8
Ya pagpakan ni Jisus sa upatemmalalan ya manga utaw
1 Dun ni manga allaw yan, migkatipun uman ya mad�g to-o na manga utaw adti kan Jisus. Pagkabus da na makan nilan, pigtawag ni Jisus ya kanan manga umagakan, aw miglong kanilan, 2 �Nyallat aku beg sa manga utaw ini, kay seled pa na tulungallaw gayed silan kanak nyagad, aw adun da, wala' ya un nilan kanen asini. 3 Kun pa-uli-en ku silan na wala' ya kyan, to-o silan magkalumay di dalan. Kay awun eped kanilan na mawat ya un nilan uli-an.� 4 Nyusip kanan ya manga umagakan nan, �Ayin saba kitadun kamang asini kaligbinan sa kakan na maka-umba' sa kad�g na manga utaw y�iy?� 5 Aw nyusip si Jisus kanilan, �Dakman pila ya pan mayu awun?� Aw tyumubag silan, �Dakman pitu ya mabakla' na pan.� 6 Aw piglongan ni Jisus ya manga utaw na mingkud silan. Aw kyamang nan ya pitu ya pan aw pigpasalamatan nan ya Tyumanem. Aw pigtenga' nan ya pan aw pig-atag nan adti umagakan nan na un nilan atped-atpeden adti manga utaw. 7 Aw tigkas yan, kyumamang uman si Jisus sa tin tagbi' na isda' na awun ni kanilan, aw pigpasalamatan nan ya Tyumanem. Aw pigsugu' nan ya manga umagakan nan na magpan-atped-atped uman silan sa isda' adti manga utaw. 8 Kyuman ya kad�g nilan aw alag silan nyangkabiyag. Aw ya nyasama' na pigpan-imun nilan, pitungka-anes. 9 Ya kad�g na manga utaw dun, manga upatemmalalan. Aw pagkatigkas na pagkan nilan, pigpapanaw silan ni Jisus. 10 Aw maksay si Jisus aw manga umagakan nan nyanik sa balangay, aw syumakay silan taman adti banwa na Dalmanuta dun ni dulug na danaw.
Ya pagsekat na manga Parisiyo sa pangilala
11 Na, dyumulud ya manga Parisiyo kan Jisus aw gayed syumelseg nyusip kanan, kay yan ya tud nilan ya pagtanda' kun si Jisus ya pigpadala na Tyumanem. Yanagaw migsekat silan kanan sa pangilala na mabatug olo' magi sa tulus na Tyumanem na yan ya magmatinaw sa pagka Kristu nan. 12 Manang kya-ede-an da ni Jisus ya tud nilan, yanagaw gyuminawa sakanan na malalem aw nyusip kanilan, �Ananga' ka' ya manga utaw y�iy gayed magsekat sa pangilala lekat adti Tyumanem? Matinaw saba ya paglongun ku kamayu: Dili' kamu saba atagan sa pangilala na maynan!� 13 Yanagaw pig-indegan nan ya manga Parisiyo, aw syumakay si Jisus aw manga eped nan sa balangay, aw syuminan adti dipag na danaw.
Ya pundinganan ni Jisus sa patulinay sa pan
14 Na, kyalingawan na manga umagakan ni Jisus ya dyumala sa pan, aw sagwa dun pa silan ni danaw, kya-anenganengan nilan na dakman sambuk ya pan na awun ni balangay. 15 Aw miglong si Jisus kanilan, �Magpakatadeng kamu! Pakatanawi ya kana manga Parisiyo aw kan H�rod�s patulinay sa pan.� *
16 Aw migpanbalawbalaw silan, law nilan, �Yan gya ya du-an na piglong nan kay wala' ya dyala tadun na pan.� 17 Manang kya-ede-an ni Jisus ya pigbalawbalawan nilan, yanagaw nyusip kanilan, �Ananga' mayu balawbalawan ya wala' ya pan? Kenne' pa ka' mayu na wala' pakalabet? Unu, kenne' na kategelan na anenganeng mayu? 18 Awun saba mata mayu, ananga' wala' mayu kita?a? Aw awun saba talinga mayu, ananga' wala' mayu dengga? Unu, kyalingawan da mayu ya kad�g na kyinita' mayu idtu na muna taman adun? 19 Idtu na pagtenga' ku sa lima ya pan aw pagpakan ku sa limammalalan, pilang ka be-en ya nyasama' na pyan-imun mayu?� Tyumubag silan, �Sampulu' tag duwa.� 20 Nyusip pa si Jisus kanilan, �Aw pagtenga' ku sa pitu ya pan aw pagpakan ku sa upatemmalalan ya utaw, na, pilang ka anes ya nyasama' na pyan-imun mayu?� Aw tyumubag silan, �Pitung ka anes.� 21 Aw nyusip si Jisus kanilan, �Na unu, wala' pa mayu ka-ede-i?�
Ya pagpaguli' ni Jisus sa eseg na nyabuta
22 Pagdateng ni Jisus aw manga umagakan nan adti B�tsayda, awun manga utaw na mig-agak adti kan Jisus sa eseg na nyabuta, aw nyanginayu' silan kanan na uyutan nan ya eseg yan pada kaguli-an. 23 Pig-agak ni Jisus ya eseg na nyabuta aw pigpa-agad nan adti luwa' na kabalayan kay kaliman nan na olo' silan. Aw tigkas yan, pigdamus ni Jisus na kanan laway ya mata na utaw yan aw pigbetangan nan na manga palad nan, aw nyusip si Jisus kanan, �Unu, awun da kyinita' mu?� 24 Pagtandaw na eseg yan, miglong, �E-e, kyinita' da ku ya manga utaw manang kasiling saba silan na manga kawuy na migpanawpanaw.� 25 Aw pigtampeng pa ni Jisus na manga tullu' nan ya manga mata na eseg. Aw pagtandaw nan salut, dayaw da kyumita' aw mabangal da ya pag-inunu nan. 26 Katigkas yan, pigpa-uli' sakanan ni Jisus aw pyamene-an nan, law nan, �Sa pag-uli' mu, dili' kaw mag-agi adti kabalayan.�
Ya pagka-ede' da ni P�dro na si Jisus ya Kristu
27 Pagkatigkas yan, nyindeg si Jisus aw manga umagakan nan aw nyanaw silan adti manga kabalayan na pigsakup na lunsud na C�sariya Pilipo. Aw sagwa silan nyanaw, pig-usip nan silan, law nan, �Dun ni pagbalawbalaw na manga utaw, singan aku kunu?� 28 Aw tyumubag silan, �Ya eped miglong na ikaw kunu si Juan na Magbaba?utismuway, aw awun eped na miglong na ikaw kunu si �liyas, aw awun pa eped na miglong na ikaw ya sambuk na propita.� 29 Aw nyusip pa si Jisus kanilan, �Aw kamu, unu ya un mayu paglongun? Singan aku?� Aw tyumubag si P�dro, law nan, �Ikaw ya Kristu.� 30 Manang to-o silan pigpigilan ni Jisus na dili' nilan ubat-ubat kun singan sakanan.
Ya tagna' ni Jisus magkasampet sa pagkamatay nan
31 Pagkatigkas yan, pyalekat ni Jisus ya pagkasampet adti manga umagakan nan na un magti-is ya Ise' na Utaw aw kele?an na manga magdadumala?ay sa manga Judiyu aw manga mangkatas na magdadugsu-ay aw manga talaglawung sa Uldin. Aw un pa sakanan patayen, manang pagkatlu na allaw mataw da. 32 To-o ni Jisus pigbangal kanilan ya un nan kagamakan. Talana nan mig-ubat-ubat, piggagad ni P�dro adti mawatawat sa manga eped nilan, aw pigpalekat ni P�dro ya pagsagda kanan. 33 Manang lyumingi' si Jisus adti manga umagakan nan, aw pigsagda nan si P�dro, law nan, �Kay Satanas, pakawat kaw kanak! Ya kanmu anenganeng, olo' tin kana utaw aw beke' na kana Tyumanem.�
34 Katigkas yan, pigtawag ni Jisus ya mad�g na manga utaw adti sayid na manga umagakan nan, aw pigpalna-uwan nan silan, law nan, �Kun awun sambuk adti kamayu na malim dumalug kanak, ayawan nan ya kanan manga pagkaliman, aw pisanen nan baling ya kanan krus aw magad kanak pangkay adti pagkamatay. 35 Kay kun demet na utaw ya kanan ginawa asini tas na lupa', dili' nan baling matagtun ya ginawa na wala' ya katigkasan. Manang kun singan ya magbetang sa ginawa nan dumalug kanak aw magpa-ede' sa Madyaw na Ubat-ubat adti manga utaw pangkay unu ya sampetan nan, yan baling ya un makatagtun sa ginawa na wala' ya katigkasan. 36 Wan ya un mayu ma-untung kun matagtun mayu ya kadakula' na banwa manang kalagakan kamu sa kamayu kalaluwa? 37 Kay wala' ya un na utaw matagtun asini tas na lupa' na palangad pagliwan nan sa ginawa na wala' ya katigkasan.
38 �Ya manga utaw asini tas na lupa' adun na manga allaw y�iy, gayed silan nyakasala' kay pig-ayawan da nilan ya pagpangintu-u sa Tyumanem, aw dyumalug silan baling sa manga tyumanem nilan na galu'. Manang kun singan ya mamulamula asuntu kanak aw palna-u ku, na, aku na Ise' na Utaw, kamulamula?an ku uman ya utaw yan dun ni allaw na pagliku' ku asini tas na lupa'. Aw ya pagliku' ku ka-agadan na dakula' na kalalamdag aw katulus na kanak Ama, eped ku ya manga anghil lekat adti tas na langit.�