7
Ya makapalipa' sa manga utaw
1 Na, sambuk na allaw migpangkatipun adti kan Jisus ya manga Parisiyo aw manga talaglawung sa Uldin na manga Judiyu na siken adti J�rusalim. 2 Aw kyinita' nilan ya eped na manga umagakan ni Jisus na kyuman silan pangkay wala' nilan daluga ya katanem sa pag-unaw na lekat adti Uldin na manga Judiyu. * 3 Na, ya katanem na manga Judiyu, aw labi la ya manga Parisiyo, kun kuman silan, una nilan pag-asagan na tubig ya palad aw tullu' nilan siling na pigpalna-u na manga tyugbulan nilan. Kay iman nilan aw malalipa' ya manga tullu' na utaw adti anenganeng na Tyumanem. 4 Aw dili' silan kuman sa makan na lekat adti pal�ngk� kun dili' una?en nilan ugasan na tubig. Mad�g pa ya maynan na katanem na gayed nilan pigdalug sa pag-ugas sa manga tabu' aw manga kulun aw manga kalnidu na tabaga, siling na pigpalna-u na manga tyugbulan nilan.
5 Yanagaw nyusip kan Jisus ya manga Parisiyo aw manga talaglawung sa Uldin, law nilan, �Ananga' wala' dalug ya manga umagakan mu sa katanem na tyugbulan tadun? Sa pagkan nilan, wala' silan una pag-unaw. Kyuman silan pangkay malipa' pa ya manga tullu' nilan adti asdangan na Tyumanem.� 6 Tyumubag si Jisus kanilan, �Matinaw saba ya dadan pigsulat ni Isayas sa bet mayu, kay migtallalingu kamu saba. Pigsulat nan, �Migdeyen kunu kanak ya manga utaw y�iy, manang taman da olo' dun ni egeng nilan kay mawat baling kanak ya anenganeng nilan. 7 Wala' ya guna na pagsimba nilan kanak, kay pigsayuwan nilan ya manga sugu' na Tyumanem na tin kana utaw palna-u.� �* 8 Aw migpadeleg si Jisus miglong, �Pigbotonan mayu ya sugu' na Tyumanem aw pigdalug mayu baling ya katanem na manga utaw aw ya palna-u nilan.�
9 Aw miglong pa si Jisus sa manga Parisiyo, �To-o kamu kalaw matadeng magpalipaslipas sa pigsugu' na Tyumanem pada padelegen pa mayu ya kamayu palna-u aw ya kamayu manga katanem. 10 Simpan ya piglong ni Moysis asini muna, �Basayi ya ama mu aw ina mu. Kun awun utaw na magtullun sa kanan ama aw ina, patayen agaw ya utaw yan.�* 11 Manang yan baling ya gayed mayu pigpalna-u, na wala' ya sala' na utaw kun long nan adti ama nan aw ina nan, �Pasinsiyayi beg aku, kay wala' da ya kabatug ku magtabang kamayu, kay ya atag ku galu kamayu abus da ku baling pagsapa' na un atag adti Tyumanem.� 12 Aw dun ni kamayu pigpalna-u aw pigpan-imo', pigtumbay mayu ya manga utaw na pabaya-an nilan ya mangkatikadeng nilan aw dili' tabangan. 13 Yanagaw magi sa manga katanem na pigpalna-u mayu adti manga eped, wala' mayu daluga ya tengteng sugu' na Tyumanem. Aw mad�g pa uman ya baluk na pigpan-imo' mayu siling na maynan.�
14 Aw pigtawag uman ni Jisus adti kanan ya mad�g na utaw, law nan, �Magpakanyeg ya kad�g mayu, aw kalabeti mayu ya un ku paglongun: 15 Beke' na pagkanen na utaw ya makapalipa' kanan adti asdangan na Tyumanem, manang yan baling ya makapalipa' kanan ya lyumekat adti anenganeng nan magi sa paglong nan aw pig-imo' nan. 16 [Kun malim kamu makalabet, pakanyegi mayu.]�
17 Pag-indeg da ni Jisus aw manga umagakan nan sa mad�g na utaw, syumeled silan adti balay, * aw dun da nilan usipa si Jisus kun unu ya kakawasan na piglong nan adti manga Parisiyo. 18 Aw tyumubag da si Jisus kanilan, �Unu, kamu uman, wala' pa mayu kadi' kalabeti? Aw wala' mayu kabangal na beke' na pagkanen na utaw ya makapalipa' kanan adti asdangan na Tyumanem? 19 Ya pagkanen na utaw dili' sumeled adti anenganeng nan, manang adtu baling ni buntit nan, aw dili' madugay lumuwa' da adti lawas nan.� Yanagaw dun ni paglong ni Jisus, pigpa-ede' nan na malinis da adti asdangan na Tyumanem ya kad�g na makan na utaw.
20 Miglong uman si Jisus, �Ya lyumekat adti anenganeng na utaw magi sa paglong nan aw pigpan-imo' nan, yan baling ya makapalipa' kanan adti asdangan na Tyumanem. 21 Kay ya anenganeng na utaw, yan ya lyekatan na kad�g na imo-unun na malatay: ya magkasala-enen, aw ya magpanakaw, aw ya magpatay sa eped na utaw, 22 aw ya maglakadenen, aw ya tagaw aw pagkaybeg sa pametang na eped na utaw, aw ya pagtuman sa pagkaliman mag-imo' sa malatay, aw ya paggalu', aw ya pag-imo' sa makamulamula sa lawas, aw ya pag-inga', aw ya pagkalat sa dengeg na eped na utaw, aw ya pagpatastas, aw ya magkawaybet. 23 Na, ya kad�g na malatay y�iy dun lekat ni anenganeng na utaw, aw y�iy ya makapalipa' kanan na dili' da sakanan madawat na Tyumanem.�
Ya pagpangintu-u na ka?ubayan na beke' na Judiyu
24 Pagkatigkas yan, nyindeg si Jisus lekat adti banwa na Galiliya aw nyadtu ni banwa na pigsakup na lunsud na Tiro na pig-eya-an na manga utaw na beke' na Judiyu. Aw nyeya' sakanan dun ni sambuk na balay kay kaliman nan wala' ya maka-ede' na awun sakanan, manang nyaksay baling nyabekkal ya ubat-ubat sa pagdateng nan. 25-26 Na, dun ni banwa yan, awun sambuk na ka?ubayan na buwadbuwad na manga taga Ponisiya na pigsakup na Sirya, aw awun ise' nan na bubay na pigseledan na malipa' na ispiritu. Yanagaw, pagdengeg na ka?ubayan yan na dyumateng da si Jisus adti kanilan banwa, nyaksay nyadtu ni kanan aw lyumuhud adti asdangan nan, aw nyanginayu' kan Jisus na alilinan nan ya busaw lekat adti ise' nan. Manang asuntu na beke' sakanan na utaw na Judiyu, 27 miglong si Jisus kanan, �Pabiyagen una ya manga mangayse',* kay dili' madyaw kun kamangen ya pan nilan aw agbel adti manga idu'.� 28 Manang tyumubag ya ka?ubayan kan Jisus, �Matinaw agaw, kay Sir, ya piglong mu, manang pangkay ya manga idu' adti dalem na lamisa makakan pa sa manga mumu' na mangkataktak na mangayse'.� 29 Aw kyatutukan si Jisus sa tubag nan aw law nan, �Madyaw saba ya tubag mu. Na, uli' da kaw, kay lyumuwa' da ya busaw lekat adti ise' mu.� 30 Yanagaw nyuli' ya ka?ubayan aw kyinita' nan ya ise' nan na nyatingen da adti kulanganan nan aw wala' da ya busaw dun ni kanan.
Ya pagpaguli' ni Jisus sa utaw na bengel aw umal
31 Na, pig-indegan ni Jisus ya Tiro aw nyanaw adti lunsud na Sidon. Aw tigkas yan, lyumiku' adti palibedan na Danaw na Galiliya aw sakup na manga lunsud na D�kapolis. 32 Talana nan dun, piggagad na manga utaw adti kan Jisus ya sambuk na eseg na bengel aw umal, aw nyanginayu' silan kanan na betangan na palad nan pada kaguli-an. 33 Yanagaw pigtani ni Jisus ya eseg yan lekat adti katipun na manga utaw, aw pigseled nan ya duwa ya tulli-ay nan adti talinga na utaw yan, aw pigbetangan nan na kanan laway ya dila' na umal. 34 Aw lyumangad si Jisus adti langit aw gyuminawa na malalem, aw miglong sakanan, ��ppata!� Ya kakawasan nan adti kanaten tingeg: �Ka-uwangan ya pagdengeg mu!� 35 Aw dayaw dyumengeg ya eseg yan aw nyakapaglong, aw mabangal da ya paglong nan.
36 Katigkas yan, pigsugu' ni Jisus ya manga utaw, �Dili' kamu mag-ubat-ubat sa nya-imo' asini.� Manang to-o nilan baling pigbekkal adti mad�g na utaw ya nya-imo'. 37 Aw to-o silan nya-enneng-enneng aw miglong silan, �Tumalag mangkadyaw ya pigpan-imo' nan. Pigpadengeg nan ya manga bengel aw pigpapaglong nan ya manga umal.�