Tutura Nancambelai
Suro-Suro ni Pue Yesus
Inosa Gasa nitipa
1
1 Teofilus to nibila:Ri rara buku-ku paramulana, nitulisi-kumo sumawee to nipowia pade nipepatudukii ni Yesus lako popamula pobago-Na, 2 duuna narata eo kateongkoa-Na ri suruga. Tadopa nateongko-Ya nalou ri suruga, niwei-Namo parenta ri suro-suro to nipelisi-Na ante kakuasaa Inosa Gasa. 3 Namate-Yapa, rarana aopo mpulu eo naoso-Ya nampopesuwu koro-Na ri suro-suro ee. Nadea mbii kadupaa to nipopakalio-Na si sira bona raparisaya-ra bakote nakono mpuu-Yada natuwu mpanculi. Tempo ee suro-suro ee nangkalio-Ya, pade nipololitaka-Nara nancambelai Poparenta nu Allatala majadi Mbagou.
4 Pade ranca-Na nangkondi noroa-roa ante suro-suro ee, niweiNa-ramo parenta: “Nemo mangkosu komi lako ri Yerusalem. Popea isee duuna nawei nu Allatala, Tuama-Ku nuapa to nitipa-Na, to niuli-Ku si komi impia. 5 Sabana i Yohanes nebaptis ante ue, agiana tadomo masae ikomi kana rabaptis ante Inosa Gasa.”
I Yesus nateongko ri suruga
6 Ranca nu suro-suro ee nosintobu ante i Yesus, nipekutana-ra Ya-mo: “Pue, tempo eimo-Ko mampopokongkore nculi poparentaa to Israel?”a 7 Nesono i Yesus: “Tuama-Kuda dodo to mampakatantu eo pade tempona. Nuanu ee tadomo mi-ncani, apaa ee kuasa nu Tuama-da. 8 Agiana ikomi kana mantarima kuasa, tempo Inosa Gasa masompo si komi. Pade ikomi kana majadi sabi-sabi-Ku ri ngata Yerusalem, ri sumawee ngamba Yudea bo Samaria, pade duuna marata ri wuntu nu dunia.”
9 Naopu-pa i Yesus nololita ewa ee, nateongko-Yamo ri suruga nikalio mata-ra, pade gawu nobungu-Ya nangkajadika tadomo nanoto pekalio-ra. 10 Bula-ra nantingara langi ranca ni Yesus nateongko ee, ncamole-mole nokongkoremo rodua to nowaru nabula ri siawe-ra, 11 pade nangulikaka-ra: “He, tou-tou to Galilea, nuapa pade nokongkore nantingara langi komi? I Yesus to nikalio-mi nateongko nalou ri suruga ri ngayo-mi etu, Ia kana mesompo ewa ee mbii ngoni.”
Suro-suro notobu bona mosambaya
12 Naopu ee nanculimo suro-suro ee lako ri Bulu Zaitun nalou ri ngata Yerusalem. Bulu ee rapa-rapana sakilo kawaona lako ri Yerusalem. 13 Narata-ra ri Yerusalem nalou-ramo ri sou pearia-ra, pade nembua ri kamara ri wumbuna. Suro-suro ee, i Petrus pade i Yohanes, i Yakobus pade i Andreas, i Filipus pade i Tomas, i Bartolomeus pade i Matius, i Yakobus ana ni Alfeus, pade i Simon to Zelotb pade i Yudas ana ni Yakobus. 14 Sumawee-ra nosaongu rara oa notobu nosambaya. Isira nosambaya noroa ante basangkia dua bangkele, pade i Maria tina ni Yesus, bo sarara-sarara ni Yesus mbii.
I Matias nipelisi mosambei i Yudas
15 Sauatu eo, nokongkoremo i Petrus ri tongo-tongo nu tou-tou to neparisaya to notobu ee, rapa-rapana maria saatu rompulu kadea-ra. Pade nanguli-yamo: 16 “Sarara-sarara! Nuapa to nitulisi ri rara Buku Nagasa, kana madupa. Impia naria lolita nu Inosa Gasa Allatala to niparata ni Daud nancambelai i Yudas, topangkeni tou-tou to nosoko i Yesus ee. 17 Impia i Yudas ei sadua to lako si kita, pade ia mbii nipelisi bona metutu mobago moroa-roa ante ikita.” 18 (I Yudas ei namparata-yamo popatanaa-ya to najadi tombo nu parabuata-na to nadaa. Ia nanawu mpotumpa pade namate, tei-na nabika nangkajadika sumawee isi rara-na nesuwu ri sawalikuna. 19 Sumawee tou to natida ri Yerusalem nanguncani pura nuanu ee. Etumo sabana ri rara nu basa-ra, nisanga-ramo tana ee “Hakal-Dama”, batuana Tana Raa.)
20 “Sabana naria nitulisi ri rara buku Mazmur ewa ei:
‘Palambakamo pearia-na makalinoa,
nemo maria saduaa tou meari ri rarana.’
‘Palambakamo posundaa-na na'ala nu tou ntani.’
21 Eemo sabana, kana maria sadua tou mancambei i Yudas, to rapelisi lako riolo nu tou-tou to namporoa oa-ta tempo ni Pue Yesus noroa ante ikita, 22 nopamula lako ri tempo ni Yesus nibaptis ni Yohanes duuna ri eo kateongkoa-Na ri suruga lako ri tongo-tongo-ta. Tou to nipelisi ee kana mantutu-ta majadi sabi bona manguli bakote i Pue Yesus natuwu mpanculimo lako ri kamatea.”
23 Pade tou-tou to naria isee notudo tou rodua, tou ee i Yusuf to nisanga mbii i Barsabas pade to nisanga mbii i Yustus, pade karoduana i Matias. 24 Nosambaya-ramo pura pade nanguli: “Pue, nincani-Muda rara nu sumawee tou, tudoka-kamo yema to Mu-pelisi lako ri tou rodua ei, 25 bona mobago majadi suro mancambei i Yudas. Apaa i Yudas nipawia-namo bago-na, nalou-yamo ri pearia to masipato na-pearii.” 26 Naopu ee niundimo sanga nu tou rodua ee, pade poundi ee nanawu si Matias. Jadi nipakatatapumo i Matias najadi suro bona metutu moroa-roa ante sampulu sadua suro ntanina.