3
Ya madég na manga kallekanan adti manga kamoliyan na allaw
1 Na, madyaw kun kalabetan mu ya ini, na dun ni manga kamoliyan na allaw, un saba dumateng ya madég na kallekanan, 2 kay yan ya un ginawa͡an na manga utaw ya pagka-utawun nilan aw ya pagdalug sa kuwalta. Magpalibantug silan aw magpatastas. Paglongun nilan ya manga eped nilan na malat. Mati-atu silan sa mangkatikadeng nilan aw dili' nilan kabalusan. Dili' nilan uman pagbasa͡an ya Tyumanem. 3 Dili' nilan pagginawa͡an ya kanilan kadégan aw dili' silan malim magsambuk ya anenganeng na manga utaw. Kalaten nilan ya dengeg na eped na utaw, aw wala' ya katadeng nilan magtagen sa pagkaliman na pagka-utawun nilan. Wala' ya kallat nilan sa pangkay singalan, aw wala' ya ginawa nilan sa pangkay unu ya madyaw. 4 Pangkay kanilan manga ubaybay paglubidan nilan baling. Aw pangkay unu ya un nilan imo-un, dili' nilan anenganengen ya un sampetan. Kaliman nilan olo' patasen ya kanilan dengeg. Ya manga utaw yeiy, dili' nilan pagginawa͡an ya Tyumanem manang yan baling ya pagginawa͡an nilan ya asini tas na lupa'. 5 Pakita-kita' nilan adti manga eped ya kanilan rélihiyun, manang balyaw nilan ya katulus na Tyumanem. Pagpa-awat kaw sa manga utaw na maynan!
6 Kay awun manga eped kanilan na magpanik sa manga balay aw matadeng magpanggaway sa manga ka͡ubayan magi sa palna-u nilan na galu'. Kay ya manga ka͡ubayan yan, wala' pakadalid ya pagpangintu-u nilan kay kyabegatan silan na manga sala' nilan aw maksay silan magka-agad-agad adti pangkay unu na pagkaliman nilan. 7 Pakanyegan nilan ya manga bagu na palna-u, manang dili' nilan ka-ede-an kun ayin ya palna-u na matinaw. 8 Ya manga utaw na maggaway sa manga ka͡ubayan na maynan, alag da nyangkabaluk ya anenganeng nilan aw wala' ya guna na pagpangintu-u nilan kay magtallalingu silan. Gayed nilan pig-ampangan ya matinaw na palna-u, siling na pag-ampang ni Janés aw si Jambrés kan Moysis asini muna.* 9 Manang dili' magpadeleg ya palna-u nilan kay dili' madugay ka-ede-an na eped na silan ya utaw na walay balansi, siling saba na dyatengan ni Janés aw si Jambrés.
Si Pablo pundinganan adti kan Timotiyo
10 Manang ikaw, kay Timotiyo, kya-ede-an mu ya kanak pigpalna-u, aw ya bet ku, aw ya kanak tud. Kya-ede-an mu uman ya kanak pagpangintu-u, aw ya pagtagen ku sa kadaman ku adti manga utaw, aw ya dakula' na ginawa ku kanilan, aw ya pagpadeleg ku 11 pangkay pigpamulayaman aku na manga utaw aw pigpati-is. Kya-ede-an mu ya kadég na dyumateng adti kanak dun ni Antiyokiya na sakup na Pisidiya, aw adti Ikoniyo, aw adti Listra, na to-o aku pigpamulayaman, manang migpadeleg aku kay pigtabangan aku ni Kristu. 12 Aw ya kadég na utaw na malim dumalug sa palna-u ni Kristu Jisus, un saba silan pamulayaman na utaw asini tas na lupa', 13 manang ya eped na manga utaw na malat ya bet aw utaw na magtallalingu, to-o pa nilan dugangan ya malat na imo-unun. Maggaway silan sa eped na manga utaw aw kagawayan uman silan.
14 Manang ikaw, padelegen mu ya pagpangintu-u sa kadakula' na pigpalna-u kanmu idtu muna, kay kasaligan ya manga utaw na migpalna-u kanmu aw yanagaw kya-ede-an mu na matulid ya kanilan palna-u. 15 Kay lekat na tagbi' pa kaw, kyapalna-uwan kaw sa manga pigpasulat na Tyumanem asini muna * na yeiy ya miggagad sa anenganeng mu na nyangintu-u kaw kan Kristu Jisus. Aw magi sa pagpangintu-u mu kanan, paluwa-en kaw lekat adti pa-emel-emel na Tyumanem.
16 Ya kadég na pigpasulat na Tyumanem lyumekat saba adti ginawa nan aw dakula' to-o ya ma-untung tadun. Kay dun da tadun ka-ede-i ya tengteng matinaw aw dun uman ka-ede-i ya manga sala' tadun. Aw magi uman sa pigpasulat nan, mabatug tuliden ya utaw na nyakasuway, aw gayed palna-u kanaten ya bet na Tyumanem. 17 Aw kun nyatibulluk ya anenganeng na utaw adti pigpasulat na Tyumanem, yan ya makapatagilan kanan sa pangkay unu ya madyaw na imo-unun.