Ya Kadwa na Sulat ni Apostol Pablo adti kan Timotiyo
Ya Muna Pagpa-ede'
Kanu ya kadwa na pagsulat ni Pablo kan Timotiyo?
Adti seled na Biblia tadun, madég ya pigsulat ni Pablo adti manga utaw. Manang ya kadwa na sulat nan adti kan Timotiyo, yan da ya tengteng na kamoliyan na sulat nan.
Sa kadwa na pagpakalabusu kan Pablo adti syudad na Roma, wala' da sakanan pakaliku' adti syudad na Épéso, yanagaw pigsulatan pa nan uman si Timotiyo. Yan gya ya bulan na pagsulat nan ya Siptimbri kun Oktobri na umay na 67 na malapit da ya pagpatay kanan asuntu sa sugu' na Impirador na si Néro. Kay dun ni Roma, dakula' ya pagpamulayam ni Néro sa manga nyangintu-u kan Kristu.
Na, ini ya du-an nan na pigpamulayaman ni Néro ya manga mangintu-uway: Dun ni bulan na Agusto na 64 nyasangab ya syudad na Roma, aw nyabus da galu nyangkasangab ya kadég na balay. Aw yan ya anenganeng na manga taga Roma na si Néro ya sala' kay kaliman nan tullukan na bagu na syudad, aw nyadaman ya manga utaw kanan. Yanagaw nyaninaw si Néro sa partido na un nan pasala-en sa pagsangab sa syudad. Na, kaliman ni Néro pagsimba͡en sakanan na manga utaw siling na tyumanem nilan, yanagaw asuntu na wala' pagsimba kanan ya manga mangintu-uway kan Kristu, silan baling ya pigpasala' nan, aw madég kanilan ya pigpapatay nan dala si Pédro.
Unu ya du-an na pigsulatan salut ni Pablo si Timotiyo?
Asuntu na malat na pamulayam sa manga mangintu-uway aw manga maggagagaday kanilan, yanagaw madég kanilan ya mig-ayaw sa pagpangintu-u kan Kristu kay nyallek silan aw migkatalaw. Miglong si Pablo kan Timotiyo na dili' sakanan magsuwayenen lekat adti matinaw na palna-u kan Kristu pangkay awun kalugan. Yanagaw ya kadwa na pagsulat nan kan Timotiyo kasiling na nyamalintugun da, aw yan ya du-an nan na maksay ni Pablo pigpakadtu si Timotiyo ni sayid nan kay un da sakanan patayen.
Wan ya kya-agiyan ni Timotiyo?
Na, pangkay dakula' ya kalugan dun ni dalem na pagdumala ni Néro aw migti-is ya madég na manga mangintu-uway, manang nyabekkal pa ya madyaw na ubat-ubat kan Kristu adti kadakula' na banwa aw gayed pigtuman ni Timotiyo ya manga sugu' ni Pablo kanan.
Na, pagdateng na umay na 68 pig-atuwan na madég na utaw ya pagdumala ni Néro, aw tyumuyu' sakanan sa bulan na Junyo. Yanagaw alinde' da ya pamulayam. Migpadeleg si Timotiyo miggagad sa manga mangintu-uway dun ni syudad na Épéso, aw wala' kadugay, dyumateng adti sayid nan si Juan ya sambuk na apostol na un tumabang sa imo-unun na Tyumanem. Dyumateng si Timotiyo adti sobla kawaluwan ya umay nan, aw gayed pa sakanan miggagad sa manga nyangintu-u kan Kristu taman na allaw na pagkamatay nan.