Pentakosta
2
1 Naratapa Eo Pentakostaa, sumawee tou to namparisaya i Yesus notobu ri saongu sou. 2 Ncamole-mole nirongemo wotu lako ri langi ewa pewuru nu ngolu mpamburu. Sou to niposundai nu tou-tou ee sumawee naponu ante wotu ee. 3 Naopu ee nikalio-ramo dila-dila ewa katuwu nu apu nendoa riumba-umba pade nabutu-ra nipeuntuina. 4 Isira sumawee nikuasai nu Inosa Gasa, pade nopamula-ramo nololita ante ngila ngaya nu basa ntanina. Isira ei nololita nantutu nuapa to niweika-ra nu Inosa Gasa ee bona rauli-ra.5 Ri tempo ee tou-tou to Yahudi, lako ri sumawee ngata ri dunia, neari ri Yerusalem. Isira ei tou-tou to natundu ri Allatala. 6 Namparonge wotu ewa pewuru nu ngolu mpamburu ee, nadea mpuu tou narata notobu. Sumawee-ra nabatoro namparonge tou-tou to neparisaya ee nololita ri rara nu basa-ra. 7 Ante namoleara pade naingu, nanguli-ramo: “Apa tado to Galilea pura tou-tou to nololita ei? 8 Beiwa kajadiana pade nironge-ta nololita-ra ante basa lako ri butu-butu ngata kodi-ta? 9 Ikita ei to Partia, Media, Elam, lako ri Mesopotamia, Yudea pade Kapadokia, Pontus pade Asia, 10 lako ri Frigia pade Pamfilia, lako ri ngamba Mesir pade ngamba-ngamba Libia najungku Kirene, naria mbii-ta ei to narata lako ri Roma, 11 naria to Yahudi, pade tou-tou lako ri ngata ntani to nesua agama Yahudi-ramo, naria mbii tou lako ri Kreta pade Arab. Sumawee-ta ei namparonge-ra nololita ante basa nu ngata kodi-ta mboto nanguli parabuata-parabuata bete to nipowia nu Allatala!” 12 Namoleara mpuu-ra bo naingu pade nombepekutana: “Nuapa batuana ei?” 13 Agiana naria mbii tou-tou nangkanene suro-suro ee. Nanguli-ra: “Tou-tou ei nalangu ngkola-rada ei!”
Pololita ni Petrus
14 Naopu ee nokongkoremo i Petrus ante sampulu sadua suro ntanina ee, pade ante wotu narimboso-ya nangulikaka tou dea ee: “Sarara-sarara, sumawee to Yahudi pade sumawee to peari ri Yerusalem! Ronge pakabelo-belo, apaa nuanu ei paralou kupanotosi si komi. 15 Tou-tou ei tado nalangu, ewa to niuli-mi etu, apaa tinti sasio sangkabaa-dapa ei. 16 Agiana nuanu ei niulimo nu Allatala si nabi Yo'el:
17 Allatala nololita, ‘Kana majadi ri eo-eo kaopuana
Yaku kana mopasompo Inosa-Ku ri sumawee tou.
Ana-ana-mu baleilo pade ana-ana-mu bangkele kana moparata lolita-Ku.
Kabilasa-kabilasa-mu kana mangkalio nuanu to nipopakalioka-Ku si sira.
Totua-totua-mu kana mampopangipi pangipi to niwei-Ku si sira.
18 Ri batua-batuaKu baleilo pade bangkele mbii kana Ku-pasompo Inosa-Ku ri eo-eo ee.
Isira kana moparata lolita-Ku.
19 Pade kana Ku-powia nuanu madupa ri wumbuna, ri langi
pade pampetonondi-pampetonondi ri undena, ri dunia:
kana maria raa pade apu pade sogu nu rambu.
20 Eo kana majadi madedi mbongo,
wula kana majadi malei ewa raa
ri tempo tadopa marata Eo ni Pue, eo bete to tado maria simbeina ee.
21 Ri tempo ee, yema to mampokio i Pue kana rapakasalama.’
22 Sarara-sarara tou-tou ri Israel! Ronge nuapa niuli-ku ei: I Yesus to Nazaret eemo to nitudu nu Allatala mamei si komi. Nuanu ee nanoto mpuu nikalio ri pampetonondi-pampetonondi pade kadupaa-kadupaa to nipowia ni Yesus ante kuasa nu Allatala ri tongo-tongo-mi. Sumaweena ee nincani dodo-mimo. 23 Nantutu liwo dodo nu Allatala, niwei-Namo i Yesus si komi. Pade niwei-Yapa, i komi nopatesi-Ya ante nampalambaka tou-tou daa nosalibkan-Ya. 24 Agiana Allatala nampakabebasi-Ya lako ri kapepaa bo kamatea pade nopatuwu mpanculi-Ya lako riolo nu tou-tou namate, sabana tado mamala-Ya nakuasai oa nu kamatea. 25 Nancambelai i Yesus ei nariamo nipololita ni Daud,
‘Nikalio-ku i Pue ri ngayo oa ku;
Ia namposiawe-ku, bona tado mogue rara-ku.
26 Eemo sabana rara-ku nadonu mpuu,
wiwi-ku nanguli lolita peune:
pade woto-ku mbii naroo apaa niwei-Mumo pancarumakaa si yaku.
27 Sabana tado nipalambaka-Mu wao-ku naboli ri rara pearia ntomate
Tado nipalambaka-Mu bata nu Batua-Mu to nagasa ei maroga.
28 NitudokaMu-kumo dala malou ri katuwua.
Kadonu-ku neliu-liu mpuu apaa Iko namporoasi-ku.’
29 Sarara-sarara, yaku mamala mololita si komi ante kakono-konona nancambelai i Daud, tuama nu tumpu-ta. Namate-yamo pade nitana, pade dayo ni Daud naria-dapa riolo-ta duuna eo ei. 30 Notipamo Allatala si Daud, ante sumpa, bakote maria sadua mulina kana naongko nu Allatala majadi mbagou. Apaa i Daud nincani-nada potipa ee pade ia mbii nabi-yada, 31 nincani-na nuapa to napowia nu Allatala. Jadi noawili-yamo nanguli Mbagou Topepakasalama to nitipa nu Allatala kana matuwu mpanculi lako ri kamatea. Nanguli i Daud:
‘Ia tado nipalambaka matida ri pearia nu tomate;
bata-Na tado maroga.’
32 I Yesus eimo to nipatuwu mpanculi nu Allatala lako ri kamatea. Ikami sumawee nangkalio mata nuanu ee. 33 Ia niongko ri posundaa to nibila mbira ri ngkana nu Allatala, pade Ia mbii nantarimamo Inosa Gasa to nitipa nu Tuama. Pade to nironge bo nikaliomi eo ei Inosa ee-mo to nipasompo-Na si kami. 34 I Daud dodo tado nateongko ri suruga, agiana i Daud nanguli:
I Pue Allatala nanguli si Pue-ku:
35 ‘Poncundamo mbira ri ngkana-Ku
duu-na Kupowia bali-bali-Mu matundu si-Ko!’
36 Etumo sabana sumawee to Israel kana manguncani mpuu-mpuu bakote i Yesus to nisalibkan-mi ee, Ia mbiimo to niongko nu Allatala najadi Pue pade Mbagou Topepakasalama!”
37 Pamparonge nu tou-tou ee nuanu ee, nentuumo rara-ra, pade nipekutana-ramo i Petrus ante suro-suro ntanina: “Sarara-sarara, nuapa to kana ka-powia?” 38 Nesono i Petrus: “Pancoromo komi lako ri jeko-jeko-mi, pade ikomi sadua-sadua rabaptis ri rara sanga ni Yesus Kristus bona ra'ampungi jeko-jeko-mi. Mangkajadika ikomi kana mantarima Inosa Gasa. 39 Sabana to nitipa nu Allatala ee raweika-ko pade ri mulia-mu pade ri tou-tou to natida ri kakawaosana, sumawee tou to nipokio ni Pue Allatala-ta mamei si-Ya.”
40 Pade ante nadea mbii lolita ntani ni Petrus nambeika-ra posabiti pade nopatuduki-ra. Nanguli-ya: “Weimo koro-mu rapakasalama bona tado mambela suku ewa tou-tou nadaa ei.”
Dala ngkatuwu to peparisaya paramulana
41 Tou-tou to namparisaya nuapa to niuli ni Petrus ee, nibaptis-ramo, nangkajadika kadea nu to peparisaya eo ee nantambei mbiimo rapa-rapana tolu njobu kadeana. 42 Ante rara mpuu-ra neguru lako ri suro-suro pade nosintobu nosangkani oa. Nangkondi-ra nosangkani, notibe-tibe roti nantora i Pue Yesus pade nosambaya nosangkani.
43 Nadea mpuu kadupaa pade pampetonondi to nipowia nu suro-suro ee nangkajadika sumawee tou nakioma pade naeka. 44 Sumawee tou neparisaya ee nasintuwu oa pade nuapa to naria si sira, nipake sangkani-ra. 45 Nobalu dagana-dagana pade gagu-ra, pade nampobagi doina riolo-ra nantutu kaparalouaa-ra mboto. 46 Butu eona-ra notobu oa ante nosaongu rara ri karawaa Sou nu Allatala. Isira notibe-tibe roti pade nangkondi nosangkani, nombesawa sancou-sancou ante donu rara pade ante doli rara. 47 Isira nangune oa Allatala pade nipobelo nu sumawee tou. Butu eona i Pue notambei kadea nu tou to nipakasalama.