Ya Kadwa na Sulat ni Pablo
adti manga mangintu-uway dun ni
syudad na Téssalonika
Ya Pagpa-ede'
Ya syudad na Téssalonika
Ya Téssalonika yan ya ulu asini muna na probinsiya na Macédonya, na alag pigsakup na manga taga syudad na Roma.
Madyaw ya pagpakabetang na Téssalonika kay awun ni dulug na dagat aw madyaw ya dunggu-anan nan sa manga barko. Aw ya syudad pig-agiyan uman na dakula' na dalan na pigngalanan na Via Égnatia, na yan ya sambuk na dalan na pag-agiyan ni Pablo aw manga eped nan. Madég ya dalan dun ni Téssalonika na lyumos adti eped na manga banwa. Asuntu séiy, awun madég na négosiyanti dun aw madég ya mayaman na utaw.
Ya kadég na manga utaw na nyeya' adti Téssalonika dengan na manga allaw ni Pablo, manga duwanggatus ka malalan. Madég kanilan utaw na Grigo aw manga taga Roma. Madég uman ya manga Judiyu, aw yanagaw awun sinagoga dun ni syudad na yan ya katipunanan na manga Judiyu na pagsimba͡an nilan sa Tyumanem.
Ya manga mangintu-uway adti Téssalonika
Kyadtuwan ni Pablo ya Téssalonika dun ni kadwa na pagpanaw nan lekat adti Antiyokiya, eped nan si Silas aw si Timotiyo. Mabasa adti kapitulu 17 na Buhat na yan ya Manga Pigpan-imo' na Manga Apostolés. Talana nilan adti Téssalonika, makatlu si Pablo pag-ubat-ubat adti sinagoga dun ni Allaw na Paglagdeng, aw migpakanyeg kanan ya eped na manga Judiyu dala uman ya manga Héntil na nyaka-akup kanilan. Dili' tadun ka-ede-an kun sangunu ya kadugay ni Pablo adti syudad, basi sambulan olo'. Manang madég ya nyangintu-u kan Kristu asuntu sa pagpalna-u ni Pablo aw si Silas, beke' olo' na adti sinagoga, manang adtu uman ni manga Héntil na négosiyanti na pigkilala nilan adti manga bantukanan aw adti manga tindahan aw imo-anan nilan. Kay yan ya talabahu ni Pablo ya mag-imo' sa layaglayag na manggad pada awun kakamangan nan. Aw dun ni pig-imo' nan, nyakaselat si Pablo migpa-ede' sa madyaw na ubat-ubat kan Kristu aw yanagaw nyabekkal da adti manga Héntil.
Na, wala' kadugay si Pablo pigkalatan na ginawa na eped na manga Judiyu. Pigpantipun nilan ya manga utaw na malat ya bet aw migpampanuyu' silan adti syudad. Yanagaw maksay san Pablo nyanaw adti lunsud na Bériya, aw tigkas yan adti Aténas, aw tigkas yan adti syudad na Corinto. Manang migpatagak si Silas aw si Timotiyo adti Bériya. Talana ni Pablo adti Aténas, migtanaw kanan si Timotiyo manang pigpaliku' ni Pablo adti Téssalonika na un pakabagsegen ya pagpangintu-u na manga bagu na mangintu-uway, kay nyaypeng si Pablo kanilan. Aw pagdateng ni Pablo adti Corinto, kyadtuwan sakanan ni Silas aw si Timotiyo, aw pig-ubat nilan kanan ya manga mangintu-uway adti probinsiya na Macédonya na migkasalig da ya pagpangintu-u nilan pangkay awun madég na kakalugan nilan. Yanagaw migkagān ya ginawa ni Pablo aw dun nilan sulata ya tagna' na sulat adti manga mangintu-uway na awun ni Téssalonika. Aw pigsulat nilan uman ya kadwa na sulat talana pa ni Pablo adti Corinto. Yan ya umay na 50 taman adti 52.
Ya tud na duwa ya sulat adti Téssalonika
Asuntu na nyalaguy si Pablo aw manga eped nan lekat adti Téssalonika, tagbi' olo' ya selat nilan magpalna-u sa manga utaw kan Kristu. Yanagaw ya tud na tagna' na sulat, yan ya magpakabagseg sa pagpangintu-u na manga utaw dala ya manga Héntil na bagu mig-ayaw sa manga tyumanem nilan na galu'. Gayed uman ya eped na manga Judiyu migtanemtanem sa malat kan Pablo aw pigpakalug nilan ya manga mangintu-uway. Yanagaw pigpalna-uwan silan ni Pablo dun ni sulat nan kun unu ya un ma-imo' adti kamoliyan na allaw sa pagliku' ni Jisus, aw unu ya pagpakabetang dun ni allaw yan na manga utaw na nyangintu-u kan Kristu. Pigpamene-an nan silan uman kun unun nilan ya pagdala sa pag-eya' nilan.
Maynan uman ya tud na kadwa na sulat. Pigsadsadan to-o ni Pablo kun unu ya un ma-imo' adti manga moli na allaw. Kay iman na manga utaw aw dyumateng da ya allaw na pagliku' ni Jisus, asuntu sa palna-u na galu' na eped na utaw. Yanagaw migpa-ede' si Pablo kanilan na wala' pa dateng, aw dili' silan uman magkallek manang magpadeleg baling silan mangintu-u sa kadég na pigpalna-u kanilan ni Pablo aw manga eped nan.