Papitu tou to nipelisi molayani topetowei
6
1 Topantutu-topantutu i Yesus nantambei oamo kadeana. Tempo ee tou-tou to Yahudi to nobasa Yunani, nokangua ri tou-tou poko to Yahudi. To nobasa Yunani ee nanguli: “Tobalu-tobalu riolo-ka tadopa namparata pengawa kaparaloua eo-eona to nibagi-bagi ri tou-tou.” 2 Ee-mo sabana, sampulu rodua suro-suro ee nopasintobu sumawee topetutu i Yesus pade nanguli si sira: “Tado nabelo ande ikami meuntu mampopowole lolita nu Allatala, apaa kawule mourusi kondia ngkola. 3 Etumo sabana sarara-sarara, agilouna pelisimo lako riolo-mi papitu tou to nincanika mpuu kabelo-na, napande pade nikuasai nu Inosa Gasa, to mamala ka-tudu mourusi nuanu ei, 4 bona mamala-ka mosambaya pade mampopowole lolita nu Allatala ngkola damo.”5 Sumawee tou nasituju ante pololita nu suro-suro ee. Pade nipelisi-ramo i Stefanus, sadua to namparisaya mpuu i Yesus pade nikuasai nu Inosa Gasa. Natepelisi mbii, i Filipus, i Prokhorus, i Nikanor, i Timon, i Parmenas, pade i Nikolaus lako ri Antiokhia. I Nikolaus ei tado to Yahudi agiana nesua agama Yahudi-yamo. 6 Tou papitu ee nikeni ri ngayo nu suro-suro, pade nosambayamo suro-suro ee ante nountu pale ri woo nu tou papitu ee, nerapi bona natiroi-ra ni Pue.
7 Iweemo, lolita lako ri Allatala nantambei nowole pade topantutu- topantutu i Yesus ri Yerusalem nantambei mbii kadeana. Pade nadea mbii tobalia-tobalia to Yahudi najadi neparisaya si Yesus.
Pamparei i Stefanus
8 I Stefanus nitiroi mpuu nu Allatala pade niweika kuasa, nangkajadika namalaya nowia kadupaa-kadupaa pade pampetonondi-pampetonondi riolo nu todea. 9 Agiana naria tou-tou to nangewa-ya, isira ei todea ri sou penombaa to nisanga Sou Penombaa Tou-tou Nabebasi.a Todea nu sou penombaa ee tou-tou to Yahudi lako ri Kirene pade Aleksandria. Isira ante tou-tou to Yahudi lako ri propinsi Kilikia pade Asia nombebili ante i Stefanus. 10 Agiana tado namala-ra nampabili nuapa to niuli ni Stefanus, apaa Inosa Gasa nambeikaka-ya kapandea nololita. 11 Ee-mo sabana tou to nombebili ante i Stefanus noasui basangkia dua tou bona manguli: “Nironge-ka tou ei nangkanene i Musa pade Allatala!” 12 Iweemo poasui-ra tou-tou, pade topangkeni-topangkeni to Yahudi, bo topande-topande ri Buku Taurat. Pade naloumo to nampombebilika i Stefanus ee nosoko-ya, naopu ee nikeni-ra ri ngayo nu Topotangara Agama. 13 Pade nikeni mbii-ra sabi-sabi to nanguli lolita-lolita to tado nakono nancambelai i Stefanus. Sabi-sabi ee nanguli: “Tou ei nangkanene oa Sou nu Allatala to nagasa pade nangkanene parenta taurat to nitulisi ni Musa. 14 Nirongeka-yamo nanguli, i Yesus lako ri Nazaret ee kana morobo Sou nu Allatala ei, pade mobali sumawee ada to nipasompo ni Musa si kita!” 15 Sumawee tou to noncunda ri rara Potangaraa Agama ee nangolole i Stefanus. Pade tempo ee lence ni Stefanus nikalio ewa lence nu malaeka nu Allatala.