Ya Sulat ni Pablo adti Manga Mangintu-uway dun ni
Syudad na Pilipos
Ya Muna Pagpa-ede'
1
1 Kay manga inulug na nyangintu-u dun ni syudad na Pilipos dala ya manga maggagaday aw manga dyakono: *
Kami si Pablo aw si Timotiyo na alag sugu-anen ni Kristu Jisus ya migsulat adti kamayu na pigpamalli' da na Tyumanem aw syumambuk da adti kan Kristu Jisus.
2 Padatengen galu kamayu ya kadyawan aw kalinaw na lyumekat adti kana Tyumanem ya Ama tadun aw adti kan Jisus Kristu ya pangulu tadun.
3 Kada pag-anenganeng ku kamayu, pigpasalamatan ku ya Tyumanem. 4 Aw gayed ku ya kad�g mayu pyanawagtawagan adti kanan na to-o aku migleya. 5 Pigpasalamatan ku ya Tyumanem kay lekat adti allaw na bagu kamu nyangintu-u taman adun, syumambuk kamu sa pagbekkal sa madyaw na ubat-ubat kan Kristu. 6 Aw wala' aku saba pagduwaduwa na padelegen pa na Tyumanem ya madyaw na pigpalekat da nan dun ni ginawa na kad�g mayu aw un nan saba lingeben dun ni allaw na dumateng da si Kristu Jisus. 7 Madyaw saba na maynan ya kanak anenganeng kamayu kay dili' kamu magpanaw adti ginawa ku. Kay alag kitadun pigtabangan na Tyumanem, aw gayed ya kad�g mayu migtabang uman dun ni imo-unun na pigtaligu kanak na Tyumanem, pangkay adti pagpanaw ku idtu muna aw pangkay adun na nyakalabusu aku. Kay kenne' pa ku pig-apitan ya madyaw na ubat-ubat kan Kristu aw pig-ubat ku adti manga utaw asini banwa ini. 8 Ya Tyumanem yan ya sistigus ku, kay kya-ede-an da nan na to-o aku dyumela sa kad�g mayu kay madugay da na wala' kitadun pagkita'. Aw pigginawa?an ta kamu siling na dakula' na pagginawa ni Kristu Jisus kamayu.
9 Aw asuntu seiy, yan ya pigsekat ku adti Tyumanem na gayed dugangan ya kamayu paggaginawa?ay na to-o lumapiya. Nyanawagtawag aku uman na kadugangan ya kya-ede-an mayu sa Tyumanem aw kalabetan mayu kun sangunu ya kalalem na katadeng nan, 10 pada mabatug mayu pamalli-en ya madyaw imo-un aw gayed malinis ya anenganeng mayu aw dili' pagsala-en ya bet mayu taman na allaw na pagliku' ni Kristu. 11 Aw dun ni allaw yan, ka-ede-an tadun na mad�g ya bunga na pagpangintu-u mayu na alag nya-imo' magi kan Jisus Kristu. Aw ya un sampetan na kad�g yeiy, patasen ya dengeg na Tyumanem aw deyenen sakanan na manga utaw.
Ya pag-ubat ni Pablo sa nya-imo' kanan adti syudad na Roma
12 Kay manga inulug ku dun ni kan Kristu, kaliman ku na ka-ede-an mayu na alag madyaw ya syampetan na kad�g na nya-imo' kanak, kay mad�g ya selat ku magbekkal sa madyaw na ubat-ubat. 13 Aw yanagaw kya-ede-an da na kad�g na manga magtatunggu-ay na Impirador aw kad�g uman na utaw asini syudad na Roma na nyakalabusu aku asuntu olo' na pig-ubat-ubat ku si Kristu. 14 Aw asuntu na nyakalabusu aku, to-o la migtibagseg ya mad�g na manga inulug tadun kay silan da ya mabagseg miglong sa tingeg na Tyumanem na wala' ya kakallekan.
15 Matinaw awun manga utaw na pig-ubat-ubat nilan si Kristu asuntu sa pag-inga' nilan, aw kaliman nilan na magpa-ayil adti kanilan manga eped. Manang awun eped na mig-ubat-ubat na madyaw ya tud nilan 16 kay pigginawa?an nilan si Kristu, aw kya-ede-an nilan na nyakalabusu aku pada makaselat aku na apitan ku ya madyaw na ubat-ubat adti pag-usay kanak. 17 Na, silan na gayed nyinga', pangkay pig-ubat-ubat nilan si Kristu, manang kaliman nilan olo' magpatastas sa kanilan pagka-utawun. Aw kaliman nilan kabegatan ya ginawa ku, 18 manang wala' ku yeiy pagbetangan sa ginawa. Pangkay kun madyaw ya tud nilan aw pangkay dili' madyaw, migleya aku asal nan pigbekkal ya ubat-ubat kan Kristu. Aw magpadeleg ya kanak pagleya, 19 kay nya-ede' aku na ya kad�g na nya-imo' kanak un pa sumampet adti pagpakaluwa' ku asini, asuntu sa pagpanawagtawag mayu aw asuntu uman sa tabang kanak na Ispiritu ni Jisus Kristu. 20 Yan ya tengteng kaliman ku na dili' ku bullugan ya Tyumanem aw wala' ya indeganan na mulamula?en aku adti asdangan nan kagaya, manang siling na idtu muna, magpadeleg aku mag-ubat-ubat na wala' ya kakallekan, pangkay adti asdangan na mag-ukumay. Aw magi sa paglong ku aw kad�g na pigpan-imo' ku, patasen ya ngalan ni Kristu, pangkay utaw pa aku aw pangkay pa kamatayan ku. 21 Kay yan ya du-an nan na pigpa-eya' pa aku asini tas na lupa' na un tibullukun ya ginawa ku kan Kristu, manang pangkay kun ya kanak datengan ya kamatayen, na, yan ya madyaw pa kay un aku madtu ni sayid nan. 22 Manang kun kenne' pa aku mag-eya' asini tas na lupa', mad�g pa ya mabatug ku na madyaw na imo-unun ku kan Kristu. Yanagaw kun aku ya pabaya-en, magduwaduwa pa aku. 23 Wala' ku ka-ede-i kun ayin ya un ku galu pamalli-en. Kaliman ku galu madtu ni sayid ni Kristu, kay yan ya to-o madyaw. 24 Manang kya-ede-an ku na madyaw pa kun kenne' pa aku asini tas na lupa' na un magtabang kamayu. 25 Aw yanagaw, adti kanak anenganeng, dili' pa aku matay manang magpadeleg aku magtabang sa kad�g mayu pada tumulin ya kamayu pagpangintu-u aw to-o pa kadugangan ya kamayu pagleya. 26 Aw kun makaliku' aku galu adti kamayu, dakula' pa ya indeganan na pagdeyen mayu kan Kristu Jisus.
27 Pangkay unu ya un ku datengan, manang to-o mayu pakadyawa ya bet mayu aw ya pagdala sa kamayu pag-eya' pada dili' pagsala-en ya madyaw na ubat-ubat kan Kristu. Yanagaw, kun makakadtu aku ni kamayu aw pangkay kun dili', manang ka-ede-an ku na to-o la pigsambuk ya kamayu ginawa aw migsambuk uman ya anenganeng mayu na magbekkal sa madyaw na ubat-ubat kan Kristu 28 aw wala' ya kakallekan mayu sa manga utaw na mig-ampang kamayu. Kay kun kita-en nilan na wala' ya kakallekan mayu, yeiy ya puliba kanilan na un silan pa-emel-emelen na Tyumanem manang kamu paluwa-en nan. Aw ya kad�g yeiy pigtumbay na Tyumanem, 29 kay pig-atag da kamayu na un kamu mangintu-u kan Kristu aw pigtumbay uman kamayu ya pagti-is asuntu kanan. 30 Yanagaw migsambuk da kitadun dun ni pagti-is siling na manga sundalu na migti-is adti dakula' na tanam, kay kyinita' da mayu ya kanak pagti-is na kya-agiyan ku idtu muna aw dyengeg da mayu na kenne' pa nan adun.