5
1 Na, kay manga inulug, dili' nami sulaten kun unu allawa ya pagkatuman sa kadég yeiy aw unu alag ya un ma-imo' kun malapit da ya allaw yan, 2 kay kya-ede-an da mayu na dili' tadun imanmanen ya pagliku' ni Jisus, siling na utaw na wala' nan pa-imanmana na paniken na matakaw ya balay nan na gabi. 3 Pagdateng na manga kamoliyan na allaw, awun manga utaw na maglong, “Malinaw da! Wala' da ya un tadun kallekan!” Manang bigla-en kalaten ya pagpakabetang nilan, siling na ka͡ubayan na nyabigla' pyetesan, aw wala' ya un nilan kapalaguyan lekat adti kagamakan nilan.
4 Manang kamu, kay manga inulug, beke' kamu na utaw dun ni mangitngit, kay kya-ede-an da mayu ya un dumateng, aw yanagaw dili' kamu kabigla-an pangkay ya pagdateng na allaw yan masiling na matakaw na bigla' maka-ibwang. 5 Kay ya kadég tadun na nyangintu-u kan Kristu, pigka-ilawan da na Tyumanem ya anenganeng tadun, yanagaw beke' kitadun na ise' na mangitngit aw beke' kitadun na ise' na gabi, manang kitadun baling ise' na kalalamdag aw ise' na allaw kay kana Tyumanem kitadun. 6 Yanagaw gayed kitadun magpakatanaw, aw naten pakadyawun ya pagdala sa kanaten pagka-utawun aw kanaten pag-eya'. Dili' da tadun pagsilingan ya manga utaw na wala' pangintu-u, kay siling silan na utaw na nyakatulug na wala' nilan pa-imanmana ya un dumateng. 7 Kay ya gabi, yan ya udas na pagpakatulug na manga utaw aw yan uman ya udas na nyangkalangulangu ya manga mag-inemay. 8 Manang kanaten, asuntu na kya-ilawan da kitadun na tingeg na Tyumanem, magpakatanaw kitadun siling na sundalu na pyansut da nan ya un makatampeng sa lawas aw ulu nan pada makatagilan sa dakula' na tanam. Maynan uman, yan ya un magtameng kanaten ya pagpangintu-u tadun aw ya dakula' na ginawa tadun sa manga eped na utaw aw sa Tyumanem aw ya pag-iman tadun na paluwa-en kitadun lekat adti manga kagamakan dun ni allaw na pagliku' ni Jisus. 9 Kay pigpamalli' da kitadun na Tyumanem. Aw ya pagpamalli' nan kanaten, beke' na pagpa-emel-emel kanaten adti kamoliyan na allaw, manang yan baling ya tud nan na paluwa-en kitadun magi sa pigpan-imo' ni Jisus Kristu ya tagtun kanaten 10 na migpakamatay kalyu kanaten. Aw yan ya syampetan na pagpamalli' nan kanaten, na pangkay kun utaw pa kitadun sa pagdateng nan aw pangkay kun nyatay da, un pa kitadun sumambuk meya' adti tampid nan. 11 Yanagaw pagpadeleg kamu magdinasigay aw magtatabangay dun ni pagpangintu-u mayu, siling na pig-imo' da mayu adun.
Ya manga moli na pamene' ni Pablo
12 Kay manga inulug, awun pigsekat nami kamayu, na basa͡an mayu ya manga migdumala sa kadég mayu na mangintu-uway, kay silan ya awun ni tampid mayu na migtulada' kamayu dun ni pagdalug mayu kan Jisus. 13 Aw to-o mayu silan ginawa͡ayi asuntu sa kadyaw na manga pigpan-imo' nilan adti sayid mayu. Aw ya kadég mayu, pagsambuka ya ginawa mayu.
14 Aw pigdasig kamu nami, kay manga inulug, na kun singan ya dili' malim magtalabahu, palna-uwi silan na magkaseb galu silan. Aw pakabagsega mayu ya ginawa na manga eped mayu na malumay ya ginawa nilan. Aw tabangi mayu ya manga nyampakasungkul dun ni pagpangintu-u nilan. Aw pakalunaya mayu ya ginawa adti kadég na utaw. 15 Dili' kamu magmalit sa utaw na migpakalat kamayu pangkay sambuk, manang gayed pakadyawa ya manga eped mayu aw kadég na utaw.
16-18 Na, asuntu na syumambuk da kamu adti kan Kristu Jisus, yeiy ya pagkaliman na Tyumanem na un mayu imo-un: Gayed kamu pagleya, aw ya-i mayu pagbotoni ya pagpanawagtawag adti Tyumanem, aw pasalamati mayu sakanan pangkay unu ya un dumateng.
19 Dili' mayu pagpatenengen ya imo-unun na Ispiritu na Tyumanem adti kamayu. 20 Aw dili' mayu pagtampeyesen ya pag-ubat-ubat na utaw na pigsugu' na Tyumanem. 21 Pagtanda-en mayu ya kadég na piglong nilan, kun lyumekat adti Tyumanem aw wala'. Kun unu ya madyaw, yan ya daluga mayu, 22 aw pagpakawat kamu sa kadég na punganan na malatay.
23 Na, nyanawagtawag kami kamayu adti Tyumanem kay yan ya lyekatan na kalinaw aw kadyawan. Pigsekat nami kanan na silingan mayu sakanan pada wala' da ya malatay adti ginawa mayu pangkay sambuk. Pigsekat nami na tunggu-an nan ya kadakula' na pagka-utawun na tag sambuksambuk kamayu, dala ya anenganeng mayu aw ya manga pagkaliman mayu aw ya kadég na imo-unun mayu, pada wala' ya un pasala-en dun ni pagka-utawun mayu sa pagliku' na tagtun kanaten na si Jisus Kristu. 24 yeiy saba ya un nan imo-un kay pigpamalli' da kamu nan, aw pagtumanen nan ya manga pakang nan.
25 Kay manga inulug, pakalikita kami panawagtawagi adti Tyumanem. 26 Aw pangumustaan kami mayu sa kadég na kaylug tadun adti kan Kristu. 27 Aw yan saba ya pamene' ku kamayu dun ni ngalan ni Jisus na dili' mayu beg pagkalingawan ya pagbasa sa sulat ini adti asdangan na kadég na mangintu-uway.
28 Gayed awun ni kamayu ya kadyawan ni Jisus Kristu na tagtun kanaten.