4
Ya bet na utaw na nyakatutuk sa Tyumanem
1-2 Na, kay manga inulug, awun pa paglongun nami kamayu. Kya-ede-an da mayu ya pigpalna-u nami kamayu kun unu ya madyaw na bet na makatutuk sa Tyumanem. Aw dun ni manga pig-imo' mayu na madyaw, kya-ede-an da nami na kyalabetan mayu ya pigpalna-u nami. Aw asuntu sa katundanan na pig-atag kanami na pangulu tadun na si Jisus, kenne' pa nami ya pagdasig kamayu na magkadakula' ya kadyaw na bet mayu. 3 Kay yan ya kaliman na Tyumanem na atag mayu kanan ya kamayu pagka-utawun aw silingan mayu ya kanan bet. Yanagaw, magpa-awat kamu adti malatay, labi la ya magkasala-enen, 4 aw ya tag sambuksambuk kamayu, pakadyawa ya pagdala sa lawas mayu na pig-atag da mayu adti Tyumanem. 5 Aw dili' mayu pagsilingan ya manga utaw na wala' paka-ede' sa Tyumanem, kay dili' silan makatagen sa pagkaliman na pagka-utawun nilan. 6 Dili' mayu silan pagsilingan pada dili' mayu kalakadan ya sugu' na Tyumanem aw dili' mayu pakalaten ya eped mayu na nyangintu-u. Kay kun singalan ya mag-imo' sa malat siling na maynan, pa-emel-emelen saba sakanan na Tyumanem, siling na piglong da nami kamayu. 7 Kay ya Tyumanem wala' kanaten pamalli' pada mag-imo' sa malatay, manang yan ya tud nan kanaten na dalugun tadun ya kanan pagkaliman pada dili' kitadun makasala'. 8 Yanagaw pangkay singalan ya kumele sa palna-u yeiy, beke' nami olo' ya pigkele͡an nan, manang kyele͡an nan baling ya Tyumanem na nyatag kamayu sa Ispiritu nan, kay ya Ispiritu nan wala' saba ya sala'.
9 Na, dili' nami galu salutun ya pagpalna-u na maggaginawa͡ay ya kadég mayu na mangintu-uway, kay pigpalna-uwan kamu na Tyumanem kun unun mayu ya pagginawa sa manga eped mayu na nyangintu-u, 10 aw pigginawa͡an da mayu saba ya kadég na mangintu-uway adti kadakula' na probinsiya na Macédonya. Manang pigdasig kamu nami na to-o la mayu pakadakula-a ya kamayu paggaginawa͡ay, 11 aw pigdasig kamu nami uman na betangan adti anenganeng mayu na magsambuk ya ginawa mayu, aw dili' kamu magpangilabet sa manga imo-unun na eped na utaw, manang madyaw pa baling na magkaseb kamu dun ni kamayu talabahu. Alag yeiy pigpalna-u nami kamayu sa adtu pa kami ni sayid mayu. 12 Aw yeiy ya dalugun mayu pada madyaw ya dengeg mayu adti manga utaw na wala' pangintu-u aw dili' kamu sumalig adti eped na utaw sa kapelekan mayu.
Ya pagliku' ni Kristu aw ya datengan na mangintu-uway
13 Na, kay manga inulug, kaliman nami magpa-ede' kamayu kun unu ya datengan na manga mangintu-uway na nyatay da pada dili' magkalat ya ginawa mayu siling na manga utaw na wala' ya imanen nilan. 14 Kay pyangintu-uwan tadun na pangkay nyatay si Jisus manang nyataw sakanan, aw yeiy saba ya indeganan sa pagpangintu-u tadun na matawun uman na Tyumanem lekat adti pagkamatay ya kadég na nyangintu-u kanan aw pa-agad silan ni Jisus. 15 Kay yan saba ya piglong ni Jisus idtu muna, na kitadun na utaw pa dun ni pagliku' nan, dili' kitadun muna sa manga mangintu-uway na nyatay da. 16 Kay yan ya un ma-imo': Denggen ya dakula' na tingeg na migsugu', aw ya tatawag na matas na anghil, aw ya trumpita na Tyumanem, aw manog si Jisus taman adti balintenga-an. Aw ya manga mangintu-uway na nyatay da, muna silan matawun. 17 Tigkas yan, magdengan ya kadég tadun na mangintu-uway ma-engat, dala ya bagu nyataw aw kitadun na utaw pa. Aw dun kitadun pagkita' si Jisus adti balintenga-an aw magad kitadun kanan aw meya' adti sayid nan na wala' ya tyamanan. 18 Yanagaw, kay manga inulug, magi sa piglong nami ini maglalala͡ay ya ginawa na kadég mayu.