I Petrus notanggujawa nancambelai pobaptis-na i Kornelius
11
1 Suro-suro pade tou-tou neparisaya ri sumawee ngamba Yudea namparonge ande tou-tou to tado to Yahudi mbii nantarimamo lolita nu Allatala. 2 Karata ni Petrus ri Yerusalem, tou-tou to Yahudi to neparisaya ee, nampomasala i Petrus. 3 Nanguli-ra: “Nuapa pade nalou-ko ri sou nu tou-tou to tado to Yahudi? Nangkondi mbiipa-ko ante isira.” 4 Eemo sabana i Petrus nopanotosi sumaweena si sira nuapa najadi lako ri paramulana. Nanguli i Petrus: 5 “Ranca-ku nosambaya ri ngata Yope, naria sangaya nuanu nikalio-ku. Nikalio-ku naria nuanu ewa bua nawea niulu lako ri langi, nateloe ri aopo ncunona, pade neuntu ri siawe-ku. 6 Tempo-ku nangkalio ri rarana, nikalio-ku binata-binata nopaa aopo, binata-binata neila, binata-binata nendolo pade tonci-tonci neila. 7 Pade nironge-ku wotu nanguli si yaku: Petrus, pokongkore-ko. Sambalemo pade kondimo. 8 Agiana nisonoi-ku: Tado, Pue. Sabana tadopa naria nikondi-ku kondia nipopali pade narumu. 9 Agiana nanguli mbiimo wotu ee lako ri langi: ‘Nuapa to nipakatatapumo nu Allatala mamala-da rakondi nemo mupopali.’ 10 Tolu ngkani nikalio-ku nuanu ee, pade kaopuana sumaweena nateongko nculi ri langi. 11 Tempo ee mbii totolu tou lako ri Kaisarea to nitudu mamei si yaku, narata ri sou pearia-ku. 12 Pade Inosa Gasa nantudu-ku malou ante isira ante tado morandua rara. Tou aono to neparisaya ei mbii nantutu-ku nalou ri Kaisarea, pade sumawee-ka nesua ri rara ncou ni Kornelius. 13 Naopu ee i Kornelius nopatuntu si kami beiwa-ya nangkalio sadua malaeka nokongkore ri sou-na pade nanguli: Tudu-mo tou malou ri ngata Yope mampokio i Simon to nisanga mbii i Petrus. 14 Ia kana manguli si-ko kareba to kana mampakasalama-ko ante sumawee tou ri rara ncou-mu. 15 Tempo-ku nomulei nololita, ncamole-mole nasompo-mo Inosa Gasa si sira, nasimbei ewa to najadi si kita impia ri paramulana. 16 Pade nitora-kumo, naria niuli ni Pue: I Yohanes nebaptis ante ue, agiana ikomi rabaptis ante Inosa Gasa. 17 Natantumo Allatala mbii nambei rasi-Na ri tou-tou to tado to Yahudi ee, nasimbei ewa to niweika-Nata ri tempo-ta namparisaya i Pue Yesus Kristus. Eemo sabana, tado mamala-ku motagi Allatala.”18 Namparonge popanotosi ni Petrus nancambelai nuanu ee, tou to Yahudi to neparisaya tadomo nesapuaka-ra. Pade niune-ramo Allatala. Niuli-ra: “Ande iweetu, tou-tou to tado to Yahudi mbii niwei nu Allatala loga bona mancoro lako jeko-jeko-ra pade mamparata tuwu liu-liu.”
I Barnabas pade i Saulus nalou ri ngata Antiokhia
19 Nipatesipa i Stefanus, tou-tou to namparisayamo i Yesus nopamula-ramo niduasi, nangkajadika nosimpogara-ramo riumba-umba. Naria narata ri ngamba Fenesia, ri lewuto Siprus pade ri ngata Antiokhia. Nipololita-ramo kareba belo lako ri Allatala ri tou-tou to Yahudi ngkola. 20 Agiana lako riolo nu tou-tou neparisaya ee, naria basangkia dua to narata lako ri lewuto Siprus pade ngata Kirene, nalou ri ngata Antiokhia pade nampololita kareba belo nancambelai i Pue Yesus ee ri tou-tou to tado to Yahudi mbii. 21 Kuasa ni Pue naria si sira nangkajadika nadea tou najadi neparisaya pade nambei koro-ra si Pue.
22 Kareba nancambelai tou-tou to neparisaya ee narata mbii ri todea ri Yerusalem. Pade nitudu-ramo i Barnabas nalou ri ngata Antiokhia. 23 Karata ni Barnabas radou, pade nikalio-napa beiwa Allatala nantiroi tou-tou ee, nadonu mpuu-ya. Pade nidederi-naramo bona mpuu-mpuu matundu si Pue ante kaponu nu rara. 24 I Barnabas ei tou nabelo rarana pade nikuasai nu Inosa Gasa, pade mpuu-mpuu namparisaya i Pue, nangkajadika nadea tou nantutu i Pue.
25 Naopu ee i Barnabas nalou ri ngata Tarsus nangonco i Saulus. 26 Notomu-yapa ante i Saulus, nikeni-namo i Saulus nalou ri ngata Antiokhia pade rarana sampae-ra notobu ante todea radou, pade nopatuduki lako tou dea. Ri ngata Antiokhia eemo tou-tou to namparisaya i Yesus nopamula nikasangai to Karasitee.
27 Ri tempo ee naria basangkia dua nabi narata lako ri ngata Yerusalem namei ri ngata Antiokhia. 28 Riolona ee naria sadua to nisanga i Agabus. Ante kuasa nu Inosa Gasa nanguli-yamo, ri sumawee dunia ei kana majadi sauatu tempona orompei. Pade nuanu ee najadi mpuu ri tempo nu Mbagou Bete Klaudius noparenta. 29 Pade sumawee topantutu i Yesus ee nopasaongu wotu mopakatu pengawa ri tou-tou to neparisaya to neari ri ngamba Yudea, mambei nantutu sore-sore pakulea-ra. 30 Sumawee pengawa-ra ee nitobu, pade nitudumo i Barnabas bo i Saulus mangkeni pengawa ee ri topangkeni-topangkeni todea nu Allatala.