3
Ya pagpadala kan Timotiyo adti Téssalonika
1 Yanagaw, wala' da kami pakatagad sa utaw na awun mag-ubat-ubat kanami kun manu la ya pagpakabetang mayu, aw yan ya du-an nan na talana migpatagak pa kami asini syudad na Aténas 2 si Timotiyo ya kalyu kanami adti sayid mayu dun ni Téssalonika. Kay si Timotiyo inulug tadun aw sugu-anen na Tyumanem na gayed uman migpa-ede' sa madyaw na ubat-ubat kan Kristu. Pigsugu' nami sakanan adti kamayu na un nan pakabagsegen ya ginawa mayu aw tabangan kamu nan na magpadeleg ya pagpangintu-u mayu, 3 pada wala' ya makasuway kamayu adti Tyumanem asuntu sa madég na kalugan. Kay kya-ede-an da mayu na kun dalugun tadun ya Tyumanen dumateng uman ya manga kalugan. 4 Yan ya piglong nami kamayu talana pa nami adti sayid mayu na un dumateng kanaten ya kalugan, aw yan saba ya nya-imo'. 5 Yanagaw, asuntu na wala' da aku pakatagad sa ubat-ubat lekat adti kamayu, pigsugu' ku si Timotiyo pada ka-ede-an ku kun ayin taman ya pagpangintu-u mayu, kay nyaypeng aku kamayu pagaw pigpasuway da kamu ni Satanas aw syapadan beg ya pagud nami dun ni sayid mayu.
6 Manang adun da, bagu dyumateng si Timotiyo lekat adti kamayu, aw madyaw to-o ya pig-ubat nan kanami. Pigpa-ede' nan kanami na masalig da ya pagpangintu-u mayu aw dakula' ya ginawa mayu sa Tyumanem aw manga ka-epedanan mayu. Aw piglong nan na madyaw kunu ya ginawa mayu kanami aw yan ya kamayu pagkaliman na kumita' kanami liwan na kanami uman, kaliman nami kumita' kamayu. 7 Yanagaw, kay manga inulug, migkagan ya ginawa nami kay pig-ubat da kanami ya kamayu pagpangintu-u, aw pangkay dakula' to-o ya kalugan nami aw pangkay pyamulayaman kami na manga utaw, 8 manang madyaw ya ginawa nami asal nan magpadeleg kamu adti pagpangintu-u mayu kan Jisus. 9 Unun nami beg ya pag-ubat sa kadakula' na pagleya nami adti asdangan na kanaten Tyumanem asuntu kamayu? Dili' maka-umba' ya pagpasalamat nami kanan. 10 Gabi aw allaw nyatibulluk kami nyanginayu' adti kanan na un dumateng ya allaw na magkakita͡ay pa kitadun pada dugangan pa nami ya wala' pakalingeb adti pangintu-u mayu.
11 Na, migsekat kami adti Tyumanem ya kanaten Ama aw kan Jisus ya tagtun kanaten, na kamangen ya nyakabalabag kanami pada makaliku' kami adti kamayu. 12 Aw kamu uman pyanawagtawagan nami adti kan Jisus, na to-o nan dugangan ya kadakula' na ginawa mayu sa manga inulug mayu na nyangintu-u aw sa kadég na utaw, siling na kadakula' na ginawa nami kamayu. 13 Kay kun yeiy ya imo-un nan, masalig da ya pagpangintu-u mayu, aw siling na wala' ya sala' mayu adti anenganeng na Tyumanem. Yanagaw, dili' kamu pasala-en adti asdangan nan dun ni allaw na dumateng asini tas na lupa' ya tagtun kanaten na si Jisus, eped nan ya kadég na manga anghil na lekat adti tas na langit.