Ya Kadwa na Sulat ni Pablo
adti manga mangintu-uway dun ni
syudad na Téssalonika
1
1 Kay manga inulug na nyangintu-u la dun ni syudad na Téssalonika, kami si Pablo aw si Silas aw si Timotiyo ya un magpadala sa sulat ini adti kadég mayu na gayed migkatipun kay alag kamu sakup na Tyumanem ya kanaten Ama aw ni Jisus Kristu ya matas na pangulu.
2 Padatengen galu kamayu ya kadyawan aw kalinaw na lyumekat adti Tyumanem ya Ama tadun aw adti kan Jisus Kristu ya kanaten matas na pangulu.
Ya pagdasig ni Pablo sa manga mangintu-uway na migti-is
3 Kay manga inulug na nyangintu-u, dili' nami agaw tengteng kalingawan ya pagpasalamat adti Tyumanem asuntu kamayu. Yan ya umba' nami imo-un kay gayed tyumulin ya pagpangintu-u mayu aw gayed migkadakula' ya paggaginawa͡ay na tag sambuksambuk kamayu. 4 Yanagaw pangkay ayin kami paglaba' dun ni manga katipun na manga mangintu-uway kan Kristu, pigsaya' kamu nami kay migpadeleg ya pagpangintu-u mayu aw masalig da pangkay pigti-isan mayu ya madég na kalugan aw pamulayam na manga eped na utaw.
5 Aw asuntu na migpadeleg kamu pangkay pyamulayaman, yanagaw maglong kamayu ya Tyumanem, “Umba' kamu maka-akup adti kasakupan na paghari' ku.” Aw dun da kita͡en na kadég na manga utaw na matinaw ya pagbaya' na Tyumanem. 6 Kay yan saba ya un magmalit sa manga utaw na gayed nyamulayam kamayu. 7 Manang kamu na gayed pigpamulayaman, un kamu nan palagdengen eped nami na yan ya palangad tandan nan kanaten. Yan ya ma-imo' dun ni allaw na pakita' da nan ya pangulu na si Jisus Kristu sa pagdateng nan lekat adti tas na langit na maputus na laga aw ka-agadan na manga anghil nan na matulus. 8 Aw un nan pa-emel-emelen ya manga utaw na migpalipaslipas sa kya-ede-an da nilan sa Tyumanem aw ya manga utaw na kyumele sa madyaw na ubat-ubat kan Jisus ya tagtun kanaten. 9 Pa-emel-emelen silan aw ka-eletan na wala' ya tyamanan dun ni asdangan ni Jisus aw lekat uman adti kalalamdag na katulus nan. 10 Aw dun ni allaw na pagliku' ni Jisus, to-o sakanan deyen na kanan manga utaw aw to-o silan ma-eneng-eneng asuntu sa kadyaw na pagka Tyumanem nan. Aw maka-eped kamu saba kanilan kay nyangintu-u la kamu sa tingeg na Tyumanem na pigpalna-u nami kamayu.
11 Yanagaw malikit nami pyanawagtawagan ya Tyumanem na ma-imo' kamu manga utaw na umba' sa pagtawag nan kamayu lekat pa asini muna. Aw migsekat kami kanan na gagaden kamu nan magi sa kanan katulus pada matuman mayu ya kadég na pagkaliman mayu na madyaw aw mabus mayu matigkas ya kadég na imo-unun mayu na lekat adti kamayu pagpangintu-u, 12 pada deyen saba na manga utaw si Jisus ya tagtun kanaten, aw kamu uman deyen asuntu nan. Aw ma-imo' ya kadég yeiy asuntu sa kallat na Tyumanem tadun aw kallat ni Jisus Kristu ya pangulu tadun.