1 Timotiyo 4

Ya galu-un na manga magpalna-uway

¹ Na, mabangal to-o ya piglong na Ispiritu na Tyumanem na adti manga moli na allaw awun manga mangintu-uway na pasuwayen dun ni pagpangintu-u kay un silan dumalug sa manga ispiritu na maggaway aw sa palna-u na manga busaw. ² Ya palna-u yeiy iman mu aw matinaw, manang magtallalingu' ya manga utaw na magpalna-u seiy, aw kyegbelan ya anenganeng nilan liwan na pigdenan na putaw na pigpagba. ³ Pigpigilan nilan ya manga utaw na dili' mangugnan. Aw pigpigilan nilan uman na dili' kuman sa eped na manga punganan na kakanenen, pangkay pig-imo' na Tyumanem ya kadég yeiy na un galu dawaten na manga mangintu-uway aw pasalamatan kay kya-ede-an nilan ya matinaw na palna-u. ⁴ Kay alag madyaw ya pig-imo' na Tyumanem aw wala' galu ya un kele͡an na manga utaw manang dawaten baling aw pasalamatan nilan adti kanan, ⁵ kay piglinisan na Tyumanem magi sa dadan na piglong nan aw magi uman sa pagpanawagtawag na manga mangintu-uway.

Ya pamene' kan Timotiyo kun unu ya bet nan adti manga mangintu-uway

⁶ Kun yeiy ya palna-u mu adti manga inulug ta na nyangintu-u, madyaw kaw na sugu-anen ni Kristu Jisus. Kay lekat pa na pagkatagbi' mu, kyapalna-uwan kaw gayed sa tingeg na Tyumanem, aw kenne' pa mu dyalug ya matinaw na palna-u. ⁷ Dili' mu pagsapadan ya manga allaw dun ni manga kasampetanen na wala' ya guna kay wala' yan lekat adti Tyumanem. Tibulluka baling ya pagsiling sa bet na Tyumanem aw daluga ya kanan pagkaliman. ⁸ Kay awun ma-untung tadun kun tibullukun tadun ya kanaten ginawa adti pagnalam sa kanaten manga lawas pada magkabagseg, manang to-o pa dakula' uman ya ma-untung kun tibullukun ta ya kanate' anenganeng adti kana Tyumanem. Aw yan saba ya ma-untung ta, ya ginawa na lyumekat adti Tyumanem, beke' olo' na adun asini tas na lupa' manang adtu uman ni tas na langit. ⁹ Matinaw saba ya palna-u yeiy aw umba' pangintu-uwan na kadég na utaw. ¹⁰ Yanagaw nyapagud kita sa manga imo-unun ni Kristu. Kay ya Tyumanem na dili' magkamatay, yan ya indeganan na kanate' pag-imanen, kay Magpaluwa-ay saba sakanan, aw paluwa-en nan ya kadég na mangintu-u kanan. ¹¹ Yanagaw to-o mu palna-u ya manga pamene' yeiy.

¹² Na, pagaw palipaslipasan na eped na utaw ya palna-u mu asuntu na dili' pa unud ya ginawa mu, yanagaw ma-imo' kaw pundinganan adti manga mangintu-uway sa kadég na imo-un mu: dun ni manga tingeg mu, aw sa pagdala mu sa kanmu pag-eya', aw ya pagginawa mu sa manga utaw, aw ya pagpangintu-u mu na masalig, aw ya anenganeng mu aw manga imo-unun mu na wala' ya malipa'.

¹³ Sa dili' pa aku dumateng adti kamayu, pagkaseb kaw pagbasa sa tingeg na Tyumanem dun ni manga katipun mayu. Tibullukun mu ya ginawa mu adti pag-ubat-ubat na un pakabagsegen ya pagpangintu-u na manga utaw, aw palna-uwan mu silan. ¹⁴ Kay kya-anenganengan mu ya pagkatipun na manga maggagagaday idtu muna aw ya pagbetang nilan sa kanilan palad adti tas na ulu mu aw ya pagpanawagtawag nilan kanmu adti Tyumanem, na dun da kaw atagi na katundanan. Aw magi sa piglong nilan kya-ede-an mu ya kaliman na Tyumanem kanmu. Yanagaw, dili' mu pagpabaya-an ya katadeng na pig-atag da kanmu na Ispiritu na Tyumanem, aw dili' mu pagkalingawan ya piglong nilan. ¹⁵ Tibulluka ya kanmu ginawa aw pagkaseb kaw sa kadég yeiy na pigtaligu kanmu, pada kita-en na kadég na utaw na to-o la kaw matadeng maggagad kanilan. ¹⁶ Gayed mu pakatanawan ya kadég na imo-unun mu aw palna-u mu, aw padelegen mu ya pagpalna-u sa tengteng matinaw. Kay kun yeiy ya imo-un mu, paluwa-en mu ya kanmu pagka-utawun aw ya manga utaw na migpakanyeg kanmu, pada dili' makasuway ya kamayu pagpangintu-u.