4
Ya paglong ni Pablo kan Timotiyo na bekkalen ya madyaw na ubat-ubat kan Kristu
1 Pagliku' da ni Kristu Jisus na un maghari', yan ya mag-ukum sa kadég na manga utaw, pangkay utaw pa silan aw pangkay nyatay da. Yanagaw, asini asdangan na Tyumanem aw ni Kristu Jisus, sugu-un ta kaw na 2 ubat-ubat mu ya tingeg na Tyumanem. To-o ka͡asebi pangkay kun awun selat mu aw pangkay wala'. Kun awun utaw na nyakasala', dili' mu pagpabaya-an manang paglongun mu sakanan aw pagsagda pada dili' nan padelegen ya pig-imo' nan. Dili' kaw magkalumay dun ni pagdasig mu sa manga mangintu-uway magi sa matinaw na palna-u. 3 Kay un dumateng ya manga allaw na dili' malin ya manga utaw magpakanyeg sa matinaw na palna-u. Maninaw silan baling sa manga utaw na magpalna-u sa kaliman nilan pakanyegan. 4 Kele͡an nilan ya matinaw, aw ka-agad-agadan nilan baling ya dadan na kasampetanen na wala' ya dalid. 5 Manang ikaw, tikbela gayed ya anenganeng mu. Aw pangkay unu ya un dumateng kanmu, magpadeleg kaw. Paglongun mu ya madyaw na ubat-ubat kan Kristu adti madég na manga utaw. Aw imo-un mu ya pigtaligu kanmu na Tyumanem.
Ya pamalintugun ni Pablo
6 Kay dili' madugay, un da aku matay. Tagbi' dakman ya pag-eya' ku asini tas na lupa', siling na sangkatabu' ya bino na tolobo pa pig-asag na yan ya kalingeban na pagdugsu' adti Tyumanem. * 7 Pigtibagsegan ku ya pagpalaguy, aw nyatigkas da ku ya pag-abay aw nyakalagbas da aku adti datenganan. Wala' aku pagsuwayenen dun ni pagpangintu-u ku. 8 Yanagaw awun korona na pigtagilan da ni Kristu na pagtandan nan kanak dun ni kamoliyan na allaw, aw beke' ku olo', manang adti kadég na nyakatagad sa pagliku' nan. Aw matinaw saba ya pagbaya' nan.
9 Na, kay Timotiyo, tibagsegan mu na maksay kaw adi tampid ku. 10 Pig-ayawan da aku ni Démas, kay yan ya pigginawa͡an nan baling ya asini tas na lupa', aw nyanaw da adti Téssalonika. Manang si Crésénté adtu la sakanan ni Galaciya, aw si Tito uman adti Dalmatiya. 11 Dakman olo' si Lukas ya nyasama' ini sayid ku. Yanagaw, angaya kanak si Markos aw pa-agadan adi sayid ku, kay dakula' ya matabang nan kanak asini imo-unun ku. 12 Na, si Tikiko, pigsugu' ku adti Épéso. 13 Aw sa pagkadi mu, dala͡a kanak ya madakmel na sa-ul na pig-ayawan ku adti kan Karpo dun ni Troas. Dala͡a uman kanak ya manga liblu, labi la ya manga sulat adtu na piglulun.
14 To-o malatay ya pig-imo' kanak ni Aléjandro na magtu-angay. Manang Tyumanem da ya magbaya' kanan sa pig-imo' nan. 15 Magpakatadeng kaw uman sa utaw yan, kay to-o nan pig-ampangan ya kadég na palna-u ta. 16 Adti tagna' na pag-usay sa limanda kanak, wala' ya utaw na migtameng kanak. Alag silan nyalaguy. Manang pigsekat ku adti kan Kristu na pasinsiya͡an nan silan. 17 Pangkay pig-ayawan aku nilan, manang wala' aku ayawi ni Kristu. Dun ni pag-usay kanak, pigpakabagseg nan ya ginawa ku maglong sa madyaw na ubat-ubat kanan pada denggen na kadég na Héntil na awun ni pag-usay. Yanagaw pigtabangan aku nan pada dili' pa aku patayen. 18 Aw kya-ede-an ku na tabangan pa aku nan lekat adti kadég na malatay taman na allaw na angayen aku nan aw pa-agad adti kasakupan na paghari' nan adti tas na langit. Aw si Kristu ya pagdeyen na wala' ya tyamanan! Yan saba ya ma-imo'.
19 Pangumusta͡an beg aku kan Priscila aw si Akila aw ya ka-epedanan ni Onésiporo dun ni balay nan. 20 Migpatagak pa si Érasto adti Corinto, aw si Tropimo pigtagak ku adti lunsud na Miléto kay to-o sakanan kyedelan. 21 Pagtibagseg kaw madi sa dili' pa dumateng ya manga bulan na to-o maniki' ya samet. Nyangumusta kanmu si Yubulo, aw maynan uman si Pudénté, aw si Lino, aw si Cla͡udiya, aw ya kadég na manga mangintu-uway asini.
22 Gayed awun si Kristu adti kanmu ginawa. Aw gayed awun ni kadég mayu ya kadyawan nan.