1 Téssalonika 2

Ya bet ni Pablo aw manga eped nan adti syudad na Téssalonika

¹ Na, kya-ede-an mayu, kay manga inulug, na wala' kasapad ya kanami pagkadtu ni kamayu, ² kay tyabangan kami na Tyumanem aw wala' ya kakallekan nami magpa-ede' kamayu sa madyaw na ubat-ubat na lekat adti Tyumanem, pangkay pig-ampangan kami dun ni kamayu, aw pangkay dadan da kami pigmulamula aw pigpamulayaman na manga utaw adti syudad na Pilipos sa wala' pa kami adti sayid mayu dun ni Téssalonika. ³ Aw matinaw saba ya tud nami, kay kaliman nami na pakanyegan na manga utaw ya kanami ubat-ubat. Kay beke' na tud nami ya pagbelengbeleng sa manga utaw magi sa palna-u na dili' matulid, aw beke' uman na kanami tud ya paggagad kanilan adti imo-unun na malatay, aw wala' kami saba pag-akal kanilan. ⁴ Yan olo' ya piglong nami adti manga utaw ya pyamene' na Tyumanem kanami. Dadan da kami nan kyapulba͡an, aw pigtaligu nan kanami ya pagpa-ede' sa madyaw na ubat-ubat kan Jisus adti kadég na manga utaw. Aw yanagaw beke' na tud nami na deyen kami na manga utaw, manang yan baling ya tengteng pagkaliman nami na katutukan ya Tyumanem sa pigpan-imo' nami, kay ya Tyumanem yan ya migtala-tala' sa anenganeng na manga utaw. ⁵ Aw kya-ede-an mayu na wala' nami bulakbulaki ya kanami palna-u pada mag-ilup kamayu, aw beke' na tud nami na manguwalta kamayu. Ya Tyumanem yan ya tistigus nami. ⁶ Aw wala' nami kalimi ya deyen mayu aw deyen na eped na utaw. Aw pangkay apostolés kami ni Kristu aw umba' galu basa͡an, manang dili' kami malim magpakalug kamayu. ⁷ Yanagaw pigpakalunay nami baling ya kanami ginawa adti kamayu siling na ina na migkalmukan sa ise' nan. ⁸ Aw asuntu sa kadakula' na ginawa nami kamayu, migleya kami magpa-ede' adti kamayu sa madyaw na ubat-ubat na lekat adti Tyumanem, aw beke' nan olo', manang wala' nami uman demetan kamayu ya kanami pagka-utawun, kay to-o kamu nami pigginawa͡an. ⁹ Kya-anenganengan gya mayu, kay manga inulug, ya kadakula' na pagud nami dun ni sayid mayu. Wala' kami salig kamayu sa kapelekan nami pangkay sambuk, manang migtalabahu kami gabi aw allaw pada dili' kamu kapagudan talana nami mig-ubat-ubat adti kamayu sa madyaw na ubat-ubat na lekat adti Tyumanem. ¹⁰ Kamu ya sistigus sa kadyaw na bet nami adti kadég mayu na mangintu-uway. Aw ya Tyumanem uman sistigus na matulid ya ginawa nami adti asdangan nan aw adti kamayu. Yanagaw wala' ya indeganan na pasala-en kami. ¹¹ Kay kya-ede-an mayu ya kanami pagdala sa tag sambuksambuk kamayu na siling na ama adti manga mangayse' nan, ¹² kay gayed kamu nami pigdasig na magpadeleg sa pagpangintu-u mayu, aw pigpakabagseg nami ya ginawa mayu, aw pigtulada-an kamu nami kun unu ya imo-un na maka-umba' sa manga utaw na Tyumanem. Kay ya Tyumanem yan ya nyamalli' kamayu na un maka-akup adti kasakupan nan aw apeten ya kanan kadyawan.

¹³ Yan uman ya du-an na gayed nami pigpasalamatan ya Tyumanem, kay pagdengeg mayu sa palna-u nami, pigdawat mayu na yan ya tengteng matinaw na palna-u, kay kya-ede-an mayu na wala' lekat adti tin utaw manang lyumekat baling adti Tyumanem. Aw ya kanan tingeg yan ya mag-uman sa anenganeng mayu na nyangintu-u la. ¹⁴ Aw dyengeg nami, kay manga inulug, na asuntu sa pagpangintu-u mayu pyamulayaman da kamu na manga eped mayu dun ni kamayu banwa. Aw yanagaw, nyasiling kamu na manga mananimba͡ay sa Tyumanem dun ni probinsiya na Judiya na nyangintu-u la kan Kristu Jisus, kay pyamulayaman silan uman na manga eped nilan na Judiyu na wala' pangintu-u. ¹⁵ Ya manga utaw na Judiyu, silan ya migpatay sa manga propita, aw pangkay si Jisus ya kanaten matas na pangulu, pigpapatay nilan uman. Aw kenne' nilan adun, ya manga eped nilan mig-alilin kanami adti syudad mayu. Wala' silan pakatutuk sa Tyumanem, aw siling silan kalaw na po-on adti kadég na utaw ¹⁶ kay gayed nilan pig-ampangan ya pag-ubat-ubat nami sa tingeg na Tyumanem kay dili' silan malim na paluwa-en ya manga utaw na beke' na Judiyu lekat adti pagpa-emel-emel na Tyumanem. Aw magi sa madég na pigpan-imo' nilan siling na maynan, gayed nilan pigdugangan ya pagluduk sa manga sala' nilan adti kana Tyumanem. Manang pa-emel-emelen nan silan sa ukum na umba' kanilan!

Ya kalim ni Pablo lumiku' adti syudad na Téssalonika

¹⁷ Na, kay manga inulug, pangkay baya' pa nami pig-indegan ya banwa mayu, manang to-o kami dyumela kamayu, aw nyakabetang adti ginawa nami ya pagliku' adti kamayu pada magkakabetay kitadun. ¹⁸ Yan galu ya kaliman nami, manang gayed si Satanas mig-ampang sa palpa nami. Labi la aku si Pablo, kay malikit da aku migtagilan sa pagliku' adti sayid mayu. ¹⁹ Aw yan ya du-an nan na kaliman nami na magkakita͡ay kitadun, kay gayed nami pig-iman na masalig da ya kamayu pagpangintu-u, aw dun da kami pagleya. Aw adti moli na allaw sa pagliku' ni Jisus ya tagtun kanaten, kamu ya ma-imo' palangad korona nami adti asdangan nan. ²⁰ Kamu saba ya pagpalibantug nami, aw migleya kami kamayu.