2
1 Na, kaliman ku na ka-ede-an mayu na to-o dakula' ya pagud ku asuntu kamayu aw sa kadég na manga mangintu-uway dala ya manga taga Laodiciya, pangkay kun wala' pa kitadun pagkakilala͡ay. 2 Kay yan ya kanak tud na pakabagsegen pa ya ginawa na kadég mayu asuntu na migsambuk da ya anenganeng mayu aw miggaginawa͡ay da kamu. Aw yan uman ya sambuk na tud ku na to-o mayu kalabetan ya kadakula' na palpa na Tyumanem na pigtagu' asini muna na yan si Kristu, 3 kay dun ni kan Kristu katagu' ya kadakula' na katadeng na Tyumanem.
4 Piglong ku ya kadég yeiy pagaw mabuyu kamu na manga utaw na matadeng magtalagtag sa tingeg aw makasuway kamu baling. 5 Aw pangkay wala' aku dun ni kamayu, manang gayed ta kamu kya-anenganengan, aw dakula' ya kanak pagleya asuntu na migsambuk da ya kamayu anenganeng dun ni pagdalug sa palna-u ni Kristu aw to-o la masalig ya pagpangintu-u mayu.
Si Kristu olo' ya dalugun
6 Yanagaw asuntu na pigdawat da mayu si Kristu Jisus na kanaten pangulu, silingan mayu ya kanan bet. 7 Aw ya kamayu pagpangintu-u silinga mayu na kawuy na to-o tyumelled ya dalid nan, aw silinga mayu uman na aligi na balay na to-o masalig ya kyatullukan nan. Aw padelega mayu ya pagdalug sa kadég na pigpalna-u la kamayu pada magkasalig pa ya pagpangintu-u mayu kanan, aw palapiya mayu ya kamayu pagpasalamat adti Tyumanem.
8 Magpakatadeng kamu pagaw madaladala kamu na manga utaw na mag-imo-imo' sa katadeng nilan aw manga utaw na mag-imo' sa paggaway sa manga eped nilan. Kay ya palna-u nilan alag yeiy olo' lyumekat adti manga utaw, aw lyumekat uman adti manga busaw na nyeya' adti balintenga-an aw adi lupa', aw wala' yeiy lekat adti kan Kristu. 9 Manang dun ni kan Kristu kita-a ya kadakula' na pagka Tyumanem. 10 Aw asuntu na syumambuk da kamu kanan, nyatagtun da mayu ya kadég na awun ni kanan. Kay si Kristu ya matas pa sa kadég na migdumala pangkay ya pagkita-en aw ya dili' pagkita-en, aw yan ya pangulu sa kadég.
11 Aw asuntu na syumambuk da kamu kan Kristu, liwan na nyatuli' da kamu siling na manga Judiyu na yan ya pangilala na pagsambuk nilan sa Tyumanem. Pangkay wala' kamu tengteng tuli-a, manang pigkamang da ni Kristu ya pagkaliman na pagka-utawun mayu mag-imo' sa sala'. 12 Aw dun ni pagba͡utismu kamayu, siling na nyaka-agad da kamu adti pagkamatay nan aw adti paglebeng kanan. Aw asuntu na pigmataw na Tyumanem si Kristu lekat adti nyangkamatay, siling na nyaka-agad da kamu uman dun ni pagkataw nan adti bagu na ginawa, magi sa pagpangintu-u mayu sa katulus na Tyumanem na yan ya migmataw kan Kristu. 13 Idtu muna siling kamu na utaw na nyatay da kay kya-eletan kamu adti Tyumanem asuntu na piglakadan da mayu ya manga sugu' nan aw beke' kamu uman na kanan manga utaw. Manang adun da, siling na nyaka-eped kamu kan Kristu dun ni pagkataw nan asuntu na piglanas da na Tyumanem ya kadég na manga diklamu nan adi kanaten sa paglakad tadun sa manga sugu' nan. 14 Aw asuntu na piglanas da nan ya kadég na diklamu nan kanaten, yanagaw wala' da ya tubagenen naten dun ni allaw na pag-ukum nan, kay pigpakalabu nan ya kadég adti krus. 15 Asuntu saba sa pagkamatay ni Kristu adti krus, wala' da ya indeganan na manga busaw aw kanilan mangkalangkaw na maglong adti Tyumanem na ukuman kitadun nan galu. Aw yanagaw pigpakita' da na Tyumanem adti kadég na manga utaw na pigdeg da nan ya manga busaw.
16 Yanagaw ya-i mayu pagka͡agadi ya piglong na manga utaw na magsiling sa mag-ukumay kamayu asuntu olo' sa pagkan mayu aw pag-inem sa pigpalili nilan, aw asuntu na wala' kamu tambung sa manga pista nilan dala ya pagpista nilan dun ni liyawan ya bulan aw dun ni kanilan allaw na paglagdeng. 17 Ya manga katanem yeiy siling olo' na alung na un dumateng. Manang si Kristu saba ya tengteng na matinaw. 18 Yanagaw dili' mayu pagtumbay na baya-baya-an kamu na eped na manga utaw. Kay awun manga utaw na sallong kunu migpadalem sa kanilan pagka-utawun, aw piggelgel nilan adti kamayu na ka͡agadan mayu ya pagsimba nilan sa manga anghil, kay awun kunu manga pigpakita' kanilan na siling na tagaynep, aw yan kunu ya lyekatan na katadeng nilan. Manang adti paglong nilan, dun da baling ka-ede-i na migpatastas silan sa kanilan pagka-utawun kay nyabaluk da ya anenganeng nilan. 19 Aw wala' silan pakasugpat adti kan Kristu pangkay yan saba ya ulu na migdumala sa kadég tadun na palangad lawas nan. Kay dun ni lawas nan, dayaw pa ni Kristu pigpaligena' ya kadég tadun dun ni kasakupan nan aw dayaw pa nan uman pig-isugpatsugpat ya tag sambuksambuk kanaten, aw mig-atag sakanan sa imo-unun na umba' sa tag sambuksambuk kanaten. Kay kun pigtalabahu na tag sambuksambuk kanaten ya pigtaligu kanaten ni Kristu, tumulin pa ya kadakula' na kasakupan na manga mangintu-uway aw magkabagseg pa uman ya palangad lawas nan. Alag yeiy palpa na Tyumanem.
Ya bagu na ginawa na lyumekat adti kan Kristu
20 Na, dun ni pagsambuk da mayu kan Kristu, siling na nyaka-agad da kamu adti pagkamatay nan, aw pigpaluwa' da kamu nan adti pagdumala na manga busaw na awun ni balintenga-an aw asini lupa'. Yanagaw ananga' pa mayu silingan ya bet na manga utaw asini tas na lupa' na wala' dalug sa pagkaliman na Tyumanem? Ananga' pa mayu dalugun ya palna-u na manga utaw na gyumelgel miglong kamayu, long nilan: 21 “Dili' mayu pag-awidan! Dili' kamu magtémtém! Ya-i mayu pagdamdama!” 22 Kay ya manga palili yeiy na pigpalna-u nilan pig-imo-imo' olo' na utaw. Aw ya kakanenen aw ya kadég na pigdili' nilan, alag magkabus magkalat. 23 Iman mu aw madyaw ya pigpalna-u nilan kay yan ya kyatibullukan na ginawa nilan aw migpadalem silan aw byadasan nilan pya-emel-emel ya kanilan lawas. Manang ya tengteng matinaw, ya pig-imo' nilan dili' makatabang kanilan sa pagtagen sa pagkaliman na pagka-utawun nilan.