I Petrus pade i Kornelius
10
1 Ri ngata Kaisarea naria sadua baleilo to nisanga i Kornelius. Ia ei sadua tadulako Romawi to nokapalani saatu surodado to nikasangai “Surodado Italia.” 2 I Kornelius ei tado to Yahudi, agiana ia bo sumawee to ri rara ncou-na naeka pade nenomba ri Allatala. Ia mbii nadea nantulungi tou-tou to Yahudi to netowei, pade ia nosambaya oa ri Allatala. 3 Sauatu eo rapa-rapana tinti tolu kinowia ri rara pekalio ni Kornelius, nikalio-na sadua malaeka nu Allatala narata pade nampokio-ya: “Kornelius!” 4 Nipenotomo ni Kornelius malaeka ee ante eka-na pade nanguli: “Nuapa-da tuama?” Nesono malaeka ee: “Sambayamu pade kadoli nu rara-mu nantulungi tou-tou to netowei nitarimamo nu Allatala pade nitora-dako nu Allatala. 5 Bulawee ei tudumo tou malou ri ngata Yope mampokio i Simon to nisanga mbii i Petrus. 6 Ia ee neari ri sou nu topouwe kuli nu binata to nisanga i Simon, to natida ri soso ntalinti.” 7 Naloupa malaeka to nololita ante i Kornelius ee, nipokiomo ni Kornelius rodua batua-na pade sadua surodado-na to namporoa oa-ya, to naeka ri Allatala. 8 Nipatuntumo ni Kornelius si sira nuapa to najadi, pade nituduna-ramo malou ri ngata Yope.9 Kaneilena, ranca-ra nolumako pade mapara marata ri ngata Yope, rapa-rapana tinti sampulurongu tongo eo, nembuamo i Petrus ri wumbu nu sou malou mosambaya. 10 Naopu ee naoro mpuu-yamo pade madota mangkondi. Bula nu kondia nipasadia, ri rara nu pangkalioa-na naria nuanu nikalio-na. 11 Nikalio-na langi nogaa pade nuanu ewa bua nawea niulu ri dunia, nateloe ri aopo ncunona. 12 Ri rarana naria ngila ngaya nu binata nopaa aopo, sumawee ngaya nu binata nendolo pade tonci-tonci neila. 13 Pade naria wotu nanguli si-ya: “Petrus, pokongkore-ko! Sambalemo pade kondimo!” 14 Nesono i Petrus: “Tado, Pue! Sabana tadopa naria-ku nangkondi nuapa-pa to nipopali ba nuanu narumu.” 15 Agiana nanguli mbiimo wotu ee si Petrus: “Nuapa to nipakatatapu nu Allatala mamala rakondi nemo mu-popali.” 16 Nuanu nikalio ni Petrus ee najadi oa duuna tolu ngkani, ncamole-mole nateongkomo bua ee ri langi.
17 Naingumo i Petrus nampekiri nuapa batua nuanu to nikalio-na ee see. Ranca ni Petrus nampekiri oa-dapa, tou-tou to nitudu ni Kornelius narata-ramo ri sou ni Simon pade nokongkore ri ngayo nu wombo-ramo. 18 Nipokio-ramo tou pade nepekutana: “Naria torata neari isei, to nisanga i Simon to nikasangai mbii i Petrus?”
19 Ranca ni Petrus nampesimbukui oa madota manguncani batua nuanu nikalio-na ee, Inosa Gasa nanguli si-ya: “He Petrus, naria tou totolu nangonco-ko. 20 Pokongkoremo-ko pade pesompomo-ko ri lempena nemo morandua rara-mu mantutu-ra, sabana Yaku-da to nantudu-ra.” 21 Pade nesompomo i Petrus ri lempena, nangulikaka tou-tou ee: “Yakumo to nionco-mi. Nuapa-da paralou-mi namei?” 22 Nesono-ra: “Tadulako Kornelius nantudu-ka tumei. Ia sadua to nanoa pade naeka ri Allatala, bo nibila mpuu nu sumawee to Yahudi. Sadua malaeka nu Allatala nantudu-ya merapi-ko mamei ri sou-na bona na-ronge nuapa to mu'ulikaka-ya.” 23 Pade nipopesua-ramo ni Petrus bona masambengia isee.
Kaneilena nembangumo i Petrus pade nalou noroa-roa ante isira. Pade basangkia dua topeparisaya lako ri ngata Yope netutu mbii. 24 Saeo naliu lako ee narata-ramo ri ngata Kaisarea. Radou nipopea oa-ramo ni Kornelius ante sarara-na bo wega-wega singkale rara-na to nipembuaki-na. 25 Karata ni Petrus, naloumo i Kornelius nampotomuka-ya pade notumbukotu nenomba ri ngayo-na. 26 Agiana nipopokongkore nculi-ya ni Petrus, pade nanguli: “Pokongkoremo-ko! Yaku ei manusia mbii-kuda.” 27 Ranca nololita lako ante i Kornelius, nesua-ramo ri rara nu sou. Nikalio ni Petrus nadeamo tou notobu isee. 28 Pade nangulimo i Petrus si sira: “Sarara-sarara nincani dodomi-da bakote to Yahudi nitagi nu agama-ra mangkalouii ba mampogalo tou-tou to tado to Yahudi. Agiana nitudoka-kumo nu Allatala bakote yaku tado mamala mangulikaka tou narumu ri pangkalioa nu Allatala ba tado mamala mampogalo-ra. 29 Ee-mo sabana perapia-mu bona mamei-ku, tadomo nantomo rara-ku namei. Bulawee ei kupekutana-ko nuapa pade nipokiomu-ku?” 30 Nesono i Kornelius: “Aopo eo naliu rapa-rapana ewa jaa ei mbii, ranca-ku nosambaya ri sou, ncamole-mole naria sadua baleilo nokongkore ri ngayo-ku. Powaru nu tou ee nerangkila. 31 Nanguli-ya: Kornelius, nitarimamo nu Allatala sambaya-mu pade nitoraNa-da kadoli nu rara-mu nantulungi tou-tou to netowei. 32 Tudumo tou malou ri ngata Yope mampokio tou to nisanga i Simon to nisanga mbii i Petrus. Ia neari ri sou nu topouwe kuli nu binata to nisanga i Simon, sou ee ri soso ntalinti. 33 Eemo sabana pade nitudu-kumo tou magasi-gasi malou mampokio-ko. Pade iko nabelo mpuu-da rara-mu, namei-dako isei. Jaa ei ikami sumawee nosintobu isei ri ngayo nu Allatala bona mamparonge sumawee nuanu to nituduka-ko nu Allatala bona mu'uli si kami.”
34 Naopu ee nangulimo i Petrus: “Jaa ei nanoto mpuu-mpuumo rara-ku bakote sumawee tou nasimbei pura-da ri ngayo nu Allatala. 35 Tou to naeka ri Allatala pade nowia nuanu nakono, tou ee kana natarima nu Allatala, tado nipelisi-Na ba lako riumba tou ee. 36 Nincani dodo-mimo isi nu kareba to niparata nu Allatala ri to Israel. Kareba ee nampololita nancambelai posingkabelo nu manusia ante Allatala ri rara sanga ni Yesus Kristus, Pue nu sumawee tou. 37 Nincanimi-da nuapa to najadimo ri sumawee ngamba Yudea, nopamula lako ri ngamba Galilea naopu pebaptis to niparata pade nipowia ni Yohanes. 38 Nincani-mimo i Yesus to Nazaret ee nipelisi nu Allatala, niwei Inosa Gasa pade kuasa. Nincani mbii-mimo ri rara peporoasi nu Allatala, i Yesus ee nalou riumba-umba nowia nuanu nabelo pade nampakabelo sumawee tou to nipesua nu Mbagou Seta. 39 Ikami eimo tou-tou to nangkalio mata sumawee to nipowia ni Yesus ri tana Yudea pade ri Yerusalem. Noudamo iwee isira mbiimo to nopatesi-Ya ante nosalibkan-Ya. 40 Agiana ri eo katolu eona Allatala nopatuwu mpanculi i Yesus lako ri kamatea pade nampopesuwu-Ya ri manusia, 41 tado ri sumawee tou, aga si kami ngkola to nipelisimo nu Allatala nokoulu bona majadi sabi-sabiNa. Ikami nangkondi bo nanginu ante Ia, ri tempo-Na natuwu mpanculi lako ri kamatea. 42 Pade Ia nantudu-ka moparata Kareba Belo ee ri tou-tou pade mosabiti bakote Ia-mo to nipelisi nu Allatala mantangara tou-tou to natuwu-dapa pade tou-tou to namatemo. 43 Sumawee nabi-nabi nampololita nuanu nancambelai-Ya. Niuli-ra sumawee tou to neparisaya si Yesus, kana ra'ampungi jekona ante kakuasaa ni Yesus.”
44 Ranca ni Petrus nololita-dapa, nasompomo Inosa Gasa pade nokuasai sumawee tou to namparonge kareba ee. 45 Tou-tou to Yahudi to neparisaya si Yesus pade nantutu i Petrus lako ri ngata Yope, sumawee namoleara nangkalio Allatala nambei mbii Inosa Gasa-Na ri tou-tou to tado to Yahudi. 46 Sabana nironge-ra tou-tou ee nololita ante basa to lako ri Inosa Gasa ni Pue pade nangune Allatala. Pade nangulimo i Petrus: 47 “Tou-tou ee nantarimamo Inosa Gasa nasimbei ewa ikita, jadi tadomo maria tou to mamala mantagi-ka mobaptis-ra ante ue” 48 Pade nitudu-ramo ni Petrus rabaptis ri rara sanga ni Yesus Kristus. Naopu ee niperapi-ra bona i Petrus meari ante isira basangkia eo kasaena.