Ya Tagna' na Sulat ni Pablo
adti manga mangintu-uway dun ni
syudad na Téssalonika
1
1 Kay manga inulug na nyangintu-u la dun ni syudad na Téssalonika, kami si Pablo aw si Silas aw si Timotiyo un magpadala sa sulat ini adti kamayu na gayed migkatipun dun ni ngalan na Tyumanem ya kanaten Ama aw si Jisus Kristu ya kanaten pangulu.
Padatengen galu na Tyumanem kamayu ya kanan kadyawan aw kalinaw.
Ya pagpangintu-u na manga mangintu-uway dun ni Téssalonika
2 Gayed nami pigpasalamatan ya Tyumanem asuntu sa kadég mayu, aw pigngalanan kamu nami dun ni kanami panawagtawag. 3 Gayed kamu nami pigpasalamatan adti kanaten Ama na Tyumanem, kay wala' nami kalingawi ya pagpangintu-u mayu aw ya kadakula' na ginawa mayu kanan aw ya pag-iman mayu sa pagliku' ni Jisus Kristu ya tagtun kanaten. Kay ya pagpangintu-u mayu aw ya kadakula' na ginawa mayu sa Tyumanem alag kyinita' dun ni manga imo-unun mayu, aw ya pag-iman mayu kan Jisus pigkita' dun ni pagpadeleg mayu sa pagpangintu-u pangkay awun kalugan. 4 Aw gayed nami uman pigpasalamatan ya Tyumanem kay kya-ede-an nami na pigpamalli' kamu nan, manga inulug na pigginawa͡an nan, 5 kay dyawat mayu ya madyaw na ubat-ubat kan Jisus na pigpa-ede' nami kamayu, aw wala' kamu pagduwaduwa, kay pigmatinaw na Ispiritu na Tyumanem magi sa katulus nan. Kyinita' mayu uman ya bunga na pagpangintu-u nami talana nami nyeya' adti sayid mayu, aw kya-ede-an mayu uman ya kadég na pigpan-imo' nami pada sa kamayu kadyawan.
6 Aw migsiling kamu kanami aw migsiling kamu uman kan Jisus na matas na pangulu tadun, aw pangkay to-o kamu pigpamulayaman na manga eped na utaw asuntu sa pagpangintu-u mayu, manang dakula' ya pagleya mayu dyumawat sa tingeg na Tyumanem, aw lekat adti Ispiritu nan ya kamayu pagleya. 7 Aw yanagaw nya-imo' da kamu pundinganan adti kadég na mangintu-uway dun ni probinsiya na Macédonya aw asini probinsiya na Akaya. 8 Kay migpalekat adti kamayu ya pagkabekkal sa madyaw na ubat-ubat kan Jisus adti kadakula' na duwa ya probinsiya yeiy, aw beke' nan olo', manang kya-ede-an uman adti kadég na eped na banwa ya pagpangintu-u mayu. Aw nya-imo' kamu pundinganan adti madég na mangintu-uway. Yanagaw unun nami ya pagdugang sa piglong da nilan? 9 Kay gayed nilan pigkasampetan ya pagdawat mayu kanami aw kun pig-unu mayu ya pag-ayaw sa manga tyumanem mayu na galu' aw yan da ya pigdalug mayu ya tengteng Tyumanem. 10 Pig-ubat nilan uman ya pagtagad mayu sa pagliku' na Ise' na Tyumanem lekat adti tas na langit na yan si Jisus na pigmataw na Tyumanem lekat adti pagkamatay nan, aw yan ya migpaluwa' kanaten lekat adti pagpa-emel-emel na Tyumanem adti kamoliyan na allaw.