Ya Sulat ni Apostol Pablo
adti kan Tito
Ya Muna Pagpa-ede'
Singan si Tito?
Si Tito ya sambuk na manga nyangintu-u kan Kristu asuntu sa palna-u ni Pablo, aw pigpa-agad sakanan ni Pablo aw si Bérnabi adti Jérusalim. Mabasa adti Galacia 2:1-3. Si Tito utaw na Grigo na taga Antiyokiya sakup kunu na Sirya, aw beke' sakanan na Judiyu, aw yan ya du-an nan na wala' sakanan tuli-a. Tyumabang sakanan kan Pablo adti syudad na Épéso aw lipadlipad pigsugu' nan adti syudad na Corinto na un tumabang sa manga mangintu-uway kay pigpabelengbeleng silan na manga magpalna-uway dun ni katipun nilan. Mabasa adti 2 Corinto 2:12-13, aw 2 Corinto 7:5-6 aw 8:6. Aw pigsugu' sakanan uman adti pulu' na Krita, aw dun nan dawata ya sulat ni Pablo. Aw kun basa͡en ya 2 Timotiyo 4:10, ka-ede-an da na nyanaw uman si Tito adti probinsiya na Dalmatiya.
Kanu sulati ni Pablo si Tito?
Yan ya pagsulat ni Pablo kan Tito dun na nyakaluwa' da lekat adti pagkalabusu kanan adti syudad na Roma. Yan gya ya bulan na Siptimbri, aw kun dili', bulan na Octobri, na umay na 63.
Unu ya du-an na pigsulatan ni Pablo si Tito?
Yan ya tud ni Pablo asini sulat yeiy, na mamene' kan Tito sa un nan paglongun adti manga mangintu-uway dun ni pulu' na Krita, kay si Tito ya pigtagak ni Pablo adtu pada magpalna-u kanilan.
Na, yan ya pa-agi na dyumateng adti Krita idtu muna ya ubat-ubat kan Jisus: Awun manga Judiyu na taga Krita na tyumambung sa katipun adti Jérusalim sa Allaw na Péntékostés, aw migpakanyeg silan sa pag-ubat-ubat ni Pédro aw nyangintu-u la silan kan Kristu. Aw yanagaw pag-uli' da nilan, pig-ubat-ubat nilan si Jisus aw nyabekkal ya ubat-ubat yeiy dun ni Krita. (Tanawun adti Manga Pigpan-imo' na Manga Apostolés 2:11.)
Aw pangkay madég da ya nyangintu-u dun ni Krita aw madugay silan nyanimba, manang awun madég na puluglima kay awun manga utaw na migpalna-u sa galu' aw awun manga mangintu-uway na Judiyu na miggelgel sa kadég na utaw na dalugun nilan galu ya manga katanem na manga Judiyu. Yanagaw nyabelengbeleng ya manga mangintu-uway. Aw yanagaw piglong ni Pablo kan Tito na palna-uwan nan silan kun unu ya madyaw nilan dalugun.