1 Timotiyo 5

Ya palna-u ni Pablo kan Timotiyo sa manga balu, aw manga maggagagaday, aw manga allang

¹ Ila' aw magsagda kaw sa eseg na unud da ya ginawa, dili' mu pagpamuligsa-an manang dayaw mu sakanan dasigen na dalugun nan ya matinaw na palna-u, siling na paglong mu sa kanmu ama. Aw ya manga eseg na mangud pa ya ginawa, dayaw mu silan paglongun siling na kanmu kaylug. ² Aw ya manga ka͡ubayan na unud da ya ginawa, paglongun mu silan siling na kanmu ina. Aw ya manga ka͡ubayan na mangud pa ya ginawa, paglongun mu silan na siling na kanmu bubay na malinis ya anenganeng mu kanilan.

³ Na, pakadyawun mayu ya pagdala sa manga ka͡ubayan na nyabalu na wala' da ya kanilan kakamangan. ⁴ Manang kun awun balu na awun manga mangayse' nan aw manga umpu nan, silan da ya umba' tumabang kanan, kay pig-atag da kanilan na Tyumanem ya pagdiyaga sa kanilan mangkatikadeng. Aw dun da nilan kabalusi ya kadyaw na pagpatulin kanilan. Aw katutukan saba ya Tyumanem sa pagtabang nilan sa balu. ⁵ Manang ya balu na wala' ya kadégan nan, Tyumanem da olo' ya pigsaligan nan. Gayed sakanan nyanawagtawag adti kanan pangkay gabi aw allaw, aw migsekat sa tabang nan. ⁶ Manang ya balu na gayed dyumalug sa pagkaliman na pagka-utawun nan, pangkay utaw pa sakanan manang wala' da ya ginawa nan sa Tyumanem. ⁷ Pamene' mu yeiy adti manga mangintu-uway pada wala' ya sala-en kanilan. ⁸ Pangkay singalan ya dili' magtabang sa kadégan nan, labi la ya kanan pamilya, pigbalyaw da nan ya kanan pagpangintu-u, aw malat pa sakanan sa utaw na wala' pangintu-u.

⁹ Na, ya balu na kaneman da ya umay nan, yan ya umba' mayu tabangan: kun mig-iganget ya pangugnanay nilan ya eseg nan idtu muna, ¹⁰ aw kun pigsaya' sakanan na manga utaw asuntu sa pigpan-imo' nan, aw kun madyaw ya pagpatulin nan sa manga mangayse' nan, aw kun nyamasa sakanan sa manga utaw na lyumaba' adti balay nan, aw kun migpadalem sakanan magsanggila' sa manga mangintu-uway, aw kun migtabang sa manga makalalat, aw kun gayed nan pigtibulluk ya anenganeng nan adti manga imo-unun na madyaw.

¹¹ Manang ya manga balu na mangud pa ya ginawa nilan, dili' mu pagsulaten ya ngalan nilan adti listahan na manga balu na umba' tabangan. Kay ila' aw malim silan galu mangugnan pa salut, pagaw dili' da matibulluk ya anenganeng nilan adti imo-unun ni Kristu na pigtaligu kanilan. ¹² Aw dun da baling kabugtu' ya pakang nilan kanan aw pasala-en silan. ¹³ Aw ya sambuk uman na du-an na dili' sulaten ya ngalan nilan adti listahan, pagaw magkataka silan aw manumbalayan, aw gayed silan baling magpangilabet adti manga eped na utaw aw magsugpaten sa manga tingeg. ¹⁴ Yanagaw ya kanak palna-u sa manga balu na mangud pa ya ginawa, madyaw pa kun mangugnan uman silan, aw mag-ise' pa, aw pakadyawun nilan ya pagdala sa kanilan pag-eya'. Kun maynan ya pig-imo' nilan, wala' ya makapaglong na po-on na malat adti kanaten na nyangintu-u. ¹⁵ yeiy ya pamene' ku kay awun manga balu na nyakasuway da aw dyumalug baling sa palna-u na lyumekat adti kan Satanas.

¹⁶ Kun awun ka͡ubayan na nyangintu-u aw awun kadégan nan na balu, madyaw galu yan ya magtabang sa balu yan, pada dili' kabegatan ya kasakupan na mangintu-uway sa pagtabang kanan, aw mabatug pa nilan ya pagtabang sa manga balu na wala' ya kanilan pagsaligan.

¹⁷ Ya manga utaw na pigtaliguwan sa paggagad sa manga mangintu-uway, kun madyaw ya pagdala nilan, basa͡an mayu silan aw atagan sa tandan na umba' sa pagud nilan, labi la silan na migkaseb mig-ubat-ubat sa tingeg na Tyumanem aw migpalna-u sa kakawasan nan. ¹⁸ Kay awun pundinganan na pigpasulat nan asini muna: ‘‘Kun mig-ani la kamu aw kun pataguna' mayu sa kapun na baka ya kamayu pig-ani, dili' mayu pagpungusun ya baka' nan, kay ya pigkan nan palangad tandan da kanan.’’ Aw awun uman piglong: ‘‘Tandanan ya magtalabahuway sa pagud nan.’’

¹⁹ Dili' kaw magka-agad-agad sa diklamu adti sambuk na maggagaday kun dili' matinawun na duwa aw tulu ya utaw. ²⁰ Manang kun awun maggagaday na gayed nyakasala', pagsagda͡an sakanan adti asdangan na kadég na mangintu-uway, pada mallek ya manga eped aw dili' silan dumalug adti pagpakasala' nan.

²¹ Na, sugu-un ta kaw adti asdangan na Tyumanem aw asdangan uman ni Kristu Jisus aw manga anghil na pigpamalli' nan, kay alag silan sistigus sa pigpalna-u ku. Ka͡agadan mu ya kadég na pyamene' ku. Dili' kaw magkibang sa utaw aw dili' mu pag-apitan ya sambuk. ²² Dili' kaw uman maksay magpamalli' sa utaw na un ma-imo' maggagaday sa manga nyangintu-u, pagaw awun sala' nan na wala' mu ka-ede-i aw pagaw iman na manga utaw aw tyande' mu ya sala' nan. Pakatanawi ya kanmu pagka-utawun aw pagpa-awat kaw sa malatay. ²³ Na, asuntu na malikit kaw kyedelan, kay Timotiyo, beke' olo' galu na tubig ya pag-inemen mu, manang dili' kaw magduwaduwa mag-inem sa tagbi' na bino kay yan ya pagbulung sa bati-enen na buntit mu. ²⁴ Aw dun ni pagpamalli' mu sa un taliguwan sa imo-unun na Tyumanem, dili' mu pagkalingawan ya ini: Awun manga utaw na kya-ede-an da dadan ya manga sala' nilan pangkay wala' pa ya pag-usay kanilan, manang ya manga sala' na eped na utaw wala' pa kabukasi. ²⁵ Kasiling maynan uman ya madyaw na imo-unun. Awun manga imo-unun na utaw na ka-ede-an maksay, manang pangkay dili' maksay ka-ede-an, kabukasan saba kagaya.