24
Ya pag-usay ni Félix kan Pablo
1 Na, paglabay da na limangallaw, dyumateng dun ni Césariya lekat adti Jérusalim si Ananiyas na yan ya pangulu na manga magdadugsu-ay sa Tyumanem, aw si Tértulo na sambuk na talaglawung, aw manga mangkalangkaw na Judiyu. Nyadtu silan ni asdangan ni Gubirnador Félix aw pigpadateng nilan ya kanilan limanda kan Pablo. 2 Pigpatawag ni Félix si Pablo, aw sa dun da alag silan ni asdangan ni Félix, migpalekat si Tértulo migdandanen sa limanda nilan kan Pablo, long nan,
“Kay Gubirnador Félix na to-o pigbasa͡an: Asuntu sa kadyaw na pagdumala mu, migkadugay ya kalinaw asini nasud, aw madég ya pig-imo' mu na kadyawan 3 na dili' nami kalingawan. Yanagaw dakula' ya kanami pagpasalamat kanmu. 4 Manang dili' aku malim magsalang kanmu. Yanagaw nyanginayu' aku kanmu na pakanyegan mu dagawdagaw ya kanami paglongun.
5 “Ya utaw ini asdangan mu, siling sakanan na magkedel na gayed magkalintapun. Pangkay ayin ya kadtuwan nan na banwa, dyumala sa kasélék adti kadég na manga Judiyu. Aw sambuk sakanan uman na maggagaday sa manga utaw dun ni partido na Nasaréno. 6 Pangkay ya kanami Témplo, piglipa-an nan galu. Manang pigdakep nami. [Aw dun da nami galu usayan sa katanem na kanami bala-ud, 7 manang dyumateng ya komandér na si Lisiyas aw pigleges nilan pigkamang si Pablo lekat adti kanami. 8 Aw pigsugu' kami nan na madi asdangan mu.] Ikaw da ya pagbastigal kanan, aw dun mu ka-ede-i na matinaw ya limanda nami kanan.”
9 Aw ya kadég na piglong ni Tértulo kan Félix alag pigmatinaw na manga Judiyu na migkatipun dun.
10 Tigkas yan, migpulingen ya gubirnador kan Pablo na yan da uman ya maglong, aw tyumubag si Pablo, law nan: “Kay Gubirnador, nya-ede' aku na madugay da ya pag-ukum mu asini nasud ini. Aw yanagaw, migleya aku na mabatug ku tamengan ya kanak pagka-utawun asini asdangan mu.
11 “Kun sadsadan mu, ka-ede-an mu na bagu sampulu' tag duwa ya allaw na lyumabay lekat adti pagdateng ku dun ni Jérusalim na un manimba adti Témplo. 12 Aw wala' aku nilan kita-a saba na migpa-ayil sa pangkay singalan utawa dun ni seled na Témplo aw wala' aku nilan kita-a na migpagubut adti manga sinagoga aw pangkay adti kadakula' na Jérusalim. 13 Wala' ya kanilan puliba sa manga diklamu nilan kanaken.
14 “Iman nilan aw partido kami, manang beke' na maynan. Pa-ede' ku kanmu na sambuk aku na dyumalug sa palna-u ni Jisus. Aw siling uman na kadég na manga Judiyu, pigsimba ku ya Tyumanem na kanami manga tyugbulan, aw dyalug ku ya kadakula' na Uldin na pig-atag kan Moysis aw ya sulat na manga propita asini muna. 15 Aw siling na kanilan, yan ya pig-iman ku uman na matawun na Tyumanem ya kadég na utaw na nyangkamatay, pangkay dyumalug silan sa Tyumanem aw pangkay wala'. 16 Aw yanagaw pigtibagsegan ku na malinis ya kanak anenganeng na dili' aku sala-en dun ni pag-inunu na Tyumanem aw pangkay adti manga utaw.
17 “Na, pagkatigkas na pilangka͡umay, lyumiku' da aku adti Jérusalim na un mag-ated sa tabang na pig-amut na manga utaw adti sambuk na banwa, aw yan uman ya sambuk na tud ku na madtu ni Témplo mag-atag sa dugsu' adti Tyumanem. 18 Aw talana ku adti Témplo, kyumita' kanak ya manga utaw ini na agpet da ku matigkas ya manga imo-unun na un tumanen dun ni kanami uldin pada linisan aku. Tabay ya manga utaw dun ni Témplo, aw wala' saba silan paggubut.
19 “Manang awun eped na manga Judiyu dun ni Témplo na lekat adti probinsiya na Asia, aw kun awun limanda nilan kanak, silan galu ya madi asdangan mu. 20 Manang asuntu na wala' silan asini, usipa ya manga utaw ini kun unu ya nya-imo' ku na sala' na kyinita' nilan sa pag-usay kanak adti asdangan na Sanhédrin. 21 Yan olo' ya piglong ku sa mabagseg na tingeg dun ni asdangan nilan, na yan ya du-an nan na pig-usayan aku kay pig-iman ku na un pa matawun ya nyangkamatay.”
22 Aw dun da ni Félix patenenga ya pag-usay. Kay dakula' ya kya-ede-an nan dadan sa manga utaw na dyumalug sa palna-u ni Jisus. Piglong nan kan Pablo, “Tagadan pa ku ya pagdateng ni Komandér Lisiyas. Tigkas yan, ka-ede-an da mu ya kanak pagbaya' sa limanda kanmu.”
23 Pagkatigkas yan, pyamene-an ni Félix ya cénturiyon na tunggu-an pa si Pablo manang tumbay kanan na makaluwa-luwa' tagbi'. Aw pigtumbay nan uman na tanawun si Pablo na manga ubaybay nan aw dala͡an nilan na manga kapelekan nan.
Si Félix aw si Drusila migpakanyeg sa pag-ubat-ubat ni Pablo
24 Pagkatigkas na pilangallaw, lyumiku' si Félix aw nyagad kanan ya ka͡ubayan nan na si Drusila. Na, si Drusila, Judiyu sakanan. Aw pigpatawag ni Félix si Pablo aw pigpakanyegan nan ya ubat-ubat ni Pablo sa pagpangintu-u kan Kristu Jisus. 25 Aw piglongan nan si Félix kun unu ya madyaw imo-un na utaw adti anenganeng na Tyumanem, aw kun unun na utaw ya pagtagen sa pagka-utawun nan, aw kun unu ya pag-ukum na un dumateng. Aw nyallek si Félix asuntu sa piglong nan. Yanagaw piglongan nan si Pablo, “Umba' da yan, kay Léw! Kun awun selat ku, pakadiyen da ta kaw uman salut.” 26 Aw pig-iman uman ni Félix na atagan sakanan ni Pablo na kuwalta na tagu-tagu'. Yanagaw malikit sakanan migpatawag kan Pablo aw migbalawbalaw silan.
27 Manang pagkatigkas da na duwangka͡umay, si Félix kyasayuwan da ni Porsyo Fésto sa pagka gubirnador. Aw asuntu sa kaliman ni Félix na katutukan kanan ya manga Judiyu, yanagaw pigpabaya-an da nan si Pablo aw wala' nan paluwa-a.