21
Ya pagpanaw ni Pablo pasinan adti Jérusalim
1 Aw pig-indegan da nami silan aw lyumakted ya kanami pigsakayan adti pulu' na Kos. Aw ya salut na allaw nyadtu kami ni pulu' na Rodas, aw lekat dun syumakay kami pasinan adti pantalan na lunsud na Patara. 2 Dun ni Patara, kyumita' kami sa barko na un nami sakayan pasinan adti banwa na Ponisiya, aw syumakay kami.
3 Dun ni panaw nami, kyinita' nami ya pulu' na Cipré apit adti kawala aw piglabayan nami. Aw migpadeleg kami syuminan adti probinsiya na Sirya. Pagdateng nami, nyanog da kami adti pantalan na Tiro kay dun da awasa ya dakula' na kalga nilan. 4 Aw pyaninaw nami ya manga mangintu-uway dun ni Tiro, aw lyumaba' kami adti tampid nilan seled na pitungallaw. Aw pig-ubatan nilan si Pablo na dili' sakanan lumos adti Jérusalim kay yan ya pigpa-ede' kanilan na Ispiritu na Tyumanem. 5 Manang pagkalingeb da na manga allaw na paglaba' nami, nyindeg da kami si Pablo aw pig-ated kami na kadég na manga mangintu-uway taman adti luwa' na syudad. Nyagad ya kanilan manga ka͡ubayan aw ya manga mangayse' nilan. Aw migpansiluhud kami dun ni baklayan aw nyanawagtawag adti Tyumanem. 6 Aw nyanabi kami kanilan aw nyanik da sa barko. Aw nyan-uli' ya manga mangintu-uway.
7 Pagdateng nami adti pantalan na Tolémayis lekat adti Tiro, nyanog kami aw lyumaba' adti manga mangintu-uway aw kyumulang dun ni tampid nilan. 8 Pagkamaselem da, migpadeleg ya panaw nami. Pagdateng nami adti Césariya, dun kami bantuk ni balay ni Pilipi na yan ya sambuk na mag-ubat-ubatay kan Kristu. Aw sambuk uman sakanan na nyakasakup sa pitu ya eseg na pigpamalli' na manga apostolés idtu muna. * 9 Aw ya upat ya ise' nan na dalaga awun katadeng nilan magpa-ede' sa un dumateng.
10 Talana nami adti balay nilan seled na pilangallaw, dyumateng si Agabo lekat adti Judiya. Na, mabatug nan uman pa-ede' kun unu ya un dumateng. * 11 Aw lyumaba' sakanan adti sayid nami. Aw pigkamang nan ya elen ni Pablo aw piggapus nan ya kanan siki aw bekten, aw law nan, “Yan ya piglong na Ispiritu na Tyumanem, ‘Siling na maynini, un banggetan uman na manga Judiyu adti Jérusalim ya tagtun sa elen ini aw atag nilan adti manga Héntil.’ ” 12 Ya piglong ni Agabo, dyengeg na kadég nami dala ya manga ka-epedanan dun, aw to-o kami nyanginayu' kan Pablo na dili' padelegen ya palpa na madtu ni Jérusalim.
13 Manang miglong si Pablo, “Ananga' kamu magsugaw kanaken? Ananga' mayu pakayameken ya anenganeng ku? Pigbetang da ku adti kanak ginawa na dawaten ku ya pangkay unu ya un dumateng, pangkay banggetan aku na manga utaw, aw pangkay patayen aku nilan adti Jérusalim asuntu sa ngalan na pangulu tadun na si Jisus.”
14 Aw pagka-ede' da nami na dili' mabatug tagenan si Pablo, wala' da nami gelgela sakanan. Yan olo' ya piglong nami, “Imo-un galu ya pagkaliman na Tyumanem.”
Ya pagkita' ni Pablo kan Santiago aw manga magdadumala͡ay sa manga nyangintu-u dun ni Jérusalim
15 Pagkatigkas na manga allaw yan, pigtagilanan nami ya panaw, aw syuminan da kami adti Jérusalim. 16 Aw awun nyagad kanami na manga mangintu-uway na lekat adti Césariya, aw pig-ated kami nilan taman adti balay ni Manason kay yan ya un nami bantukan. Na, idtu muna taga Cipré si Manason aw yan ya sambuk na utaw na nyaka-una nyangintu-u kan Jisus.
17 Pagdateng da nami adti Jérusalim, kyumabet kanami ya manga inulug na nyangintu-u. 18 Aw pagkaselem, lyumaba' kami si Pablo adti kan Santiago, aw dun da kami pagkakita͡ay ya kadég na manga magdadumala͡ay sa manga utaw na nyangintu-u dun ni banwa yan. 19 Tigkas ni Pablo mangumusta kanilan, pigdandan nan ya kadég na pigpan-imo' na Tyumanem adti manga Héntil magi sa pag-ubat-ubat nan.
20 Pagdengeg nilan sa piglong nan, alag silan migdeyen sa Tyumanem. Aw tigkas yan, piglongan nilan si Pablo, law nilan, “Kya-ede-an mu, kay inulug, na nyangintu-u la uman kan Kristu ya pilam malalan ya manga Judiyu. Aw ya kadég nilan alag nyatibulluk pa ya kanilan anenganeng dyumalug sa Uldin tadun. 21 Na, dyengeg nilan na pigpalna-uwan mu ya kadég na manga Judiyu na nyeya' adti manga banwa na manga Héntil. Aw yan kunu ya palna-u mu kanilan, na dili' da dalugun ya Uldin na pig-atag kanaten na Tyumanem adti kan Moysis, labi la ya sugu' na pantuli-en ya manga ise', aw dili' da nilan dalugun ya manga katanem na manga Judiyu.
22 “Na, unu beg ya un tadun imo-un pada ka-ede-an nilan na beke' na maynan ya palna-u mu? Kay dumengeg saba silan na dyumateng da kaw asini. 23 Yanagaw ini ya madyaw mu imo-un, kay Pablo. Awun upat ya eseg asini na mig-imo' sa pakang adti Tyumanem aw dili' madugay malingeb ya pagsapa'. 24 Agad kaw kanilan adti Témplo aw ka͡agadan mu ya manga katanem na manga Judiyu dun ni un nilan imo-un na maglinis sa kanilan pagka-utawun. Aw ikaw ya magbayad pada umba' silan buluwun, kay yan ya pangilala na nyalingeb da ya pakang nilan adti Tyumanem. Kun matuman mu ya kadég yeiy, ka-ede-an na kadég na utaw na beke' na matinaw ya kyadenggan nilan kanmu. Ka-ede-an da na dyalug pa mu ya uldin na manga Judiyu.
25 “Na, kya-ede-an da mu na pigsulatan da nami ya manga Héntil na nyangintu-u la, aw yan olo' ya pigpa-ede' nami kanilan: Dili' nilan pagkanen ya unud na pig-atag adti dugsu' sa tyumanem na galu'. Aw dili' silan magkan sa dugu', aw dili' silan uman magkan sa unud na ayep na wala' luwa' ya dugu'. Aw dili' silan magkasala-enen.”
26 Yanagaw pig-agadan ni Pablo ya pamene' nilan, aw pagkasalut na allaw pigpa-agad nan ya upat ya eseg aw migdengan silan sa pigpan-imo' nilan na un linisan ya kanilan pagka-utawun. Pagkatigkas nilan imo-un, kyadtuwan nilan ya Témplo, aw migpa-ede' si Pablo adti manga magdadugsu-ay kun unu pitsaha ya pagkalingeb na pakang na tag sambuksambuk kanilan adti Tyumanem. Aw dun nilan ka-ede-i kun unu pitsaha ya pag-atag nilan sa dugsu' adti Tyumanem.
Ya pag-agaw kan Pablo adti pamanag na Témplo
27 Sa agpet da malingeb ya pitungallaw na paglinis kanilan, si Pablo kyinita' na manga Judiyu na taga Asia adti seled na Témplo. Yanagaw pigsutsutan nilan na malat ya manga eped nilan na Judiyu pada kadamanan si Pablo. Aw migsibukad silan kanan aw ugmuni nilan, 28 aw migpampuyagit silan miglong, “Tabangi kami! Alag kamu na buwadbuwad ni Isra-él! Ini la ya utaw na gayed magpanawpanaw na maglong sa malat kanaten na manga Judiyu, dala ya kanaten uldin aw ya kanaten Témplo! Aw beke' nan olo', manang mig-allad sakanan sa manga utaw na Grigo asini pamanag na Témplo na dili' nilan galu paseledan!* Piglipa-an nan kalaw ya Témplo!” 29 Yan ya du-an nan na maynan ya piglong nilan, kay kyinita' nilan idtu muna si Tropimo na taga Épéso na eped ni Pablo dun ni Jérusalim, aw iman nilan aw pigpa-agad ni Pablo adti pamanag na Témplo.
30 Wala' kadugay nyagubut ya kadég na utaw dun ni Jérusalim, aw migsibukad silan adti pamanag na Témplo. Aw pig-awidan si Pablo aw piggakgak nilan adti luwa'. Aw pigtakepan nilan ya manga suwangan na Témplo.*
31 Sa un da nilan galu patayen si Pablo, pig-ubatan ya komandér na kohort na taga Roma na nyagubut da ya kadég na utaw dun ni Jérusalim.* 32 Yanagaw, migpa-agad sakanan sa manga cénturiyon aw manga sundalu nilan aw maksay dyumalagan adti kadégan na manga utaw na nyagubut.
Pagkita' na manga utaw sa komandér aw manga sundalu, pigbotonan nilan ya pagpanumbag kan Pablo. 33 Aw dyumulud ya komandér kan Pablo aw dakepa. Aw migsugu' na pusasan si Pablo na duwa ya sangkali' dun ni tenga' na manga sundalu. Tigkas yan, pig-usip na komandér ya manga utaw, “Singalan utawa yeiy? Unu ya sala' nan?” 34 Manang wala' kabangal ya tubag nilan asuntu sa kasélék na madég na utaw. Ya eped, sangkamulu' ya pigpuyagit nilan, aw sangkamulu' uman ya kana eped. Aw wala' na komandér ka-ede-i kun unu ya diklamu nilan, yanagaw pigsugu' nan ya manga sundalu na ated si Pablo adti seled na kota'. 35 Aw pagdateng nilan adti dalem na agdan na kota', pigpa-ingkud sakanan adti abaga na duwa ya sundalu asuntu sa kabulut na manga utaw, 36 kay dyumalug silan adti moli aw migpuyagit, law nilan, “Pataya sakanan!”
Ya paglong ni Pablo adti manga utaw na migpanggubut
37 Sa un da si Pablo dala͡en adti seled na kota', nyakaselat sakanan miglong sa komandér, law nan, “Kay Sir, awun paglongun ku galu kanmu.”
Aw tyumubag ya komandér, “Matadeng kaw kadi' sa tingeg na Grigo! 38 Iman ku aw ikaw ya Ihiptuwanen na nyatu sa gubirno adun na bagu aw miggagad sa upatem malalan ya ribildi adti kaligbinan.”*
39 Aw tyumubag si Pablo kanan, law nan, “Beke' aku na utaw yan. Judiyu aku na taga Tarso, probinsiya na Ciliciya, aw matas ya dengeg na syudad yan. Manginayu' aku kanmu beg na tumbay mu kanak ya paglong adti manga utaw.”
40 Aw pagtumbay da na komandér kanan, nyindeg si Pablo dun ni tas na agdan, aw migpulingen adti manga utaw na magkatinep silan. Aw pagkatinep da nilan to-o, migpalekat si Pablo miglong adti kanilan sa tingeg na Aramayik na kyalabetan na kadég nilan, law nan,