I Petrus nampopolumako topungku
3
1 Sauatu eo ri tinti tolu kinowiana, majungku tinti posambayaa, naloumo i Petrus pade i Yohanes ri karawaa Sou nu Allatala. 2 Isee ri wombo bete to nisanga “Wombo Belo”, naria sadua baleilo tonapungku lako niote. Butu eona tou ee nikeni isee bona merapi-rapi ri tou-tou to nesua ri karawaa Sou nu Allatala. 3 Pangkalio nu tou ee i Petrus pade i Yohanes kana mesua ri karawaa Sou nu Allatala, niperapimo nu tou ee banuapa-pa si sira. 4 Pade niolole-ramo tou ee, pade nangulimo i Petrus: “Kaliomo tumei!” 5 Pade niolole-ramo nu tou ee ante nancarumaka mamparata ba nuapa-pa lako si sira. 6 Agiana nanguli i Petrus: “Bulawa pade salaka tado naria si yaku, agiana nuapa to naria si yaku, kuweikaka-ko: Ante kuasa ni Yesus Kristus to Nazaret ee, pokongkore pade polumakomo!” 7 Pade nikakamumo ni Petrus pale ngkana topungku ee pade nantulungi-ya bona memata. Bulawee ee mbii paa nu tou ee pade dalina najadi naroso. 8 Naopu ee nengkawantu-yamo nokokongkore, pade nolumako welou-tumei. Nesua-yamo ri karawaa Sou nu Allatala noroa-roa ante i Petrus pade i Yohanes, nolumako pade nengkangkawantu pade nangune Allatala. 9 Sumawee tou nangkalio-ya nolumako pade nangune lako Allatala. 10 Pade nincani-ramo ia ee-mo to noncunda oa bo nerapi-rapi ri “Wombo Belo” ri Sou nu Allatala. Namoleara mpuu-ra pade nakioma nangkalio nuanu to najadi si-ya.Lolita ni Petrus ri Gandaria ni Salomo
11 Tou ee nantutu oa i Petrus pade i Yohanes. Pade tempo-ra totolu ee narata ri gandaria to nisanga Gandaria ni Salomo sumawee tou narata nantikusi-ra apaa namoleara. 12 Pangkalio ni Petrus tou-tou ee, nanguli-yamo si sira: “He tou-tou to Israel, nuapa pade namoleara komi ante kajadia ei? Nuapa pade niolole oa-mika? Niuli-mi ikomi tou ei namala nolumako apaa naria kuasa si kami ba apaa ikami ei natundu ri Allatala? 13 Allatala to nipenombai nu totua-ta i Abraham, i Ishak, pade i Yakub, Allatala ee nampemabosemo batua-Na, eemo i Yesus. I Yesus eemo to niwei-mi bona rapatesi, pade nipesapuka ri ngayo ni Pilatus, bo ee i Pilatus madota mopaloso-Ya. 14 Ia-mo to nagasa pade nanoa, agiana nipesapukami-Yada pade nerapi si Pilatus bona mopalosoka komi topepatesi. 15 Ikomimo to nopatesi-Ya, bo ee Ia-mo puu ngkatuwua nu sumawee tou. Agiana nipatuwu mpanculi-Yamo nu Allatala lako ri kamatea. Ikami dodomo to nangkalio mata nuanu ee. 16 Ikomi dodomo nangkalio pade nosabiti nuapa to najadi ri topungku ei. Najadi naroso-yamo apaa ia namparisaya i Yesus pade kuasa-Na. Sabana namparisaya i Yesus nangkajadika tou ei nabelo-yamo ri ngayo-mi sumawee.
17 Sarara-sarara! Nincani-kumo nuapa to nipowia-mi pade nuapa nipowia nu topangkeni-topangkeni-mi si Yesus, nuanu ee nipowia-mi apaa tado ninca-mi nuapa to nipowia-mi. 18 Agiana ante sumawee ee najadimo nuapa to niuli nu Allatala lako ngkoulu ri lolita nu nabi-nabi-Na, nanguli Mbagou Topepakasalama to nitipa-Na ee kana mangkolo kapepaa. 19 Etumo sabana sarara-sarara, pancoromo komi lako ri jeko-jeko-mi pade pegoli nculimo ri Allatala bona Nagempu jeko-jeko-mi. 20 Pade i Pue kana marata si komi pade ikomi kana mamparasai kasanaa nu rara. Pade i Pue kana mantudu i Yesus marata si komi, apaa Ia-mo to nipakatatapu nu Allatala majadi Mbagou Tomampakasalama komi. 21 Ia kana matida ri suruga duuna Allatala mampowia sumaweena mabou ewa to niuli nu Allatala ri lolita nu nabi-nabi-Na ri tempo ngkoulu. 22 Naria niuli ni Musa: ‘Allatala Pue-mi kana mantuduka komi sadua nabi nasimbei ewa yaku lako ri sarara-sarara dodo-mi to Israel. Ikomi kana mamparonge sumawee to niuli nu nabi ee si komi. 23 Tou to tado nampeirara nuapa to niuli nu nabi ee, tou ee kana rapopangkosu lako ri todea nu Allatala pade rapatesi.’ 24 Nabi-nabi to nariamo noparata lolita lako ri Allatala, nopamula lako si nabi Samuel pade nabi-nabi ntanina to narata mopuri, sumaweena nampololitamo nancambelai tempo ei. 25 Potipa-potipa lako ri Allatala to niparata nu nabi-nabi ee niparata si komi-da. Ri rara mpotipa to nipowia nu Allatala ante totua-mi, Allatala nanguli si Abraham ewa ei, ‘Lako ri mulia-mu kana Ku-tiroi sumawee tou ri dunia.’ Potipa ee niwei si komi mbii-da. 26 Etumo sabana Allatala nampelisi batua-Na, pade nantudu-Ya mokoulu mamei si komi, bona Ia mampatiroi komi. Dala-Na metiroi ee mowia komi sadua-sadua mancoro pade megoli lako ri dala ngkatuwu-mi to nadaa.”