4
1 Na, kamu na manga amu, pakadayawa mayu ya pagdala sa kamayu manga allang aw sugu-anen. Kay kya-ede-an da mayu na awun uman amu mayu adti tas na langit.
Ya manga pamene' sa kadég na manga mangintu-uway
2 Na, tibulluka mayu gayed ya kamayu ginawa dun ni pagpanawagtawag, aw pagpakatanaw kamu pagaw makasuway ya kamayu anenganeng. Aw pagpasalamat kamu uman adti Tyumanem. 3 Aw panawagtawagi kami uman adti Tyumanem na atagan pa kami nan na dakula' na selat maglong adti kadég na manga Héntil sa palpa na Tyumanem na nyatagu' asini muna na yan si Kristu. Yeiy saba ya du-an nan na nyakalabusu aku. 4 Aw panawagtawagi mayu uman na to-o mabangal ya paglong ku adti manga utaw aw dayaw nilan kalabetan ya kadakula' na madyaw na ubat-ubat kan Kristu na yan ya pigtaligu kanak na Tyumanem.
5 Pakadyawa ya kamayu manga bet na dili' kamu sala-en na manga utaw na wala' pa pangintu-u. Aw maksay mayu uman selatan ya pag-ubat-ubat sa kamayu pagpangintu-u. 6 Aw pakadyawa ya kamayu paglong kanilan pada magan ya ginawa nilan dumawat sa kamayu paglongun aw umba' uman ya tubag mayu sa pangkay singalan ya musip sa pagpangintu-u mayu.
Ya pagpangumusta ni Pablo sa manga ubaybay nan
7 Na, ya pagpakabetang ku asini Roma un dandanen kamayu ni Tikiko. Inulug tadun sakanan na pigginawa͡an na nyatibulluk dun ni imo-unun na Tyumanem eped nami, aw sugu-anen ni Kristu na migtabang kanak. 8 Yan ya du-an nan na pigpakawun ku sakanan dun ni kamayu na un maglong kamayu kun unu ya pagpakabetang nami adi, pada dili' kamu maypeng aw pada pakabagsegen ya ginawa mayu. 9 Aw nyagad kanan si Onésimo na taga Kolossas na yan ya sambuk uman na inulug tadun na kasaligan aw pigginawa͡an. Silan duwa ya magdandan kamayu kun unu alag ya nya-imo' adi.
10 Si Aristarko ya eped ku idi na tyumabang kanak na pagkakalabusu ku. Kaliman nan kataga͡an aw manu la ya pagpakabetang mayu dun. Nyangumusta uman kamayu si Markos na kaylug ni Bérnabi. Na, piglongan da ta kamu dadan na ila' aw dumateng si Markos adti kamayu, dawata mayu beg sakanan. 11 Nyangumusta kamayu uman si Joswé na pigngalanan uman na Justo. Ya tulu yeiy, silan olo' ya Judiyu adti manga eped ku idi na migtabang kanak magbekkal sa ubat-ubat sa paghari' na Tyumanem. Aw to-o silan migpakabagseg sa ginawa ku.
12 Aw si Épapras na taga Kolossas, sambuk uman na sugu-anen ni Kristu Jisus, aw kaliman nan uman kataga͡an aw manu la ya pagpakabetang mayu dun. Gayed nyatibulluk ya pagpanawagtawag nan sa Tyumanem na kenne' pa galu na kasalig na pagpangintu-u mayu aw dili' kamu magduwaduwa manang ka-ede-an mayu ya kadakula' na pagkaliman na Tyumanem. 13 Nyakasistigus aku na to-o dakula' ya pagud ni Épapras asuntu kamayu aw sa manga mangintu-uway na nyeya' dun ni manga lunsud na Laodiciya aw Hérapolis.
14 Si Lukas, ya doktor na pigginawa͡an tadun, aw si Démas uman, alag silan nyangumusta kamayu.
15 Padatenga mayu beg ya kanami pagpangumusta adti manga inulug tadun na nyeya' adti Laodiciya, dala si Nimpa aw manga mangintu-uway na migkatipun dun ni balay nan.
16 Pagkatigkas basa͡en ya sulat ini adti kamayu, pabasa͡an mayu uman adti manga mangintu-uway na nyeya' adtu ni Laodiciya. Aw maynan uman, basa͡en mayu ya sambuk na sulat na pigpadala ku adti Laodiciya. 17 Aw paglonga mayu beg kanak si Arkipo na tigkasen nan ya imo-unun ni Kristu na pigtaligu kanan.
18 Aku si Pablo ya migsulat sa pangumusta ini. Dili' aku mayu pagkalingawan na nyakalabusu pa aku. Aw ya kadyawan na Tyumanem awun gayed ni kamayu.