22
1 “Kay manga kadégan ku aw kamu na mangkalangkaw na manga Judiyu, pakanyegi ya un ku paglongun kamayu.”
2 Pagdengeg nilan sa tingeg na Aramayik na piglong nan, to-o pa silan nyatinep. Yanagaw migpadeleg si Pablo miglong, 3 “Judiyu aku uman na nya͡utaw adti Tarso, probinsiya na Ciliciya, manang asini aku ni Jérusalim tulin. Si Gamaliyél ya migpalna-u kanak, aw dayaw aku nan pigpalna-uwan sa kadég na katanem aw uldin na kanaten tyugbulan. Nyatibulluk ya anenganeng ku dyumalug sa kana Tyumanem siling mayu uman adun.
4 “Pigpamulayaman ku ya manga dyumalug sa palna-u ni Jisus taman na pagkamatay nilan. Pigdakep ku silan aw pigpagapus, aw pangkay eseg aw pangkay ka͡ubayan, pigpakalabusu ku silan. 5 Usipa mayu ya pangulu na manga magdadugsu-ay dun ni Témplo aw manga utaw na Sanhédrin. Silan ya sistigus na matinaw ya kanak piglong adun. Kay lekat adti kanilan dyawat ku ya manga sulat na un ku pakita' adti manga kadégan ku na Judiyu adti manga sinagoga na awun ni syudad na Damasko. Ya manga sulat yeiy, palangad pagtumbay kanak sa pagdakep sa manga utaw na dyumalug sa palna-u ni Jisus pada gapusun silan aw pa-agad asini Jérusalim na un pakalaten. Yanagaw nyanaw aku adti Damasko na un magdakep kanilan.
6 “Sa pagpanaw ku dun ni dalan na manga alas dosi, aw sa malapit da aku adti Damasko, kyabigla-an aku na kilangkilang na kalalamdag na lekat adti tas na langit na nyakapalibed kanak, 7 aw dayaw aku nyatuwad dun ni lupa', aw awun tingeg na dyengeg ku, ‘We Saulo! We Saulo! Ananga' gayed aku mu pyamulayaman?’ 8 Aw tyumubag aku, ‘Singan kaw ka', kay Sir?’ Aw tyumubag sakanan, ‘Aku saba si Jisus na taga Nasarit na gayed mu pigpamulayaman.’ 9 Na, ya manga eped ku, kyinita' nilan saba ya kalalamdag manang wala' nilan kabangal ya tingeg na miglong kanak. 10 Aw nyusip aku salut kanan, ‘Kay Sir, wan ya madyaw ku imo-un?’ Aw miglong si Jisus kanak, ‘Pagbangun kaw aw kadtu kaw ni Damasko, aw dun da pa-ede-an kanmu ya kadég na pigpalpa ku dadan kun unu ya un mu imo-un.’ 11 Manang wala' da aku kita' asuntu sa kilangkilang na kalalamdag, yanagaw pig-agak da aku na kanak manga eped aw pig-ated aku nilan adti Damasko.
12 “Na, awun eseg dun ni Damasko na pigngalanan na si Ananiyas na nyatibulluk ya anenganeng nan dyumalug sa uldin tadun. Pigsaya' sakanan na kadég na manga Judiyu na nyeya' dun. 13 Aw dyumulud si Ananiyas kanak aw nyindeg adti tampid ku, long nan, ‘Kay Inulug Saulo, kumita' da kaw!’ Aw dayaw aku kyumita' salut aw kyinita' da ku sakanan. 14 Aw piglongan aku nan, ‘Ya Tyumanem na pigsimba na kanaten tyugbulan asini muna, yan ya nyamalli' kanmu pada ka-ede-an mu ya kanan pagkaliman aw kita͡en mu ya kanan Sugu-anen na Matulid na si Jisus aw denggen mu ya kanan tingeg. 15 Kay ikaw ya sambuk na magmatinaw kanan adti kadég na manga utaw aw pa-ede' mu kanilan ya kyinita' mu aw ya dyengeg mu. 16 Na, wan pa ya tyagadan mu adun? Pagbangun da kaw aw pagpaba͡utismu la kaw, aw tawaga ya ngalan nan pada kalinisan kaw sa kanmu manga sala'.’
17 “Pagkatigkas yan, lyumiku' aku asini Jérusalim, aw talana ku nyanawagtawag dun ni Témplo, awun pigkita' ku na liwan na tagaynep. 18 Kyinita' ku si Jisus na miglong kanak, ‘Maksay indegi ya Jérusalim adun! Panamal da kaw! Kay ya manga utaw asini, dili' nilan dawaten ya pag-ubat-ubat mu na magmatinaw kanak.’ 19 Aw tyumubag aku kanan, long ku, ‘Kay Sir, kya-ede-an da nilan ya pigpan-imo' ku idtu na muna. Kyatpedan ku ya manga sinagoga dyakepan sa manga utaw na nyangintu-u la kanmu, aw pigpakalabusu ku silan aw byadasan ku pyamunalan. 20 Kya-ede-an da nilan uman na tyumande' aku sa pagpatay kan Éstéban kay yan ya sambuk na migmatinaw kanmu. Aku saba ya tyumunggu' sa manga sa-ul na manga utaw na migpatay kanan.’ 21 Manang miglong pa si Jisus kanak, ‘Panaw da kaw. Kay un ta kaw sugu-un baling adti manga Héntil na nyeya' adti mawat!’ ”
22 Dun da taman ya pagpakanyeg na manga utaw sa tingeg ni Pablo, kay to-o silan nyadaman asuntu sa moli na piglong nan. Aw migsipuyagit silan miglong, “Pataya mayu sakanan! Ya-i la mayu pagmatawa ya utaw yan!”
23 Aw asuntu sa kadaman nilan, pyanluwas nilan ya kanilan manga sa-ul aw pigbeyabeya, aw kyumamang silan sa kutu' na lupa' aw pigsabug nilan. 24 Yanagaw pigsugu' na komandér na pa-agad si Pablo adti seled na kota' aw badasan nilan labeten taman na ubat da nan aw wan ya kyadaman na manga Judiyu kanan.
25 Manang paglagket da nilan kan Pablo adti aligi na un labeten, piglongan nan ya cénturiyon na nyindeg dun ni tampid nan, long nan, “Unu, pigtumbay na bala-ud mayu ya paglabet sa utaw na Romanen pangkay wala' pa ya pag-usay kanan?”
26 Pagdengeg na cénturiyon sa usip ni Pablo, kyadtuwan nan ya komandér aw piglongan nan, “Kay Sir, magpakatanaw kita sa un ta imo-un sa utaw yeiy kay Romanen sakanan kadi'!”
27 Yanagaw kyadtuwan uman na komandér si Pablo aw pig-usip nan, law nan, “Ubatan kanak, Romanen kaw?”
Aw tyumubag si Pablo, “E-e.”
28 Aw miglong ya komandér, “Dakula' ya kanak pigbayad sa kanaken pagka Romanen.”
Aw tyumubag uman si Pablo, long nan, “Aku ya Romanen na lekat pa adti kanak pagka͡utaw.”
29 Yanagaw, maksay si Pablo pig-ubadan na manga sundalu aw wala' da pakalos ya paglabet kanan. Aw nyallek uman ya komandér kay kya-ede-an nan na Romanen kadi' ya utaw na pigpapusas nan.
Ya pag-usay kan Pablo na manga Judiyu na Sanhédrin
30 Manang kaliman pa na komandér ka-ede-an kun unu ya tengteng du-an na paglimanda na manga Judiyu kan Pablo. Yanagaw pagkasalut na allaw, pigpatawag nan ya manga mangkatas na magdadugsu-ay aw ya kadég na manga utaw na Sanhédrin. Aw pigsugu' nan na pa-agad si Pablo adti asdangan nilan na un usayan.