3
Ya bet na utaw na taliguwan sa paggagad sa mangintu-uway
1 Matinaw saba ya palna-u ini: ‘Kun awun utaw na kaliman nan taliguwan sa paggagad sa manga mangintu-uway, to-o madyaw ya pagkaliman nan.’ 2 Aw yan ya utaw na umba' pamalli-en na un maggagad kanilan, ya eseg na wala' ya un pagsala' sa bet nan. Sambuk da ya ka͡ubayan nan aw dayaw mag-iganget ya pangugnanay nilan. Matadeng sakanan magtagen sa pagkaliman na pagka-utawun nan, aw matadeng uman kun unu ya umba' imo-un. Madyaw ya dengeg nan aw magpamasa sa manga utaw na maglaba' adti balay nan. Aw matadeng sakanan magpalna-u. 3 Dili' mati-inem sa magpakalangulangu. Dili' matipanumbagay manang magkallat sa manga eped nan. Dili' mati-ayil aw dili' nan pagginawa͡an ya kuwalta. 4 Madyaw ya kanan pagdala sa ka-epedanan nan adti balay, aw yanagaw pagka͡agadan sakanan na mangayse' nan aw pagbasa͡an nilan. 5 Kay kun ya utaw dili' matadeng magdala sa ka-epedanan nan dun ni balay nan, unun nan ya pagdala sa manga mangintu-uway adti balay na Tyumanem? 6 Aw ya eseg na pamalli-en dili' galu bagu nyangintu-u pagaw magpatastas asuntu na maksay sakanan pigpamalli' aw silingan nan baling ya sala' na busaw, kay ya busaw migpatastas sakanan sa Tyumanem asini muna.* 7 Aw yan ya pamalli-en mayu, ya eseg na pigsaya' uman na manga utaw na wala' ya pagpangintu-u, pada dili' sakanan mulamula͡en aw kaliputan dun ni litag na busaw.
Ya pagpamalli' sa manga dyakono
8 Maynan uman ya manga dyakono.* Yan ya pamalli-en mu ya manga utaw na madyaw da ya dengeg. Matadeng silan magtagen sa kasampetanen na tagu-tagu'. Aw dili' silan mati-inem sa magpakalangulangu. Aw dili' nilan pagginawa͡an ya kuwalta. 9 Yan baling ya betang nilan adti kanilan anenganeng ya pigpa-ede' da na Tyumanem sa pagpangintu-u kan Kristu, aw malinis ya anenganeng nilan na wala' ya pagsala' kanilan. 10 Aw sa wala' pa silan pamalli-a sa pagka dyakono, talamanen silan taliguwan sa manga imo-unun dun ni manga katipun mayu. Kun wala' ya un pagsāla' sa bet nilan, aw kun madyaw ya pagdala nilan sa pigtaligu kanilan, na, dun da silan pamalli-a na ma-imo' dyakono. 11 Aw maynan uman ya kanilan ka͡ubayan, na madyaw ya dengeg nilan aw dili' nilan kalaten ya dengeg na eped na utaw. Matadeng silan magtagen sa pagkaliman na pagka-utawun nilan, aw kasaligan silan sa kadég na imo-unun nilan.
12 Ya utaw na ma-imo' dyakono, sambuk da ya ka͡ubayan nan aw dayaw mag-iganget ya pangugnanay nilan. Aw matadeng sakanan magdala sa mangayse' nan aw ka-epedanan dun ni balay nan. 13 Aw kun pakadyawun na manga dyakono ya pigtaligu kanilan, madyaw uman ya dengeg nilan adti eped na utaw, aw dili' silan magkamulamula maglong sa pagpangintu-u nilan kan Kristu Jisus.
14 Na, kay Timotiyo, awun palpa ku na maksay aku galu madti kamayu, manang pigsulat da ku kanmu ya manga pamene' yeiy 15 pagaw awun salang ku, pada ka-ede-an mu kun wan galu ya imo-un na kadég na utaw na nyaka-akup adti kasakupan dun ni balay na Tyumanem, na yan ya tengteng Tyumanem. Silan saba ya siling na manga aligi aw palangad sumbak kay pigtaliguwan silan sa madyaw na ubat-ubat kan Kristu. 16 Aw kya-ede-an na kadég tadun na to-o madyaw ya pigbangal da na Tyumanem. Asini muna wala' pa kabangal, manang pigpa-ede' da nan aw pyangintu-uwan tadun aw gayed tadun piglong, na:
Si Kristu ya pigpaka-utaw na Tyumanem,
aw pigmatinaw na Ispiritu na Tyumanem na wala' ya sala' nan,
aw kyinita' sakanan na manga anghil.
Pig-ubat-ubat sakanan adti manga nasud,
aw pyangintu-uwan da na madég na utaw,
aw nya-engat sakanan adti tas na langit.
Alag yeiy wala' kabangal asini muna, manang adun to-o la nyabangal.