3
1 Na, kun nyaka-agad da kamu sa pagkataw ni Kristu, tibulluka mayu ya kamayu ginawa sa adtu ni tas na langit kay adtu la si Kristu nyingkud adti kalintu na Tyumanem kay yan ya ingkudanan na pagdumala. 2 Gayed mayu anenganengen ya kadég na awun ni tas na langit, aw beke' na asini tas na lupa'. 3 Kay siling na nyaka-agad da kamu sa pagkamatay ni Kristu. Aw nyakasambuk da kamu kan Kristu, aw ya bagu na ginawa mayu pigtagu' da dun ni tampid na Tyumanem adti tas na langit. 4 Aw pangkay pigtagu' pa ya bagu na ginawa mayu, manang pagdateng na allaw na pakita' na Tyumanem si Kristu adti kadég na manga utaw, maka-akup kamu uman dun ni kalalamdag na pagka Tyumanem nan. Si Kristu saba ya lyekatan na kamayu bagu na ginawa na wala' ya tyamanan.
Ya dadan na pagka-utawun aw ya bagu na pagka-utawun
5 Na, asuntu na nyatagtun da mayu ya bagu na ginawa, yanagaw pataya la mayu ya pag-imo' sa malatay na pagkaliman na pagka-utawun mayu na siling na maynini: Ya pagkasala-enen, aw ya gayed malipa' ya anenganeng, aw ya pag-imo' sa makamulamula sa lawas, aw ya pagkaliman mag-imo' sa malatay, aw ya kakaybegan sa manga pametang aw ka-unan na eped na utaw. Kay kun dalugun mayu baling ya pagkamang sa manga ka-unan aw pametang, dili' madugay ma-imo' yeiy manga tyumanem mayu. 6 Aw asuntu sa manga imo-unun na maynan, un saba dumateng ya pagpa-emel-emel na Tyumanem adti manga utaw na mig-imo' gayed sa malatay. 7 Maynan uman ya kamayu pig-imo' idtu muna na wala' pa kamu pangintu-u, 8 manang adun, pagpa-awat kamu sa kadég na imo-unun na malatay: Dili' mayu pag-elledan na ginawa ya eped, aw dili' kamu maksay magsulu. Dili' da mayu pagkalatan na ginawa ya eped na utaw, aw dili' mayu uman silan pagtanemtaneman na malat na tingeg. Aw dili' kamu maglong sa malipa'. 9 Aw dili' da kamu maggagalu-ay, kay pigluwas da mayu ya dadan na bet dala ya kadég na imo-unun na malatay, 10 aw syut da mayu ya bagu na anenganeng na gayed pigbagu na Tyumanem asuntu na gayed mayu pigsilingan ya kanan bet. 11 Aw yanagaw dili' kitadun magkibang sa utaw, pangkay Grigo aw Judiyu, pangkay kun pigtuli' aw wala', pangkay kun wala' pag-iskuwila, aw pangkay adti ka͡ulo na alug pag-eya', aw pangkay allang aw beke' na allang. Alag kitadun mig-unawa adti anenganeng na Tyumanem kun migsambuk da kitadun adti kan Kristu. Aw si Kristu saba ya nyeya' adti seled na kadég tadun.
12 Pigpamalli' da kamu na Tyumanem aw pigtani la kamu nan aw pigginawa͡an nan. Yanagaw, suta mayu ya kanan bet siling na maynini: Kallatan mayu ya manga eped na utaw, aw magkanimbet kamu adti kanilan. Dili' kamu magpatastas sa pagka-utawun mayu manang magpadalem kamu baling aw dayaw mayu uman pakadyawa ya eped mayu na utaw. Tageni ya kamayu kadaman adti eped na utaw, 13 aw ti-isa mayu ya bet nilan. Aw kun awun galu diklamu mu sa kanmu eped, magpasinsiya͡ay kamu baling. Magsiling kamu kan Kristu, kay pigkallatan kamu nan idtu muna, yanagaw kallatan mayu uman ya eped mayu na utaw. 14 Aw dun ni pag-imo' mayu sa kadég yeiy, gayed kamu paggaginawa͡ay kay yan ya to-o mig-ilagket sa kadég mayu pada magsambuk da ya kamayu anenganeng. 15 Aw dun ni manga pagbaya' mayu, tumbayan mayu ya kalinaw ni Kristu na maggagad sa anenganeng mayu. Kay si Kristu ya ulu, aw pigpatawag da kamu nan aw nya-imo' kasakupan nan na yan ya palangad kanan lawas, pada sambuk da ya anenganeng na kadég tadun. Aw dili' mayu pagkalingawan ya pagpasalamat kanan. 16 Aw tumbayan mayu na meya' adti seled na kamayu anenganeng ya pigpalna-u la kamayu kan Kristu. Aw palna-u pa mayu uman adti manga eped dun ni katipun mayu magi sa katadeng na pig-atag kamayu na Tyumanem. Aw dayaw mayu deyenan ya Tyumanem aw pasalamatan mayu sakanan lekat adti kamayu anenganeng magi sa manga salmo, aw manga dalangan aw ubaten, aw manga eped na tingeg na Tyumanem na pig-imo' da manga kanta. 17 Aw pangkay unu ya imo-unun mayu aw piglong mayu, imo-a la mayu dun ni ngalan ni Jisus na tagtun kanaten asuntu na sugu-anen kamu nan. Aw magi sa ngalan ni Jisus, pasalamatan ya Tyumanem na Ama.
Ya palna-u ni Pablo adti manga ka͡ubayan aw eseg aw mangayse'
18 Kamu na manga ka͡ubayan, pagbasa͡an mayu ya kamayu manga eseg kay yeiy ya umba' imo-un na manga nyangintu-u kan Kristu. 19 Kamu uman na manga eseg, to-o mayu ginawayi ya kamayu manga ka͡ubayan aw dili' mayu pagkalaten ya ginawa nilan. 20 Aw kamu na manga mangayse', ka͡agadi mayu ya kamayu mangkatikadeng kay yan ya makatutuk sa Tyumanem. 21 Kamu uman na manga ama, pakadyawa mayu ya pagdala sa manga mangayse' mayu, aw dili' mayu pagpasobla͡an ya pagpitul kanilan pagaw magkalumay ya ginawa nilan mag-imo' sa madyaw.
Ya palna-u ni Pablo adti manga allang aw sugu-anen aw amu nilan
22 Na, kamu na manga allang aw sugu-anen, dun ni kadég na kamayu imo-unun, ka͡agadi mayu ya kamayu amu asini tas na lupa'. Dili' mayu pagsilingan ya manga eped na magkaseb olo' sa udas na bantayan silan na amu nilan pada kunu saya' silan na kanilan amu. Tibulluka mayu ya pagtuman sa sugu' nan kay kun imo-un mayu yeiy, pigbasa͡an mayu si Kristu.
23 Yanagaw pangkay unu ya kamayu imo-unun, betangan adti ginawa mayu, liwan na si Kristu ya tengteng na amu mayu aw beke' olo' na utaw. 24 Aw kya-ede-an da mayu na awun bagi' na atag pa kamayu ni Kristu na palangad tandan nan kamayu, kay si Kristu ya tengteng na pigtalabahuwan mayu. 25 Manang pangkay singalan ya mig-imo' sa malat, awun uman tandan kanan na yan ya pagpa-emel-emel, kay wala' ya pigkibang na Tyumanem.