3
Ya sekat ni Pablo sa panawagtawag na manga mangintu-uway
1 Na, sa dili' pa nami tigkasen ya sulat ini, awun pa paglongun nami kamayu. Kay manga inulug, panawagtawagi beg kami adti Tyumanem na maksay galu mabekkal ya madyaw na ubat-ubat kan Jisus adti madég pa na manga utaw aw basa͡an nilan aw dawaten nilan, kasiling na pagdawat mayu idtu muna. 2 Aw pagsekat kamu uman na tamengan kami na Tyumanem adti manga utaw na malat ya bet, kay dili' alag ya kadég na utaw nyangintu-u kan Kristu.
3 Kya-ede-an da tadun na pagtumanen ni Jisus ya kadég na pigpakang nan aw yanagaw dili' sakanan sumala' magpakabagseg sa pagpangintu-u mayu aw magtameng kamayu lekat adti manga kapandayan ni Satanas. 4 Asuntu na si Kristu Jisus da ya syaligan mayu, syumalig da kami na pigdalug mayu adun ya kadég na pigpalna-u nami kamayu idtu muna aw magpadeleg kamu dumalug. 5 Migsekat kami adti kan Jisus na gagaden nan ya anenganeng mayu na un mayu kalabetan ya kadakula' na ginawa nan aw tabangan kamu nan na magkasiling kamu kan Jisus dun ni pagti-is nan sa madég na kalugan.
Ya pamene' ni Pablo na dili' kitadun magkataka
6 Na, kay manga inulug, asuntu na pig-atagan da kami na katundanan dun ni ngalan ni Jisus Kristu na tagtun kanaten, awun pamene' nami na un mayu dalugun: Kun awun manga mangintu-uway na dili' malim magtalabahu aw dili' magdalug sa palna-u nami kamayu, magpa-awat kamu kanilan. 7 Kya-ede-an da mayu ya madyaw na imo-unun kay nya-imo' kami pundinganan adti kamayu talana pa nami adti sayid mayu idtu na muna. Wala' ya kataka nami 8 aw wala' kami pagsalig kamayu. Gabi aw allaw migtalabahu kami aw to-o kami nyapagud kay beke' na kalim nami ya magpakalug kamayu pangkay sambuk. 9 Yeiy ya pigpan-imo' nami pada silingan mayu kami, pangkay awun katundanan nami lekat kan Kristu aw yanagaw atagan kami galu na kanami kapelekan. 10 Kay talana nami adti sayid mayu, pyalna-uwan kamu nami sa maynini: Pangkay singalan utawa ya dili' magtalabahu, dili' sakanan pakanen.
11 Manang awun kunu manga utaw dun ni kamayu na dili' magtalabahu. Kaliman nilan olo' mangilabet adti manga imo-unun na eped na manga utaw. 12 Yanagaw, asuntu na awun katundanan nami lekat adti pangulu na si Jisus Kristu, manginayu' kami sa manga utaw yan, long nami, “Tibulluka mayu ya pagtalabahu na un mayu kamangan sa kapelekan mayu, aw dili' magpangilabet sa pag-eya' na manga eped mayu.”
13 Manang kamu na manga inulug na mangkaseb magtalabahu, dili' mayu pag-ilaban ya imo-unun mayu na madyaw. 14 Kun awun utaw adti kamayu na kyumele sa manga pamene' nami asini sulat, bantayan mayu sakanan aw dili' kamu magpa-iyeped kanan, pada mamulamula sakanan. 15 Dili' mayu pag-imo-un po-on, manang pagsagda͡an mayu baling pada katulidan ya bet nan, kay yan saba ya inulug mayu na nyangintu-u.
Ya kamoliyan na piglong ni Pablo
16 Na, migsekat kami adti kan Jisus na atag nan kamayu ya kanan kalinaw pangkay unu ya un dumateng kamayu, kay yan ya tyugbulan sa kadég na kalinaw. Gayed awun sakanan ni sayid na kadég mayu.
17 Aku, si Pablo, ya migpirma asini katigkasan na sulat ini, kay yan ya kanak katanem adti kadég na sulat ku pada ka-ede-an mayu na aku tengteng ya migpasulat. 18 Gayed awun ni kadég mayu ya kadyawan ni Jisus Kristu ya tagtun kanaten. (Checked by Sammy, Saman and Bong 4-26-06. RSV check - Becky) (5-4-06 A few changes made as per Jun--but didn't read whole thing) (Comp checked by Pastors' Seminar on May 21-22, and by Alifonso and Padilla mga June 7, 06) (consultant check 9/27---)