Tito 1

Ya Sulat ni Apostol Pablo

adti kan Tito

¹ Kay inulug Tito, aku si Pablo ya migsulat adti kanmu. Sugu-anen aku na Tyumanem aw sambuk uman na manga apostolés ni Jisus Kristu. Pigsugu' aku nan pada pakabagsegen ya pagpangintu-u na manga utaw na pigpamalli' na Tyumanem aw ka-ede-an nilan uman ya matinaw na palna-u na lekat adti kanan na un nilan dalugun ya bet nan. ² Aw ya pagpangintu-u yeiy, dun lekat ya pag-iman nilan sa ginawa na wala' ya tyamanan na yéiy ya pigpakang dadan na Tyumanem sa wala' pa nan imo-a ya kadakula' na banwa, aw ya Tyumanem dili' maggalu'. ³ Aw pagdateng da na allaw na pigpamalli' nan, pigpa-ede' da nan ya madyaw na ubat-ubat kan Kristu. Aw magi sa pagsugu' kanak na Tyumanem na kanaten Magpaluwa-ay, pigtaliguwan aku na mag-ubat-ubat adti madég na utaw.

⁴ Pigsulatan ta kaw, kay Tito, ikaw na siling na tengteng ise' ku kay migsambuk da kita dun ni pagpangintu-u ta kan Jisus.

Padatengen galu kanmu ya kadyawan aw kalinaw na lyumekat adti Tyumanem ya Ama tadun aw adti kan Kristu Jisus ya kanaten Magpaluwa-ay.

Ya imo-unun ni Tito dun ni Krita

⁵ Na, kay To', yan ya du-an nan na pigtagak ta kaw dun ni pulu' na Krita na un mu tigkasen ya wala' pa ta kalingeb aw mamalli' kaw sa manga utaw na un maggagad sa manga mangintu-uway adti tag sambuksambuk na lunsud, siling na pigpamene' ku kanmu. ⁶ Aw yan ya pamalli-en mu ya eseg na wala' ya un pagsāla' sa bet nan: Sambuk da ya ka͡ubayan nan aw dayaw mig-iganget ya pangugnanay nilan. Aw ya mangayse' nilan, pigbasa͡an nilan ya kanilan mangkatikadeng, aw dili' silan magka-agad-agad adti malat na imo-unun aw dili' uman sagda͡enen. ⁷ Kay ya utaw na pag-imo-un maggagaday sa manga mangintu-uway, un sakanan taliguwan sa imo-unun na Tyumanem, aw yanagaw dili' galu pagsala-en ya bet nan. Dili' nan pagleges ya kanan pagkaliman manang mag-isambuk ya ginawa nan adti eped. Aw dili' sakanan maksay magkadaman. Dili' mati-inem sa magpakalangulangu aw dili' matipanumbagay. Aw dili' nan pagginawa͡an ya kuwalta. ⁸ Manang magpamasa sakanan sa manga utaw na maglaba' adti balay nan. Kyatutukan sakanan sa madyaw. Matadeng sakanan magdala sa pag-eya' nan, aw ya pagbaya' nan matulid. Nyatibulluk ya ginawa nan adti kana Tyumanem, aw matadeng magtagen sa pagkaliman na pagka-utawun nan. ⁹ Aw ya utaw na pag-imo-un maggagaday sa manga mangintu-uway, dili' sakanan magsuwayenen manang to-o baling masalig ya pagpangintu-u nan sa matinaw na palna-u, pada mabatug nan pakabagsegen ya manga mangintu-uway aw tuliden ya anenganeng na manga utaw na mag-atu sa palna-u yeiy.

¹⁰ Kay madég ya manga utaw na dili' malin dumalug sa matinaw na palna-u, dala ya manga utaw na magkasampetanen na wala' ya guna aw maggaway sa manga eped nilan. Aw maynan to-o ya manga Judiyu na nyangintu-u la kan Kristu, kay migpalna-u silan na tuli-en ya kadég na manga mangintu-uway. ¹¹ Madyaw tampengen ya manga baka' nilan! Kay dun ni pagpalna-u nilan, pigkalat nilan ya pagpangintu-u na madég na utaw, pangkay pilang ka balay ya pigpasuway nilan. Aw mamulamula galu silan kay yan olo' ya tud na palna-u nilan na un silan manguwalta. ¹² Yan saba ya piglong kunu asini muna na sambuk na mananagna-ay na taga Krita, pangkay utaw sakanan dun ni kanilan, manang law nan, “Ya manga utaw ini na taga Krita, galu-un silan. Mabulut aw malat ya bet. Mataka aw ya kaliman nilan ya olo' kuman.” ¹³ Aw matinaw saba ya piglong nan. Yanagaw, kay To', pagsagda͡an silan to-o na dili' da silan mangintu-u sa galu', pada magkasalig ya pagpangintu-u nilan sa palna-u na matinaw, ¹⁴ aw dili' da silan magka-agad-agad sa manga kasampetanen na pig-imo-imo' na manga Judiyu sa kanilan manga muna utaw, aw dili' da uman dumalug sa manga sugu' na manga utaw na tyumalikud da sa matinaw na palna-u. ¹⁵ Ya utaw na piglinisan da na Tyumanem, malinis uman ya anenganeng nilan. Manang ya utaw na wala' pangintu-u kan Jisus, wala' ya kalinis nilan, kay malipa' ya adti anenganeng nilan aw wala' nilan ka-ede-i kun ayin ya madyaw aw ayin ya malat kay nyabaluk ya kanilan anenganeng. ¹⁶ Miglong silan kunu na kya-ede-an da nilan ya Tyumanem, manang dun ni imo-unun nilan liwan na pigbalyaw nilan ya Tyumanem. Mangkalipa' saba silan adti anenganeng nan. Wala' nilan daluga ya palna-u nan. Aw wala' ya un ma-untung adti kanilan kay dili' nilan mabatug ya pag-imo' sa madyaw.