Ya Tagna' na Sulat ni Apostol Pablo adti
kan Timotiyo
1
1 Kay inulug Timotiyo, aku si Pablo ya migsulat adti kanmu. Nya-imo' aku apostol ni Kristu Jisus asuntu saba sa pagsugu' kanak na Tyumanem na kanaten Magpaluwa-ay aw si Kristu Jisus na yan ya kanaten pag-imanen.
2 Pigsulatan ta kaw, kay Timotiyo, ikaw na siling na tengteng ise' ku kay migsambuk da kita dun ni pagpangintu-u ta kan Jisus.
Padatengen galu kanmu ya kadyawan aw kallat aw kalinaw na lyumekat adti Tyumanem ya Ama tadun aw adti kan Kristu Jisus na tagtun kanaten.
3 Idtu muna sa pagpanaw ku pasinan adti probinsiya na Macédonya, migsekat aku kanmu na magpatagak pa kaw dun ni syudad na Épéso. Aw adun, salutun ku ya pagpamene' na magpadeleg kaw sa imo-unun mu dun ni Épéso. Kay awun manga utaw na migpalna-u sa sangkamulu', aw yanagaw ikaw ya maglong kanilan na botonan nilan ya maynan na palna-u. 4 Aw dili' silan magka-agad-agad sa manga kasampetanen na pig-imo-imo' na manga Judiyu sa kanilan manga muna utaw. Kay ya manga kasampetanen yeiy madég to-o na dili' ma-iyap manang ya eped beke' na matinaw aw piglekatan baling na ayil. Aw pamene-an mu silan na liku-un ya pigtaligu kanilan na Tyumanem aw gagaden nilan ya manga mangintu-uway dun ni matulid na palna-u kan Kristu. 5 Na, yan ya du-an nan na pamene-an silan, pada maggaginawa͡ay ya kadég na manga nyangintu-u. Aw yan ya lyekatan na paggaginawa͡ay nilan, ya anenganeng na malinis aw ya bet na dili' pagsala-en aw ya pagpangintu-u na dili' magtallalingu. 6 Manang awun manga eped na maggagagaday adti kamayu na wala' da nilan baling daluga ya maynan na anenganeng, aw yanagaw migkabuluy da silan lekat adti palna-u na pigtaligu kanilan na Tyumanem. Pigsapadan baling nilan ya kanilan manga allaw dun ni pagbalawbalaw na wala' ya untung. 7 Yan ya kaliman na manga utaw yeiy na awun dengeg nilan magpalna-u sa Uldin na pig-atag na Tyumanem kan Moysis. Manang wala' nilan kalaw ka-ede-i ya piglong nilan! Aw wala' nilan kalabeti kun unu ya pigpalna-u nilan pangkay gayed silan gyumelgel adti asdangan na manga mangintu-uway na matinaw kunu ya palna-u nilan.
8 Na, kya-ede-an ta na madyaw to-o dalugun ya Uldin kun kalabetan na manga utaw ya tengteng tud na Uldin. 9 Kay kya-ede-an ta na ya Uldin wala' imo-a asuntu sa manga utaw na wala' ya sala'. Yan baling ya pig-imo-an sa Uldin ya manga utaw na gayed lyumakad sa manga sugu' na Tyumanem aw wala' silan kalim dalug sa sugu' nan. Pig-imo' saba ya Uldin sa manga utaw na wala' pangintu-u sa Tyumanem aw manga makasasala', aw manga utaw na wala' nilan basabasayi ya kana Tyumanem aw miglong sa malat adti kanan, aw manga utaw na migpakalat sa ama aw ina nilan, aw utaw na nyakabunu' sa eped nan. 10 Aw ya Uldin pig-imo' uman asuntu sa manga magkasala-enen, aw sa tumalag eseg na magkakalimay, aw ya manga magpandampas sa utaw, aw manga galu-un, aw ya manga magmatinaw sa galu' adti asdangan na mag-ukumay, aw awun uman labet na Uldin adti manga utaw na mag-imo' sa pangkay unu na nyatu sa matinaw na palna-u na Tyumanem. 11 Aw ya palna-u yeiy, yan saba ya madyaw na ubat-ubat kan Kristu na migpa-ede' kanaten sa kadyaw na Tyumanem na umba' deyen. Aw yeiy ya palna-u na pigtaligu nan kanak aw pig-ubat-ubat da ku.
12 Dun ni kanak ginawa, dakula' ya utang na dili' ku mabatug kabayadan adti kan Kristu Jisus na tagtun kanaten. Kay adti anenganeng nan kasaligan da aku, aw asuntu sa kallat nan pig-atag da nan kanak na mabatug ku ya manga imo-unun na pigtaligu nan kanak, 13 pangkay idtu muna malat ya bet ku. Pigtampeyes ku baling ya ngalan ni Jisus aw pigpamulayaman ku ya manga mangintu-uway kanan na wala' ya kallat. Wala' pa aku pangintu-u aw wala' ku ka-ede-i na malat kadi' ya pig-imo' ku, aw yan ya du-an na kyallatan aku nan 14 aw dayaw lyumapiya ya kallat nan kanake'. Aw pig-atag nan kanak na mabatug ku ya pagpangintu-u aw mabatug ku ya pagginawa kanan aw sa manga eped ku, na alag yeiy ya pig-atag nan sa kadég tadun na syumambuk da kan Kristu Jisus.
15 Na, ini ya matinaw na palna-u na umba' pangintu-uwan na kadég na utaw: ‘Nyadi si Kristu Jisus asini tas na lupa' pada magpaluwa' sa manga makasasala'.’ Aw aku baling ya to-o malat sa kadég na manga makasasala'. 16 Manang kyallatan aku nan pada ma-imo' aku pundinganan sa kadakula' na pagtagen nan sa kadaman nan, aw dun da galu kita-a na kadég na manga makasasala' ya kallat nan, pada mangintu-u pa silan kanan aw tagtunun nilan ya ginawa na wala' ya tyamanan.
17 Naten basa͡an ya Tyumanem na wala' ya katigkasan;
naten sakanan deyen na umba' sa pagka Tyumanem nan.
yeiy ya Hari' na wala' ya lyekatan aw wala' uman ya tyamanan;
dili' sakanan magkamatay aw dili' sakanan pagkita-en.
Sambuk da olo' ya Tyumanem.
Yan saba ya matinaw. Amén.
18 Na, kay Timotiyo na kasiling na ise' ku, tyaliguwan ta kaw sa manga pamene' adti tas na sulat ini. Kay magi sa pagpanawagtawag na manga maggagagaday idtu muna, pigpa-ede' na Tyumanem ya imo-unun na un nan atag kanmu. * Aw ya piglong nilan, yan ya magpakabagseg kanmu dun ni pag-atu mu sa malatay. 19 To-o awidi ya pagpangintu-u mu kan Kristu aw betangan adti anenganeng mu ya pagdalug sa matinaw na palna-u pada dili' kaw pasala-en. Kay awun manga eped mu dun ni kamayu na kyumele sa matinaw na palna-u kan Kristu aw dun da pagkalat ya kanilan pagpangintu-u. 20 Maynan baling si Himéniyo aw si Aléjandro. Yanagaw pigtumbay da ku silan adti kan Satanas na un nilan kagamakan ya malatay aw dun da nilan ka-ede-i na wala' ya untung kadi' na pigpan-imo' nilan aw dili' da nilan ampangan ya kana Tyumanem imo-unun.*