Kolossas 1

Ya sulat ni Apostol Pablo adti manga mangintu-uway dun ni lunsud na Kolossas

^1-2 Kay manga inulug nami na awun ni lunsud na Kolossas, kamu na kana Tyumanem manga utaw na nyatibulluk ya pagpangintu-u kan Kristu:

Aku si Pablo ya migsulat adti kamayu. Nya-imo' aku apostol ni Kristu Jisus kay yan saba ya pagbaya' na Tyumanem. Aw asini sayid ku si Timotiyo na inulug tadun.

Padatengen galu kamayu ya kadyawan aw kalinaw na lyumekat adti Tyumanem ya Ama tadun.

³ Kada pagpanawagtawag nami kamayu adti kanan, gayed nami pigpasalamatan ya Tyumanem na yan ya Ama na kanaten pangulu na si Jisus Kristu, ⁴ kay dyengeg nami ya pagpangintu-u mayu kan Kristu Jisus aw ya dakula' na ginawa mayu sa kadég na manga utaw na Tyumanem. ⁵ Aw yeiy alag lyumekat adti pag-iman mayu na awun saba bagi' na pigdayaw pa kamayu na Tyumanem adti tas na langit. Aw yeiy ya dyengeg da mayu idtu muna dun ni matinaw na palna-u, na yan ya madyaw na ubat-ubat kan Kristu ⁶ na dyumateng adti kamayu. Aw ya ubat-ubat yeiy nyabekkal da uman adti kadakula' na banwa aw madég ya manga utaw na nyabagu la ya anenganeng nilan. Maynan uman ya nya-imo' adti kamayu lekat na allaw na bagu mayu dyengeg ya ubat-ubat kan Kristu aw tengteng mayu kyalabetan ya kallat na Tyumanem. ⁷ Aw yeiy ya pigpalna-u kamayu ni Épapras na yan ya pigginawa͡an tadun na sugu-anen ni Kristu eped nami na nyatibulluk dun ni imo-unun na Tyumanem. Aw yanagaw pyakawun nami dun ni kamayu na yan ya syumayu kanami asuntu na kasaligan sakanan. ⁸ Aw yan ya migdandan kanami sa paggaginawa͡ay mayu. Aw ya paggaginawa͡ay yeiy pig-atag saba kamayu na Ispiritu na Tyumanem.

⁹ Yanagaw lekat pa na allaw na dyengeg nami ya kamayu pagpangintu-u, wala' kami teneng sa pagpanawagtawag kamayu adti Tyumanem. Gayed nami pigsekat na atagan kamu na katadeng na lyumekat adti kanan Ispiritu pada kalabetan mayu kun unu ya pagkaliman na Tyumanem aw dun da mayu ka-ede-i ya madyaw mayu imo-un. ¹⁰ Kay magi sa katadeng na Ispiritu nan, kasilingan mayu ya bet na kanaten Tyumanem aw makatutuk kamu kanan, aw magkadakula' ya kamayu pag-imo' sa madyaw adti manga eped, aw kadugangan pa kada allaw ya kya-ede-an mayu sa kana Tyumanem. ¹¹ Migsekat pa kami uman na to-o kamu nan pakabagsegen magi sa dakula' na katulus na pagka Tyumanem nan, pada gayed kamu magleya dun ni kamayu pagpadeleg sa pagpangintu-u mayu pangkay unu ya dumateng aw tagenan mayu ya kamayu kadaman adti manga utaw na mig-imo' kamayu sa malatay. ¹² Aw pasalamati mayu ya Ama tadun na Tyumanem, kay yan ya mig-imo' kamayu maka-umba' maka-akup sa bagi' na pigtagilan da nan sa manga utaw nan adti kasakupan na kalalamdag. ¹³ Kay ya Ama, yan ya migpaluwa' da kanaten lekat adti pagdumala ni Satanas dun ni kasakupan na kangitngit, aw dayaw nan pigpaligena' adti kasakupan na kanan Ise' na si Jisus na to-o nan pigginawa͡an. ¹⁴ Aw magi sa Ise' nan, piglekat da kitadun na Tyumanem adti katulus ni Satanas, kay piglanas da nan ya kanaten manga sala'.

Ya pagka Tyumanem ni Kristu aw ya pigpan-imo' nan

¹⁵ Na, dili' pagkita-en ya Tyumanem, manang dun ni kanan Ise' na si Kristu kya-ede-an tadun ya bet na Tyumanem. Sa wala' pa imo-a ya kadakula' na banwa, awun da si Kristu kay wala' ya piglekatan nan. Yanagaw yan ya to-o matulus sa kadég. ¹⁶ Aw magi saba kan Kristu pig-imo' na Tyumanem ya kadég na awun ni langit aw asini tas na lupa', dala ya manga pagkita-en aw ya dili' pagkita-en, pangkay ya manga anghil aw ya manga kasakupan nilan aw manga mangkalangkaw dun ni kanilan, alag pig-imo' nan magi kan Kristu pada si Kristu deyen na kadég. ¹⁷ Sa wala' pa ka-imo' ya pangkay unu, awun da dadan si Kristu. Aw magi sa pagdumala nan, dayaw nan pigtapid ya kadég aw kenne' pa nan adun pigpaligena'. ¹⁸ Si Kristu ya palangad ulu, aw ya kadég tadun na nyangintu-u kanan palangad kanan da lawas. Si Kristu ya lyekatan sa bagu na ginawa tadun kay yan ya muna nyataw lekat adti nyangkamatay aw dili' da sakanan salut matay, aw yanagaw yan ya matas sa kadég. ¹⁹ Kay kaliman na Tyumanem na dun ni kan Kristu kita-a ya kadakula' na pagka Tyumanem nan, ²⁰ aw magi kan Kristu pigpaliku' na Tyumanem ya kadég na inimo-an nan pangkay adti langit aw pangkay asini tas na lupa'. Aw magi sa dugu' na kanan Ise' dun ni pagkamatay nan adti krus, pigkamang na Tyumanem ya nyaka-elet, pada dili' da kitadun po-on nan.

²¹ Idtu muna kya-eletan kamu adti Tyumanem asuntu na malatay ya anenganeng mayu aw ya pigpan-imo' mayu. ²² Manang adun, pigpaliku' da kamu na Tyumanem. Pig-imo' nan yeiy magi sa pagka͡utaw na Ise' nan asini tas na lupa' aw pagkamatay nan. Yeiy ya pig-imo' nan pada mabatug da mayu ya magpalapit adti kanan kay piglanas da nan ya manga sala' mayu, aw wala' ya pagsāla' nan kamayu aw wala' da uman ya tubagenen mayu sa pag-indeg mayu adti asdangan nan. ²³ Aw mabatug mayu saba ya pag-indeg adti asdangan nan kun magpadeleg kamu adti pagpangintu-u mayu siling na aligi na pigtulluk na to-o masalig aw dili' mag-inang-inang, aw kun dili' kamu magsuwayenen lekat adti pag-iman na dyengeg mayu idtu muna dun ni madyaw na ubat-ubat kan Kristu. Aw yeiy ya nyabekkal da uman adti kadakula' na banwa, aw aku si Pablo ya sambuk na pigtaliguwan na Tyumanem sa pagpa-ede' adti manga utaw.

Ya pagud ni Pablo asuntu sa manga mangintu-uway

²⁴ Na, pangkay madég ya kalugan na pagti-is na kya-agiyan ku dun ni pagpa-ede' ku kan Kristu adti kadég mayu na manga Héntil, manang migleya aku kay kya-untungan kamu. Aw ya manga pamulayam kan Kristu idtu muna, maynan uman ya pagti-is na kya-agiyan ku na un tigkasen ya kadég na pigtaligu na Tyumanem kanaken, pada ka-untungan ya kadég na manga mangintu-uway na yan ya palangad lawas ni Kristu. ²⁵ Kay pigtaliguwan aku nan saba na un magtabang kamayu na nyangintu-u, aw pigpamalli' aku nan pada malingeb ku ya pagpa-ede' adti kamayu sa kadakula' na madyaw na ubat-ubat na lekat adti Tyumanem. ²⁶ Kay lekat adti kadengan na muna, ya palpa na Tyumanem pigtagu' nan. Manang adun, pigbukasan nan ya kakawasan yeiy adti kanan manga utaw, magi sa madyaw na ubat-ubat na lekat adti kanan. ²⁷ Kay kaliman nan na ka-ede-an nilan ya palpa nan yeiy na maka-akup uman ya manga Héntil adti kadyawan nan na yan si Kristu na awun ni kamayu. Kay dun ni kan Kristu awun imanen tadun na maka-akup kitadun adti kadakula' na kadyawan na Tyumanem. ²⁸ Yanagaw si Kristu ya pigpa-ede' nami adti kadég na utaw. Dayaw nami pigpalna-uwan ya kadég pada malingeb ya pagpangintu-u nilan kan Kristu dun ni allaw na pa-indegen nami silan adti asdangan na Tyumanem. ²⁹ Aw yeiy ya du-an nan na gayed aku migkalug aw dakula' ya pagud ku asuntu kamayu. Aw pigsaligan ku ya katulus ni Kristu na nyeya' asini kanak aw yan ya magpakabagseg sa ginawa ku.