Ya sulat ni Apostol Pablo adti manga mangintu-uway dun ni lunsud na Kolossas
Ya Muna Pagpa-ede'
Ayin ya lunsud na Kolossas?
Ya lunsud na Kolossas nyakabetang dun ni probinsiya na Asia adti dulug na tubig na Likus. Aw matas ya dengeg na Kolossas asuntu sa baligya-enen nilan na bulbul na karniro na pag-imo-un abul aw kadégkadég. To-o pagkaliman na manga utaw ya bulbul na mapula ya batek, aw yeiy ya du-an nan na pagka-agiyan ya lunsud na madég na utaw. Asini muna dakula' na lunsud ya Kolossas, manang dun ni manga allaw ni Pablo, dakula' pa dun ya manga lunsud na Laodiciya aw Hérapolis.
Pig-unu ya pagdateng na madyaw na ubat-ubat kan Kristu dun ni Kolossas?
Sa pag-eya' ni Pablo adti syudad na Épéso, madég ya utaw na pigpalna-uwan nan, aw sambuk kanilan si Épapras na taga Kolossas. Yanagaw, pag-uli' da ni Épapras, pigpa-ede' nan ya madyaw na ubat-ubat kan Kristu, aw nya-imo' sakanan maggagaday sa manga utaw na nyangintu-u la dun ni Kolossas. Awun manga Judiyu na nyeya' adti Kolossas, manang to-o pa madég ya manga Héntil na nyeya' dun, aw madég kanilan ya nyangintu-u. *
Kanu ya pagsulat ni Pablo?
Pigsulatan ni Pablo ya manga mangintu-uway dun ni lunsud na Kolossas kay wala' pa sakanan pakakadtu ni tampid nilan. Yan gya ya pagsulat nan ya umay na 60 talana nan tyumagad adti syudad na Roma na un usayan na Impirador na si Néro kay piglimanda sakanan na eped na manga Judiyu asuntu sa pag-ubat-ubat nan. Aw yan uman na umay ya pagsulat nan adti manga mangintu-uway na awun ni syudad na Épéso aw adti kan Pilimon.
Wan ya du-an na migsulat si Pablo?
Asuntu na awun migpalna-u sa galu' dun ni Kolossas, nyanaw si Épapras adti Roma kay un magsekat sa palna-u ni Pablo kun unu ya madyaw imo-un pada patenengen na eped na utaw ya pagpalna-u na galu'. Aw yanagaw pigsulatan ni Pablo ya manga mangintu-uway adti Kolossas. Aw yan ya lagas na pigsulat nan, na to-o matas si Kristu kay sa manga pigpaka tyumanem na manga Héntil. Yanagaw ya tengteng pigsulatan ni Pablo ya manga utaw na Héntil na nyangintu-u kan Kristu. Aw ya sulat yan, pigpakalintapun uman adti eped na manga katipunanan na manga mangintu-uway dun ni palibed na Kolossas dala ya manga manga lunsud na Laodiciya aw Hérapolis.