4
Ya eped na pamene' ni Pablo
1 Kay manga inulug ku na kanak pigginawa?an, dyumela aku kamayu kay madugay wala' kitadun pagkita'. To-o aku migleya kamayu, aw kamu saba ya pigpalibantug ku. Yanagaw, nyanginayu' aku kamayu na gayed pakasaligen ya kamayu pagpangintu-u kan Jisus.
2 Aw nyanginayu' aku uman kan Yodiya aw si Sintiki na magka-iyuli' silan kay alag silan syumambuk kan Jisus. 3 Aw awun sambuk kamayu na pigsaligan na un ku sekaten na magpatenga' sa duwa ya ka?ubayan yeiy. Du-an nan maseb silan migtabang kanak na un mabekkal ya madyaw na ubat-ubat kan Kristu, dala uman si Kl�m�nti aw kad�g na eped ku. Kay ya kanilan ngalan alag pigsulat adti listahan na Tyumanem sa manga utaw na pig-atagan da na ginawa na wala' ya tyamanan.
4 Pagleya kamu gayed asuntu na syumambuk da kamu kan Jisus. Salutun pa ku uman ya paglong kamayu na pagleya kamu! 5 Pakadyawa ya manga imo-unun mayu aw tingeg mayu na un imo-un pundinganan adti kad�g na utaw. Kay malapit da kanaten si Jisus. 6 Dili' kamu magkaypeng sa pangkay unu, aw dili' magkakamang ya ginawa mayu. Manang panawagtawagan mayu baling adti Tyumanem ya kadakula', aw pagsekat kamu sa tabang nan. Aw pasalamatan mayu sakanan. 7 Yanagaw, un atag na Tyumanem kamayu ya katinep na anenganeng. Aw ya katinep na anenganeng na lekat adti kanan dili' tadun mabatug kalabetan, manang yan ya magtameng sa ginawa aw anenganeng mayu kay syumambuk da kamu kan Kristu Jisus.
8 Na, kay manga inulug ku, yan ya gayed mayu anenganenga ya matinaw aw ya dili' pagsala-en aw ya matulid. Anenganenga mayu ya pangkay unu ya malinis na wala' ya dali', aw pangkay unu na to-o madyaw na umba' saya'. 9 Imo-a mayu ya kad�g na pigpalna-u ku kamayu. Aw silingi mayu ya kad�g na kyinita' mayu adi kanak. Aw ya Tyumanem na mig-atag sa katinep na anenganeng, gayed awun sakanan ni sayid mayu.
Ya pagpasalamat ni Pablo sa pig-atag kanan na manga utaw dun ni Pilipos
10 Dakula' to-o ya pagleya ku aw ya pagpasalamat ku adti Tyumanem kay kya-anenganengan aku mayu uman salut. Nya-ede' da aku na gayed kamu mig-anenganeng kanak manang wala' ya selat mayu tumabang kanake'. 11 Ya piglong ku yeiy beke' na asuntu sa kapelekan ku, kay kyanalaman da ku ya pangkay unu na pagpakabetang ku. 12 Pangkay malat aw pangkay madyaw, matadeng da aku magdala sa kanak pag-eya', pangkay kun dakula' ya kapelekan ku aw pangkay wala'. Kay kya-agiyan da ku ya pagkabiyag aw ya pagkagetem. 13 Mabatug ku ya kadakula' magi sa tabang ni Kristu kay yan ya magpakabagseg kanake'.
14 Manang madyaw beg ya tabang mayu kanaken dun ni kya-agiyan ku na manga kakalugan. 15 Aw kya-ede-an da mayu, manga inulug ku dun ni Pilipos, pangkay mad�g ya kasakupan na manga mangintu-uway, manang kamu olo' ya nyatag kanak sa kuwalta na nyakatabang kanak idtu na pagpalekat ku sa pagbekkal sa madyaw na ubat-ubat dun ni kamayu. Aw pangkay sa pag-indeg ku dun ni probinsiya na Mac�donya, aw pangkay ayin ya kyadtuwan ku, kenne' na pagtabang mayu kanak. 16 Aw pangkay adtu aku ni T�ssalonika, migpadeleg kamu migtabang kanak. Matag makapila kamu pagpadala kanak sa kuwalta. 17 Manang beke' na tud ku na magsekat pa uman sa tabang lekat adti kamayu, beke' yan. Yan saba ya kaliman ku na makadawat kamu uman sa kadyawan lekat adti Tyumanem na yan ya bunga na kanimbet mayu. 18 Manang pada ka-ede-an mayu, nyadawat da ku ya kadakula' na pigpadala mayu kanak. Wala' ya kapelek ku aw migsobla pa baling, kay alag da ini asuntu na dakula' ya pigpadala mayu kan �paprodito. To-o kyatutukan ya Tyumanem sa tabang mayu kanak, kay ya pagtabang mayu kasiling na dugsu' na manimbo' na pigdawat da nan. 19 Aw siling na pigsambat na Tyumanem ya kanak kapelekan magi kamayu, un pa nan uman sambaten ya kad�g na kapelekan mayu lekat adti kadakula-an na ka-unan nan asuntu na syumambuk da kamu kan Kristu Jisus. 20 Yanagaw naten patasen na wala' ya katigkasan ya dengeg na Tyumanem na yan ya kanaten Ama. Yan saba ya umba' imo-un.
21 Pangumusta?an kami sa kad�g na manga inulug na nyangintu-u kan Kristu Jisus. Kaliman na manga eped ku asini kataga?an kun manu la ya pagpakabetang na kad�g mayu. 22 Aw ya manga mangintu-uway asini Roma nyangumusta kamayu, labi la ya manga mangintu-uway dun ni ka-epedanan na Impirador.
23 Gayed awun ni kamayu ginawa ya kadyawan ni Jisus Kristu na pangulu tadun.