Tito 3

¹ Gayed pa-anenganengan sa manga mangintu-uway na ka͡agadan nilan ya manga migdumala kanilan aw kadég na awun katundanan lekat adti gubilno aw magtuman sa sugu' nilan. Pa-anenganengan uman kanilan na maksay silan magtabang sa pangkay unu na madyaw na imo-unun, ² aw dili' nilan pagkasampetan na malat ya pangkay singalan, aw dili' mag-ayil-ayil adti kanilan eped manang pakalunayen ya kanilan ginawa, aw gayed silan magpadalem.

³ Kay kitadun uman, idtu na muna, wala' tadun kalabeti ya kana Tyumanem aw wala' tadun ka͡agadi ya manga sugu' nan: Pigpasuway kitadun aw pig-allang na pangkay unu na pagkaliman na pagka-utawun tadun. Yan olo' ya gayed tadun pag-anenganengen ya magpakalat sa manga eped na utaw, aw mig-inga-inga-ay ya kadég tadun aw dun da migkakalatay kitadun sa ginawa. ⁴ Manang ya Tyumanem na kanaten Magpaluwa-ay pigbukasan da nan kanaten ya kanan kallat aw ya kadakula' na ginawa nan. ⁵ Aw pigpaluwa' kitadun nan lekat adti pagpa-emel-emel nan, beke' na asuntu sa mangkadyaw na pig-imo' tadun manang asuntu baling sa kallat nan. Aw ya pagpaluwa' nan kanaten, magi saba sa paglinis kanaten na Ispiritu na Tyumanem aw pagbagu nan sa ginawa tadun. ⁶ Ya Ispiritu yeiy pig-asag na Tyumanem kanaten magi kan Jisus Kristu na Magpaluwa-ay tadun ⁷ pada dawaten kitadun na Tyumanem siling na wala' ya sala' tadun, kay dakula' ya kallat nan. Aw asuntu sa pagdawat nan kanaten, awun pig-iman tadun na un tadun tagtunun ya bagi' na pigpakang nan kanaten na yan ya ginawa na wala' ya tyamanan. ⁸ Alag matinaw ya pigsulat ku ini, aw umba' tadun saligan. Yanagaw magpakabulut kaw magpalna-u adti manga utaw na nyangintu-u la sa Tyumanem, pada to-o silan magkaseb sa kadég na mangkadyaw na imo-unun. Ya palna-u yeiy alag madyaw aw dakula' ya ma-untung na kadég na utaw.

⁹ Manang magpakawat kaw sa manga utaw na magpanugbuk sa ayil na wala' ya un makamang aw manga Judiyu na gayed mig-imo-imo' sa kasampetanen sa muna utaw nilan. Dili' kaw magpasambuk sa pag-ayil nilan, dala ya ayil sa uldin na manga Judiyu, kay wala' ya guna na maynan aw wala' ya un na utaw ma-untung dun. ¹⁰ Aw kun awun utaw dun ni kamayu na magpabélét sa anenganeng na manga mangintu-uway aw yanagaw dili' da magsambuk ya ginawa nilan, pagsagda͡an baling ya utaw yan. Kun dili' sakanan tumeneng sa pig-imo' nan, pagsagda͡an uman. Aw kun kenne' pa nan imo-un, yan ya indeganan na dili' da kamu magpasambuk kanan, ¹¹ kay kya-ede-an da mu na tengteng nyabaluk da ya kanan anenganeng aw dun ni pig-imo' nan nyakasala' sakanan adti Tyumanem. Aw kun kya-ede-an nan ya kanan sala' manang dili' malim magselsel, yan ya migmatinaw na umba' sakanan pa-emel-emelen na Tyumanem.

Ya moli na pamene' ni Pablo kan Tito

¹² Na, dili' madugay sugu-un ku adti kanmu ya sambuk na inulug ta, kun beke' ni Artémas, si Tikiko. Pagdateng nan, pagtibagseg kaw manaw pada maksay kita magkita' adti syudad na Nikapolis, kay pigbaya-an ku na yan galu ya un ku eya-an dun ni manga bulan na maniki' ya samet.

¹³ Na, si Apolos aw ya abugadu na si Zénas, tibagsegan mu ya pagtabang kanilan sa pagpanaw nilan aw sambata ya kadég na kapelekan nilan. ¹⁴ Aw palna-uwan ya kadég na mangintu-uway na magkaseb silan aw matibulluk dun ni mangkadyaw na imo-unun, pada mabatug nilan ya pagtabang sa manga utaw na migkapelek. Kay wala' ya guna na pagpangintu-u na utaw kun wala' ya bunga na madyaw.

¹⁵ Ya kadég na eped ku idi nyangumusta kanmu. Aw pangumusta͡an beg kami uman sa manga eped mu na mangintu-uway na gyuminawa kanami.

Gayed awun ni kadég mayu ya kadyawan ni Jisus Kristu.