2
Ya utaw na to-o malatay na dumateng adti manga moli na allaw
1 Na, kay manga inulug, awun pa un nami paglongun pada mabangal mayu ya pagliku' na tagtun kanaten na si Jisus Kristu aw ya pag-imun nan kanaten dun ni balintenga-an. Migsekat kami na 2 dili' kamu maksay magkallek aw dili' magkabélét ya anenganeng mayu kun awun utaw na mag-ubat-ubat maglong na dyumateng da kunu ya allaw na pagliku' ni Jisus. Dili' mayu pagbetang adti anenganeng mayu ya tingeg nilan, pangkay pigpa-ede' kunu silan na Ispiritu na Tyumanem, aw pangkay miglong silan na yan kunu ya kanami pigpalna-u aw pigsulat. 3 Dili' kamu magka-agad-agad sa paglong nilan. Pa-ede' ku kamayu ya tengteng matinaw: Sa wala' pa ya allaw na pagliku' ni Jisus, dumateng una ya dakula' na pag-atu. Aw dun da kabukasi ya sambuk na utaw na to-o malatay na un magpalansa'. Kaliman nan lanasen galu ya kadég na sugu' na Tyumanem adti anenganeng na manga utaw. Dala͡en nan asini tas na lupa' ya madég na mangkalatay, manang yan saba ya datengan nan ya danaw na atulun. 4 Kaliman nan magpaka Tyumanem. Magpalibantug adti manga utaw maglong, “Matas pa aku kay sa kadég na manga tyumanem mayu aw manga inutaw na pyansimba mayu.” Aw mingkud sakanan adti seled na Témplo na Tyumanem na un kita͡en na kadég na utaw aw maglong, “Aku ya tyumanem.”
5 Kay manga inulug ku, wala' pa gya mayu kalingawi ya kadég yeiy na piglong ku kamayu sa adtu pa aku ni sayid mayu dun ni Téssalonika. 6 Kya-ede-an da mayu kun unu ya nyakabalabag sa utaw yan taman adun na wala' pa dateng ya allaw na magpalansa' sakanan. 7 Manang pangkay wala' pa kabukasi, migpalekat da na tagu-tagu' ya paglanas sa kabagseg na uldin na Tyumanem adti anenganeng na manga utaw. Manang awun uman sambuk na nyakabalabag kanan pada dili' makalos ya malatay, taman na allaw na kamangen da ya nyakabalabag kanan. 8 Aw pagkatigkas yan, bukasan da ya utaw yan na malatay. Manang pagliku' na pangulu tadun na si Jisus, un nan pakita' ya kanan pagka Tyumanem, aw degen nan ya utaw yan aw patayen magi sa pag-eyep nan.
9 Na, pada ka-ede-an mayu, ya utaw yan na to-o malatay, talana dili' pa sakanan degen, mag-imo' sakanan sa madég na dadela͡en aw pangilala magi sa tulus ni Satanas 10 pada ka-akalan ya manga utaw na wala' pangintu-u aw yeiy ya kagamakan nilan kay kyele͡an nilan ya katinawan na makapaluwa' kanilan. 11 Aw asuntu na dili' silan malim mangintu-u, balukun na Tyumanem ya kanilan anenganeng pada dili' nilan ka-ede-an kun unu ya matinaw aw pangintu-uwan nilan ya galu'. 12 Ya sampetan nan, ukuman silan na Tyumanem kay pigkele͡an nilan ya matinaw aw kyatutukan silan sa manga imo-unun na malatay.
Ya pagpakasalig sa pagpangintu-u tadun
13 Kay manga inulug na pigginawa͡an na Tyumanem, dili' nami agaw tengteng kalingawan ya pagpasalamat adti kanan asuntu kamayu. Kay asini muna sa pagpalekat nan pag-imo' sa kadakula' na banwa, dadan da kamu nan pigpamalli' na un kamu paluwa-en aw ma-imo' kanan manga utaw, magi sa pag-imo' na Ispiritu nan aw magi sa pagpangintu-u mayu sa katinawan na lekat adti Tyumanem. 14 Aw pigtawag kamu nan magi sa madyaw na ubat-ubat kan Jisus na pigpa-ede' nami kamayu, aw pyangintu-uwan mayu. Aw yan ya du-an na pigtawag kamu nan, na un kamu makatagtun sa bagi' dun ni allaw na pagliku' ni Jisus Kristu ya tagtun kanaten aw maka-akup kamu adti to-o madyaw na kalalamdagan na pagka Tyumanem nan. 15 Yanagaw, kay manga inulug, pakasaliga mayu ya kamayu pagpangintu-u aw dayawa adti anenganeng mayu ya kadég na pigpalna-u nami kamayu, pangkay piglong nami dun ni sayid mayu aw pangkay adti manga sulat na pigpadala nami.
16-17 Na, nyanawagtawag kami adti Tyumanem aw migsekat kami na pakaganen nan ya ginawa mayu aw pakabagsegen dun ni kadég na pigpan-imo' mayu na madyaw aw kadég uman na piglong mayu. Kay pigginawa͡an kitadun na kanaten Ama na Tyumanem aw tagtun kanaten na si Jisus Kristu. Dakula' ya kallat nan kanaten aw dakula' uman ya imanen tadun kay kya-ede-an da tadun ya kanaten datengan adti kamoliyan na allaw.