6
1 Awun uman pamene' ku sa manga allang na nyangintu-u. To-o nilan basa͡an ya tagtun kanilan, pada wala' ya indeganan na eped na utaw maglong sa malatay adti ngalan na Tyumanem aw adti palna-u kan Kristu.2 Aw kun ya allang aw ya tagtun kanan alag silan mangintu-uway, beke' yan na indeganan na pabaya-an na allang ya pigtaligu kanan. Manang to-o pa nan baling dugangan ya kaseb nan aw to-o nan basa͡an ya tagtun kanan. Kay mangintu-uway saba ya utaw na ka-untungan sa talabahu nan aw alag silan pigginawa͡an na Tyumanem. Palna-u mu yeiy adti manga utaw aw dasiga silan na dumalug sa palna-u yeiy.
Ya pagpalna-u sa galu' aw ya pagkaybeg sa kuwalta
3 Na, awun manga utaw na migpalna-u sa sangkamulu' aw wala' tande' sa pamene' yeiy, pangkay ya pamene' yeiy alag saba lyumekat adti kan Jisus Kristu na tagtun kanaten aw yeiy ya indeganan na pagdalug tadun sa kana Tyumanem. 4 Manang wala' nilan kalabeti. Kaliman nilan olo' magpalibantug sa pagka-utawun nilan. Aw yan ya to-o nilan pigginawa͡an ya pagbalawbalaw sa wala' ya guna aw ya pag-ayil sa kakawasan na manga tingeg. Aw yan ya syampetan nan, mig-inga-inga-ay ya manga utaw na migpakanyeg kanilan, aw wala' da pagsambuk ya anenganeng na manga utaw, aw pigkalat nilan baling ya dengeg na manga eped nilan, aw gayed silan migbabintangay. 5 Aw wala' ya katantanan na ayil na manga utaw kay nyabaluk ya anenganeng nilan aw nyalagak da adti kanilan ya matinaw na palna-u. Iman nilan aw ya pagdalug nilan sa relihiyon dakula' ya un makuwalta nilan. 6 Manang beke' na maynan! Dakula' saba ya un ma-untung adti pagdalug tadun sa kana Tyumanem, manang yan olo' ya ka-untungan ya utaw na magleya sa tin tagbi' na nyatagtun nan. 7 Kay wala' ya dyala tadun sa kanaten pagka͡utaw asini tas na lupa', aw wala' uman ya madala ta sa kanaten pagkamatay. 8 Yanagaw kun awun pagkanen tadun aw awun tin kadégkadég tadun, dili' da tadun betang adti ginawa ta na gayed pa dugangan.
9 Na, ya pagdalug na manga utaw sa kuwalta, yan ya makapabuyu' kanilan, aw dili' nilan imanmanen kalitagan silan dun ni imo-unun na wala' ya guna, aw dalugun nilan ya pagkaliman na pagka-utawun nilan. Aw ya pagkaybeg nilan sa kuwalta siling na batu na pigbangget adti siki nilan aw uluga adti dagat, aw dun da pagkalat baling ya pagpakabetang nilan. 10 Kay ya pagginawa sa kuwalta, yan ya lyekatan sa kadég na punganan na malatay. Awun eped saba na manga utaw na gayed nyanguwalta aw yan ya nyakapasuway kanilan adti pagpangintu-u, aw madég ya migkalat na anenganeng nilan.
Ya pagpakadyaw ni Timotiyo sa pigtaligu kanan
11 Manang ikaw, kay Timotiyo, asuntu na pigtaliguwan kaw na Tyumanem sa imo-unun nan, pagpa-awat kaw sa manga utaw na nyaybeg sa kuwalta aw pagpa-awat kaw sa imo-unun nilan na malatay. Aw yan baling ya dalugun mu ya pagkaliman na Tyumanem. Silingan mu ya kanan bet aw pakasaligen mu ya pagpangintu-u mu kanan. Ginawa͡an mu ya Tyumanem aw manga eped mu, aw pakalunaya ya bet mu adti kanilan. Aw pangkay kun dumateng ya kalugan, pagpadeleg kaw. 12 Siling kaw na utaw na mig-abay sa palaguy. Tibulluka ya kanmu anenganeng adti pagpangintu-u mu, aw to-o awidi ya dyawat mu adti Tyumanem na yan ya ginawa na wala' ya tyamanan. Kay pigpamalli' kaw nan, aw madég ya utaw na nyakasistigus sa tingeg mu aw pagpangintu-u mu.
13 Sugu-un ta kaw asini asdangan na Tyumanem na yan ya nyatag sa ginawa adti kadég, aw asini uman ni asdangan ni Kristu Jisus na yan ya migmatinaw sa pagka-utawun nan adti kan Ponsyo Pilato.* 14 Aw ini la ya sugu' ku na tumanen mu: Pakadyawa ya pagpalna-u mu aw dili' mu pagdali-an na galu' taman na allaw na pagliku' na tagtun kanaten na si Jisus Kristu. 15 Kay un sakanan bukasan na Tyumanem dun ni allaw na umba' adti anenganeng nan. Aw ya Tyumanem yan ya to-o deyen aw yan ya magdumala sa kadég. Yan ya maghari' sa kadég na manga hari' aw yan ya Pangulu sa kadég na manga pangulu. 16 Dili' sakanan magkamatay. Aw ya pag-eya-an nan to-o malalamdag aw dili' mabatug na utaw palapitan. Wala' ya kyumita' kanan, kay dili' sakanan pagkita-en. Yan ya to-o tadun basa͡an, aw wala' ya katantanan na katulus na pagdumala nan. Yan saba ya matinaw. Amén.
Ya pamene' adti manga mangintu-uway na mayaman
17 Na, pamene-an mu ya manga mayaman aw makabatug na dili' silan magpatastas aw dili' nilan saligan ya kanilan kuwalta aw manga ka-unan, kay dili' nilan imanmanen na malagak ya kadég yeiy. Manang yan baling ya saligan ya Tyumanem kay yan ya magsambat sa kadég na kapelekan tadun pada magleya kitadun. 18 Pamene-an mu silan na imo-un nilan ya madyaw, aw gayed magtabang sa manga utaw, aw magkanimbet silan aw dili' magdemet sa kuwalta nilan. 19 Kun maynan ya pig-imo' nilan, liwan na migluduk silan sa ka-unan adti tas na langit, aw yanagaw tagtunun nilan ya tengteng ginawa na yan ya ginawa na wala' ya tyamanan.
Ya moli na pamene' ni Pablo kan Timotiyo
20 Kay Timotiyo, pakatanawan mu ya kadég na pigtaligu kanmu na Tyumanem. Dili' kaw magsambuk sa balawbalaw na wala' ya guna aw manga utaw na mig-ampang sa matinaw na palna-u. Kay piglong nilan na kya-ede-an nilan kunu ya tengteng matinaw manang galu-un silan. 21 Kay awun eped na manga utaw na migpakanyeg kanilan aw migkabuluy da baling lekat adti pagpangintu-u kan Kristu.
Na, awun ni kamayu ya kadyawan na Tyumanem.