20
Ya panaw ni Pablo adti Gréciya aw Macédonya
1 Pagteneng da na paggubut, pigpatawag ni Pablo ya manga mangintu-uway dun ni Épéso na un magkatipun, aw pigdasig nan silan. Aw tigkas yan, nyanabi sakanan kanilan aw nyindeg da pasinan adti probinsiya na Macédonya. 2 Aw lekat dun, madég ya manga banwa na pig-apitan nan aw gayed nan pigdasig ya manga mangintu-uway. Aw lyumos sakanan adti probinsiya na Akaya na pigngalanan uman na Gréciya. 3 Aw nyeya' pa dun seled na tulumbulan.
Tigkas yan, migpalpa si Pablo sumakay sa barko taman ni Sirya. Manang pya-ede' kanan na pigbantakan sakanan na manga utaw na Judiyu. Yanagaw adtu la sakanan baling agi ni Macédonya. 4 Aw nyagad kanan si Sopater na ise' ni Pirro na taga Bériya, aw si Aristarko aw si Ségundo na alag taga Téssalonika, aw si Gayo na taga Dérbi, aw si Timotiyo, aw duwa uman ya taga Asia na si Tikiko aw si Tropimo.* 5 Aw adti Pilipos, nyuna la ya manga eped ni Pablo aw tyumagad silan kanami adti Troas. 6 Pagkatigkas da na Pista na Pan na Wala' Patulina, pig-indegan nami ya Pilipos, aw syumakay sa barko. * Pagkatigkas na limangallaw, dyumateng kami adti Troas, aw migkita' kami ya manga eped nami na nyaka-una, aw dun da kami pag-eya' seled na sangkasimana.
Ya pagkataw ni Éyutiko lekat adti pagkamatay nan
7 Pagdateng na allaw na Linggu, migkatipun kami ya manga mangintu-uway na un magsambuk kuman. * Aw migpalekat si Pablo migpalna-u. Aw madugay ya pagpalna-u nan taman na tenga' na gabi, kay pagka͡allaw da un sakanan manaw. 8 Na, kya-ilawan na madég na saleng ya gibalayan na kyatipunan nami dun ni tas na balay. 9 Aw talana ni Pablo mig-ubat-ubat, nyiningkud adti bintana' ya sambuk na bata' na si Éyutiko, aw pigtudtud sakanan. Aw sa migpadeleg pa si Pablo migpalna-u, to-o la nyakatulug si Éyutiko, aw tigkan yan kolug, aw tulungkansad ya katas na kyolugan nan taman adti lupa'. Aw pig-engat nilan na wala' da ya ginawa nan. 10 Manang nyanog si Pablo aw piglebleban nan aw pigkepkep nan. Aw miglong si Pablo, “Dili' kamu magkallek kay kyaginawa͡an da sakanan.”
11 Pagliku' ni Pablo adti tas, pigtenga-tenga' nan ya pan aw pigpakan nan sa kadég nilan dun. Tigkas yan, migpadeleg sakanan mig-ubat-ubat menda' sa kya͡allawanan, aw pig-indegan da nan ya katipun. 12 Aw si Éyutiko, pya-agad da na manga utaw nyuli', aw to-o silan migleya kay kyamatawan da sakanan.
Ya pagpatipun ni Pablo sa manga magdumala sa manga mangintu-uway na awun ni Épéso
13 Yanagaw syumuway kanami si Pablo, aw nyuna kami kanan syumakay sa barko pasinan adti pantalan na Assos, kay ya palpa ni Pablo ya mamessan sa dalan aw apiten da nami adti Assos. 14 Aw pagkita' nan kanami adti pantalan, nyanik sakanan sa barko aw syumakay ya kadég nami pasinan adti dunggu-anan na Mitiléné. 15 Pagkatigkas nami mapit dun ni Mitiléné, syumakay pa kami aw pagkasambuk na allaw pigdipagan da nami ya pulu' na Kiyos. Aw ya sambuk uman na allaw nyapit kami adti pulu' na Samos, aw pagkasalut na allaw dyumateng kami adti pantalan na Miléto. 16 Kay yan ya kaliman ni Pablo na maliwes sa Épéso pagaw masalang dun ni probinsiya na Asia, kay migkagallat sakanan dumateng adti Jérusalim na un tumambung sa Pista na Allaw na Péntékostés kun mabatug nan.
17 Sa bagu pa kami dyumateng adti Miléto, pigpatawag ni Pablo adti sayid nan ya manga magdumala sa manga utaw na nyangintu-u la na awun ni Épéso. 18 Pagdateng nilan adti Miléto, miglong si Pablo kanilan, “Kay manga inulug, kya-ede-an da mayu ya kanak bet idtu muna na pag-eya' ku adti sayid mayu, lekat pa adti tagna' na pagdateng ku asini probinsiya na Asia. 19 Aw pangkay pigpakalugan aku na manga kadégan ku na Judiyu aw gayed aku nilan byantakan, manang dyalug ku ya sugu' ni Jisus. Wala' ku patastasa ya imo-unun ku manang pigsugawan ku baling. 20 Aw kya-ede-an mayu uman na dun ni pag-ubat-ubat ku wala' ya pigtagu' ku pangkay sambuk, manang pigbukasan ku adti kamayu na un magpakabagseg sa pagpangintu-u mayu. Pigpalna-uwan ta kamu dun ni katipun mayu aw pangkay adti manga balay mayu. 21 Alag ku pig-ubatan ya manga Judiyu aw ya manga Héntil, na ayawan nilan ya manga imo-unun na malatay aw magselsel silan adti asdangan na Tyumanem aw pangintu-uwan nilan si Jisus Kristu ya tagtun kanaten.
22 “Aw manaw da aku adun adti Jérusalim kay yan ya sugu' kanak na Ispiritu na Tyumanem. Aw wala' ku ka-ede-i kun unu ya un ku datengan dun. 23 Yan olo' ya kya-ede-an ku na pangkay ayin na syudad aw lunsud ya kyadtuwan ku, pigpa-ede' aku dadan na Ispiritu na Tyumanem na madég ya kalugan na dumateng pa kanak aw dala ya pagkalabusu kanak. 24 Manang dili' ku demet ya kanak pagka-utawun. Yan olo' ya kaliman ku na tigkasen ya manga imo-unun na pigtaligu kanak na pangulu tadun na si Jisus, na yan ya pagpa-ede' sa madyaw na ubat-ubat sa grasya na Tyumanem.
25 “Na, nyalegeb da ku ya kadég mayu pigpalna-uwan sa paghari' na Tyumanem. Aw kya-ede-an ku adun na dili' da kitadun salut beg magkakita͡ay. 26 Yanagaw miglong aku kamayu adun na allaw, pangkay singalan kamayu ya wala' pakaluwa' adti pagpa-emel-emel na Tyumanem, na, beke' da yan na sala' ku. 27 Kay wala' ya pigtagu' ku kamayu pangkay sambuk. Pigbangal da ku kamayu ya kadakula' na kaliman na Tyumanem aw ya kanan palpa. 28 Yanagaw pakatanawi mayu ya kamayu pagka-utawun aw pakatanawi ya kadég na manga mangintu-uway na pigtaligu kamayu na Ispiritu na Tyumanem, kay ya pagtunggu' mayu kanilan masiling na pagdiyaga na utaw sa manga ayep nan na karniro. Kay ya kadég na mangintu-uway pigbayadan da na Tyumanem na dugu' na kanan Ise'.
29 “Kya-ede-an da ku na kun wala' da aku asini sayid mayu, awun sumeled adti kamayu katipun na magpalna-u sa galu' pada magpasuway kamayu dala ya manga mangintu-uway na pigtaligu kamayu. Ya manga magpalna-uway yeiy, kasiling silan na idu' na to-o mabulut, aw dili' silan magkallat. 30 Aw beke' nan olo', manang awun uman utaw dun ni kamayu na ma-imo' magdadumala͡ay aw magpalna-u baling sa galu' na magpasuway sa manga mangintu-uway pada silan da ya dalugun. 31 Yanagaw pag-inap kamu pagaw madala kamu nilan. Anenganenga mayu ya pag-eya' ku adti sayid mayu seled na tulungka͡umay, na wala' ku patenenga ya kanak pagpalna-u adti tag sambuksambuk kamayu na kya-epedan na pagsugaw ku, pangkay gabi aw pangkay allaw.
32 “Na, tyumbay da ta kamu adti Tyumanem na tunggu-an kamu nan aw tabangan kamu na tingeg nan na yan ya migpa-ede' sa grasya nan. Kay ya tingeg nan, yan ya migpakabagseg sa pagpangintu-u mayu aw dun da mayu ka-ede-i na awun bagi' na pigpakang da nan sa manga utaw na pigtani nan.
33 “Na, ya kamayu kuwalta aw kadégkadég, wala' ya pigkaybegan ku, 34 aw kya-ede-an mayu na wala' kami pagsalig kamayu, manang migtalabahu aku pada awun da kakamangan nami dala ya manga eped ku. 35 Aw sa kadég na pig-imo' ku, pigpakita' ku kamayu ya kaseb na umba' mayu silingan pada makatabang kamu sa manga utaw na wala' ya pagkamangan nilan. Aw dili' mayu kalingawan ya piglong ni Jisus na pangulu tadun, na ‘To-o migleya ya nyatag kay sa pig-atagan.’ ”
36 Pagkatigkas ni Pablo maglong na maynan, lyumuhud sakanan eped nilan aw nyanawagtawag adti Tyumanem. 37 Aw to-o silan migpansasugaway aw pigkepkep nilan si Pablo * 38 kay to-o migkalat ya ginawa nilan asuntu sa piglong nan na dili' da nilan sakanan kita͡en.
Pagkatigkas yan, pig-ated da nilan adti pantalan na un manik sa barko.