu-ya lako ri rara ntarungku. Pade nanguli-yamo: “Mi-uli kareba ei si Yakobus pade ri tou-tou to neparisaya ntani-na.” Naopu ee nipaleisi-ramo ni Petrus lako ri pearia ee pade nalou ri pearia ntanina. 18 Sangkabaa kaneilena nagulinggamo surodado-surodado ee see. Naingu mpuu-ra nancambelai nuapa to najadi si Petrus. 19 Pade nitudumo ni Herodes tou malou mangonco i Petrus, agiana tado nirata-ra i Petrus. Pade niparentamo ni Herodes bona surodado-surodado ee rapekutana maopu ee rapatesi-ramo. Naopu ee nalou-mo i Herodes lako ri ngamba Yudea pade neari basangkia kasaena ri ngata Kaisarea.I Herodes namate
20 Nasodo mpuu i Herodes ri to Tirus pade to Sidon. Eemo sabana pade nosangkani-ramo nalou nampotomuka i Herodes. Paramulana niudeude-ramo i Blastus, topokakamu sou bete mbagou Herodes, nangkajadika ia namposambira-ra. Naopu ee nalou-ramo nampotomuka i Herodes pade nerapi mosingkabelo, apaa ngamba pearia-ra nancarumaka pangkondi lako ri ngamba poparentaa ni Herodes. 21 Sauatu eo to nipakatatapu, i Herodes nopasua powaru kambagoua-na pade noncunda-yamo ri kadera kambagouaa, pade nopamula-yamo nololita ri ngayo nu todea. 22 Todea to namparonge lolita ee nongare-ngare: “Ei wotu nu tobaraka tado wotu nu manusia!” 23 Apaa i Herodes tado nampabila Allatala, tempo ee mbii malaeka ni Pue nosuku-ya ante dala namate nikondi nu kalindoro.
I Barnabas pade i Saulus nitudu