2
Ya pagdasig ni Pablo kan Timotiyo
1 Yanagaw, kay Timotiyo na palangad ise' ku, pagtibagseg kaw magi sa katulus na Tyumanem na nyatagtun da mu asuntu na syumambuk da kaw kan Kristu Jisus. 2 Aw ya palna-u na pigdengeg mu adi kanak idtu muna, pigmatinaw da na madég na manga utaw. Yanagaw, taligu mu yeiy adti manga utaw na kasaligan na un nilan uman palna-u adti eped pa na manga utaw.
3 Magad kaw kanak sa pagti-is ku, siling na madyaw na sundalu ni Kristu Jisus. 4 Kay ya sundalu dili' nan pagsagunutun ya anenganeng nan dun ni manga imo-unun na sibiliyan, manang tibullukun nan baling ya kanan anenganeng adti pagka sundalu nan pada katutukan ya matas nan. 5 Maynan uman, nyatibulluk ya anenganeng na utaw na nyalaguy adti pag-abay. Aw kun dili' nan tumanen ya bala-ud na pag-abay, wala' ya imanen nan na tandan. 6 Aw maynan uman ya utaw na magtalabahu adti pawa' nan. Asuntu na dakula' ya pagud nan sa pagpatulin sa pigtanem nan, yan ya muna kuman sa kyapagudan nan. 7 Dayaw yeiy anenganengen, aw tabangan kaw na Tyumanem na kalabetan mu ya kadakula'.
8 Dili' mu pagkalingawan na si Jisus Kristu nya͡utaw dun ni buwadbuwad ni Hari' Dabid, aw nyataw lekat adti pagkamatay nan. Yeiy ya madyaw na ubat-ubat na pigbekkal ku, 9 aw asuntu yeiy gayed aku pigpakalugan, aw pig-eketan aku adun na sangkali'. Pigsiling aku nilan na talminal. Manang wala' saba eketi ya tingeg na Tyumanem. 10 Aw awun pa manga utaw na pigpamalli' dadan na Tyumanem na un pa mangintu-u, aw yan ya du-an na pigti-isan ku ya kadakula' yeiy pada makasambuk silan kan Kristu Jisus aw matagtun da nilan ya ginawa na wala' ya tyamanan aw apeten nilan gayed ya kadyaw na Tyumanem.
11 Matinaw saba ya pigsulat ini, aw umba' tadun pangintu-uwan:
‘Kun nyaka-agad da kitadun kanan dun ni pagkamatay nan,
maka-agad kitadun uman dun ni pagkataw nan.*
12 Aw kun magpadeleg kitadun dun ni pagpangintu-u pangkay awun kakalugan,
maka-agad kitadun kanan maghari'.
Manang kun magbalyaw kitadun kanan,
kitadun uman balyaw nan.
13 Pangkay kun dili' kitadun kasaligan,
manang kenne' sakanan kasaligan,
kay dili' nan mabatug balyawun ya pagka-utawun nan.’
14 Sulitsuliten ya manga pamene' ku yeiy adti manga utaw na maggagad sa manga mangintu-uway. To-o mu silan paglongun adti asdangan na Tyumanem na dili' nilan ayilan ya kakawasan na manga tingeg. Kay wala' ya un ma-untung dun, manang kalaten nilan baling ya pagpangintu-u na manga utaw na migpakanyeg san. 15 Tibagsegi ya pigtaligu kanmu na Tyumanem na un makatutuk kanan, siling na magtalabahuway adti amu nan, pada wala' ya indeganan na mamulamula kaw adti asdangan nan kay wala' mu pasuwaya ya matinaw na palna-u. 16 Pagpa-awat kaw sa manga balawbalaw na wala' ya guna kay wala' saba lekat adti kana Tyumanem manang yan baling ya magpakasuway sa manga mangintu-uway aw dili' da nilan dalugun ya tengteng palna-u na Tyumanem. 17 Ya balawbalaw na maynan siling na pali' na malat ya bo' na gayed magkalintapun aw dili' magkaguli'. Maynan ya palna-u ni Himéniyo aw si Piléto na galu', 18 kay gayed nilan pigpalna-u na abus da kunu ya pagkataw na manga utaw lekat adti pagkamatay. Aw asuntu sa tingeg nilan, migduwaduwa ya anenganeng na manga mangintu-uway kun ayin ya palna-u na un pangintu-uwan. 19 Manang ya manga utaw na nyangintu-u sa matinaw na palna-u na lekat adti Tyumanem, dili' silan magduwaduwa, kay masalig ya pagpangintu-u nilan, kasiling na tullukanan na to-o masalig. Aw ya manga aligi pigsulatan sa tingeg ini: “Kya-ede-an na Tyumanem kun singalan alag ya kanan manga utaw.” * Aw “Pangkay singalan ya miglong, ‘Nyangintu-u aku sa Tyumanem,’ magpa-awat sakanan sa pangkay unu ya malatay.’ ”
20 Na, adti seled na dakula' na balay, awun madég na betanganan. Awun manga betanganan na pig-imo' lekat adti bulawan, aw awun uman lekat adti sambuk na punganan na bulawan na maputi'. Awun manga betanganan na pig-imo' lekat adti kawuy, aw awun uman manga kulun. Aw dun ni madég na betanganan yeiy, awun seledanan sa malinis aw awun uman seledanan sa malipa'. 21 Kun awun utaw na kaliman nan taniyen na Tyumanem adti madyaw na imo-unun, una nan linisan ya kanan pagka-utawun sa pangkay unu na malipa', siling na betanganan na malinis, pada umba' da sakanan taniyen.
22 Yanagaw, kay Timotiyo, dili' kaw magsuwayenen adti imo-unun na wala' ya untung siling na utaw na wala' pa ka-unud ya ginawa nilan. Manang daluga baling ya pagkaliman na Tyumanem aw silingan ya bet nan. Pakasaligen mu ya kanmu pagpangintu-u, aw pagginawa͡an mu ya manga eped, aw pagsambukun ya kanilan anenganeng pada awun kalinaw adti kadég mayu na nyanawagtawag adti kan Kristu lekat adti anenganeng na malinis. 23 Pagpa-awat kaw sa balawbalaw na manga utaw na maglong sa wala' nilan ka-ede-i. Kay yan ya lyekatan sa ayil. 24 Aw ya utaw na nya-imo' sugu-anen ni Kristu, dili' sakanan magpanugbuk sa ayil manang pakalunayen nan ya kanan ginawa adti kadég na manga utaw. Matadeng sakanan magpalna-u aw dakula' ya pasinsiya nan sa manga utaw na pigpalna-uwan nan. 25 Aw kun awun manga utaw na baluk ya anenganeng na mag-ampang sa palna-u nan, pakadyawun nan ya pagtulid kanilan, pagaw tumbay pa kanilan na Tyumanem ya pagselsel aw ka-ede-an da nilan ya tengteng matinaw, 26 pagaw lumiku' pa kanilan ya matinaw na anenganeng na piglebeg na busaw idtu muna aw makaluwa' pa silan adti litag na busaw.