Tito 2

Ya un palna-u ni Tito

¹ Manang ikaw, kay To', gayed palna-uwi ya manga mangintu-uway kun unu ya bet na maka-unawa sa matinaw na pagpangintu-u.

² Ya manga eseg na unud da ya ginawa, palna-uwi silan pada katagenan nilan ya kanilan ginawa aw madyaw ya dengeg nilan aw matadeng silan magdala sa kanilan pag-eya'. Aw paglonga na pakasaligen nilan ya kanilan pagpangintu-u aw to-o nilan ginawa͡an ya kanilan manga eped aw padelegen nilan ya pagpangintu-u pangkay unu ya un dumateng.

³ Maynan uman ya manga ka͡ubayan na unud da ya ginawa, palna-uwi silan sa kanilan bet na alag maka-unawa sa pagpangintu-u nilan sa Tyumanem. Alimbawa', dili' nilan paglongun ya makapagkalat sa dengeg na eped na utaw aw dili' silan mati-inem sa magpakalangulangu. Manang magpalna-u silan kun unu ya madyaw na makatutuk sa Tyumanem. ⁴ Yeiy ya imo-un nilan pada magagad nilan ya manga ka͡ubayan na mangud pa ya ginawa na un nilan ginawa͡an ya kanilan manga eseg aw manga mangayse', ⁵ aw matadeng silan uman magdala sa pag-eya' nilan aw pagkaka͡ubayan nilan, aw maseb silan di balay, aw madyaw ya kanilan bet adti kadég na utaw, aw ka͡agadan nilan ya kanilan manga eseg. Aw kun maynan ya bet nilan, dili' kasampetan na malat ya tingeg na Tyumanem na pigpalna-u kanilan.

⁶ Maynan uman ya manga eseg na mangud pa ya ginawa, to-o silan paglonga na pakadyawun nilan ya pagdala sa kanilan pag-eya'. ⁷ Aw ikaw, kay Tito, magpadeleg kaw ma-imo' pundinganan sa madyaw dun ni kadég na pigpan-imo' mu. Aw yanagaw kita-en na mag-unawa ya palna-u mu aw ya pig-imo' mu, aw kita-en uman na pigbasa͡an mu ya tingeg na Tyumanem na pigpalna-u mu. ⁸ Aw pakatanawan mu ya kanmu paglong pagaw dili' matulid aw pagaw pasala-en, pada mamulamula ya utaw na magtanemtanem kanate' sa tingeg kay wala' ya indeganan nilan maglong kanate' sa malat.

⁹ Aw ya manga allang, palna-uwi silan na ka͡agadan nilan ya tagtun kanilan aw makatutuk silan sa tagtun kanilan dun ni kadég na imo-unun nilan. Dili' silan magtubagtubag ¹⁰ aw dili' silan magpangamang sa manga pametang na tagtun kanilan, manang magpakita' na to-o silan kasaligan. Maynini ya bet nilan pada kaliman na manga utaw dawaten ya palna-u tadun sa kanaten Magpaluwa-ay na yan ya Tyumanem.

¹¹ Yeiy alag ya palna-u mu, asuntu na kyabukasan da ya kallat na Tyumanem adti kadég na utaw na un silan paluwa-en. ¹² Aw magi sa kanan kallat, pigpalna-uwan nan kitadun na talikudan tadun ya pangkay unu na dili' makatutuk kanan aw ya pagkaliman na pagka-utawun tadun. Pigpalna-u nan kanaten ya katadeng sa pagdala sa kanaten pag-eya', aw ya pag-imo' sa matulid adti anenganeng nan, aw ya pagdalug sa bet na Tyumanem talana pa tadun asini tas na lupa'. ¹³ Yeiy ya pig-imo' tadun talana tyagadan ya to-o madyaw na allaw na pig-iman tadun na un pakita' ya kalalamdag na katulus na kanaten Tyumanem aw Magpaluwa-ay na si Jisus Kristu. ¹⁴ Pig-atag nan ya kanan lawas na un patayen kalyu kanaten pada magpaluwa' kanaten sa pag-allang na manga sala' aw maglinis kanaten na un ma-imo' kanan manga utaw na to-o matibulluk sa imo-unun na madyaw.

¹⁵ Na, palna-u mu ya kadég yeiy adti manga utaw na nyangintu-u. To-o mu silan paglongun magi sa kanmu katundanan na imo-un nilan ya kadég yeiy, aw tulida ya manga utaw na dili' malin dumalug sa palna-u ini. Dili' mu tumbay ya pangkay singalan na palipaslipasan nilan ya palna-u mu.