2
Ya pamene' sa pagpanawagtawag adti Tyumanem
1 Na, awun pa paglongun ku kanmu. Dili' mu pagkalingawan ya pagpanawagtawag adti Tyumanem sa kadég na manga utaw. Padatengen tadun adti asdangan nan ya pigsekat tadun kanilan. Aw pangkay unu ya kapelek nilan, manginayu' kitadun kanan na tabangan silan. Aw gayed tadun silan pasalamatan adti kanan. 2 Aw dun ni pagpanawagtawag tadun adti Tyumanem, dili' kalingawan ya manga hari' aw ya kadég na migdumala kanaten, pada madyaw galu ya kanaten pagpakabetang aw malinaw ya kanaten pag-eya', aw dun da mabatug tadun simba͡en ya Tyumanem aw silingan ya kanan bet. 3 Ila' aw manawagtawag kitadun siling na maynan, yeiy ya madyaw imo-un aw makatutuk sa Tyumanem na kanaten Magpaluwa-ay, 4 kay kaliman nan na ka-ede-an na kadég na utaw ya matinaw na palna-u aw paluwa-en silan. 5 Kay sambuk da olo' ya Tyumanem, aw sambuk da ya migkagun sa manga utaw adti Tyumanem, na yeiy si Kristu Jisus na migpaka-utaw 6 aw migtumbay sa pagka-utawun nan na un maglekat sa kadég na manga utaw. Aw yanagaw, dun ni allaw na pigpamalli' na Tyumanem, si Jisus ya migmatinaw sa pagkaliman na Tyumanem na paluwa-en silan. 7 Aw yeiy ya du-an na pigsugu' aku nan na magbekkal sa madyaw na ubat-ubat kan Kristu. Pig-imo' aku nan saba apostol, aw matinaw beg ya piglong ku yeiy aw beke' na galu'. Aw pigsugu' aku nan adti manga utaw na Héntil na un ku pa-ede' adti kanilan ya matinaw na palna-u kan Kristu pada mangintu-u silan.
8 Yanagaw yan ya kanak kaliman, na pangkay kinunu kamu pagkatipun, ya manga eseg ya maggagad sa manga utaw manawagtawag adti Tyumanem, * taman na manga eseg na malinis ya anenganeng nilan aw wala' ya kadaman nilan aw dili' magpanugbuk sa ayil.
9 Aw maynan uman, ya manga ka͡ubayan, sa pagsambuk nilan dun ni pagpanawagtawag adti Tyumanem, madyaw galu sutun nilan ya kadégkadég na umba' sa pagpanimba, beke' na kadégkadég na makapamulamula kanilan. Dili' silan magpakita-kita' aw dili' nilan pasobla͡an ya kanenggeya na kanilan lugay aw ya pagsut sa manga bulawan aw perlas aw kadégkadég na to-o mahal. 10 Kay kun miglong ya ka͡ubayan, ‘‘Dyalug ku ya palna-u na Tyumanem,’’ yan baling ya umba' nan pakita' ya bet na Tyumanem magi sa manga imo-unun nan na madyaw.
11 Aw kun palna-uwan ya manga ka͡ubayan, dayaw nilan pakanyegan aw ka͡agadan nilan ya matinaw na palna-u. 12 Dili' ku tumbay ya manga ka͡ubayan na palna-uwan nilan ya manga eseg, manang magpakanyeg baling silan. Aw dili' silan uman atagan na katundanan magdumala sa manga eseg. 13 Kay ya muna pig-imo' na Tyumanem si Adam, aw tigkas yan si Iba ya pigpamoli nan. 14 Aw beke' ni Adam ya piggawayan ni Satanas, manang ya ka͡ubayan baling, aw kyalakadan nan ya pigpigil na Tyumanem aw dun da sakanan pakasala'.* 15 Manang magi sa pag-ise' nan, paluwa-en ya ka͡ubayan kun magpadeleg sakanan mangintu-u * aw maggaginawa͡ay silan ya eseg nan aw silingan nilan ya bet na Tyumanem eped na katadeng kun unu ya umba' nilan imo-un.