I Petrus pade i Yohanes ri ngayo nu Topotangara Agama
4
1 Ranca ni Petrus pade i Yohanes nololita-dapa ante tou-tou ee, tobalia-tobalia to Yahudi pade tadulako nu topojaga-topojaga Sou nu Allatala ante to Sadukia namei si Petrus pade si Yohanes. 2 Isira ei nasodo mpuu apaa i Petrus bo i Yohanes nepatuduki pade nanguli ri tou-tou bakote i Yesus natuwu mpanculimo lako ri kamatea. Pade nuanu ee mopadupa tou namate kana matuwu mpanculi. 3 Pade nisoko-ramo suro rodua ee pade nopasua-ra ri rara tarungku. Apaa nadedimo, nangkajadika i Petrus pade i Yohanes nitahangi isee duuna kaneilena. 4 Agiana tou-tou to namparongemo pepatuduki nu suro-suro ee najadi neparisaya, nangkajadika nantambei kadea-ra duuna rapa-rapana lima njobu.5 Kaneilena tobalia-tobalia to Yahudi, topangkeni-topangkeni to Yahudi pade topande-topande ri Buku Taurat notobu ri Yerusalem. 6 Isira ei notomu ante Tobalia Bete i Hanas, bo i Kayafas, i Yohanes, i Aleksander, pade sumawee tou ntanina to najadi sarara nu tobalia bete ee. 7 I Petrus pade i Yohanes nikeni ri ngayo-ra, pade nepekutana-ramo: “Beiwa dalana ikomi nampopolumako topungku ee? Ante karosoa nuapa ba ante kuasa lako si yema komi nowia ee?” 8 I Petrus to nikuasai nu Inosa Gasa ee, nesono: “Tuama-tuama tobalia to Yahudi pade topangkeni-topangkeni to Yahudi! 9 Eo ei-ka nipekutana apaa nowia nuanu to nabelo nantulungi sadua topungku, apaa tuama-tuama madota manguncani beiwa dala kabelo nu tou ee. 10 Tuama-tuama sumawee kana manguncani pade sumawee to Israel mbii kana manguncani tou ei nokongkore ri ngayo-mi eo ei ante koro naroso, sabana kuasa lako si Yesus Kristus to Nazaret ee. Nisalibkan-mimo i Yesus ee, agiana nipatuwu mpanculi-Yamo nu Allatala. 11 I Yesus ei-mo to najadi patuju ri Buku Nagasa:
‘Watu to nitadiakamo nu basi, ikomi dodo eimo,
ntano najadi parawatumo.’
12 Kawule i Yesus ngkola to mamala mampakasalama tou. Sabana ri sumawee dunia ei tado naria tou ntani to nitudu nu Allatala mamei ri manusia to mamala mampakasalama-ta.”
13 Topotangara ee namoleara nangkalio kabia ni Petrus pade i Yohanes, apaa nincani-ra tou rodua ee aga tou-tou biasa to tado nosikola. Pade nanotomo rara-ra ande suro rodua ee tou-tou to pantutu i Yesus. 14 Agiana tado-mo namala-ra nanguli nuapa-pa nampabili i Petrus bo i Yohanes, apaa nikalio-ra tou to nipakabelo ee nokongkore ri siawe ni Petrus bo i Yohanes. 15 Pade nitudu-ramo suro rodua ee mesuwu lako ri rara nu sou potangaraa, naopu ee nolibu-ramo. 16 Nanguli-ra: “Nuapa to kana ta-powia ri tou-tou ee? Sumawee tou to natida ri Yerusalem nanguncanimo kadupaa bete ei to nipowia nu tou rodua ee. Tado mamala tasapu ee. 17 Agiana bona nuanu ei nemo mantambei powoleana riolo nu tou-tou, agina ta-garataa tou rodua ee bona nemo oa mamala-ra mampololitaka bayema-yema ante mangkasangai sanga ni Yesus.” 18 Pade nipokio-ramo suro rodua ee mesuaki nculi, pade nantagi-ra nemo oa mangkasangai ba mepatuduki ante sanga ni Yesus. 19 Agiana nesono i Petrus pade i Yohanes: “Pekiri dodomo nuapa to nakono ri ngayo nu Allatala, mantutu parenta-mida ba mantutu parenta nu Allatala-da. 20 Sabana ikami tado mamala meuntu mampololita mancambelai nuapa to nikalio-ka pade nironge-ka.” 21 Topotangara ee tado namparata namo sangayaa dala bona mamala-ra mosuku i Petrus pade i Yohanes sabana sumawee tou nangune Allatala nangkalio kajadia ee. Nangkajadika nigarataa mpuu-mpuu-radamo suro rodua ee pade nopaloso-ra. 22 Tonapungku to nipakabelo ante kadupaa ee nelabi lako ri aopo mpulu mpaemo umuru-na.
Sambaya nu suro-suro ni Yesus
23 Nipalosopa i Petrus pade i Yohanes, nanculiki-ramo ri wega-wega-ra pade nampololita sumawee to niuli nu tobalia-tobalia ri matana pade topangkeni-topangkeni to Yahudi ee si sira. 24 Nirongepa nu wega-wega-ra nuanu ee, ante nosaongu rara noroa-roa-ramo nosambaya ri Allatala. Nanguli-ra: “Pue, Ikomo to nopajadi langi bo dunia pade tasi ante sumawee isina. 25 Ante Inosa-Mu to Nagasa nololitamo-Ko ri totua-ka, i Daud. Tempo ee i Daud nikuasai nu Inosa Gasa bona manguli:
‘Nuapa pade tou-tou to tado nanguncani i Pue, nasodo?
Nuapa pade tou-tou nowia liwo to tado nolotu?
26 Mbagou-mbagou ri dunia masasadia moiwali,
pade topangkeni-topangkeni mopasambira
mangewa i Pue pade Mbagou Topepakasalama to nitipa-Na.’
27 Sabana i Herodes pade i Pontius Pilatus nolibu ami-ramo ante tou-tou to tado to Israel pade ante tou-tou to Israel ri ngata ei. Isira ei nosintobu bona mangewa i Yesus Batua-Mu to nagasa ee, to nipelisi-Mumo najadi Mbagou Topepakasalama. 28 Agiana sumawee to nipowia-ra nampeponui nuanu to nipakatatapu-Mumo lako ngkoulu kana majadi, nantutu kakuasaa pade dota dodo-Mu. 29 Eo ei, Pue, kaliomo beiwa pogarataa-raka. Pade weikakamo batua-batua-Mu ei kabiaa bona mampopowole lolita-Mu. 30 Weimo petulungi-Mu bona tou nadua rapakabelo pade pampetonondi-pampetonondi bo kadupaa-kadupaa mamala najadi mantutu kakuasaa ni Yesus, Batua-Mu to nagasa ee.” 31 Naopu-rapa nosambaya, pearia nipotobui-ra ee nondui. Isira sumawee nikuasai nu Inosa Gasa, pade nopamula-ramo nololita ante nabia mpuu nancambelai lolita lako ri Allatala.
Dala ngkatuwu ntodea nu Allatala
32 Sumawee to neparisaya ee natuwu saongu rara bo saongu inosa. Tado naria saduaa-ra nanguli nuapa to naria si-ya, nuanu dodo-na. Sumawee nuapa to naria si sira, nipake sangkani-ra. 33 Ante kuasa nabete, suro-suro ee nosabiti katuwu mpanculi ni Pue Yesus. Pade isira sumawee nitiroi mpuu nu Allatala. 34 Pade tado naria saduaa lako riolo-ra nakapuncia banuapa-pa. Sabana yema to naria tana ba souna, nobalu tana ba souna ee, pade doi olina ee nikeni-ra, 35 niwei-ra ri suro-suro pade doi ee mbiipa nibagi-bagi ri butu dua tou to namparalou.